އެއް ކޮޓަރި ފްލެޓްތައް ސަރުކާރަށް ނުލިބުނީ ކުންފުނިތަކުގެ ގާބިލުކަން ނެތުމުން: އަލީ ނިޔާޒް

ހުޅުމާލޭގެ ދެވަނަ ފިޔަވަހީގައި ދައުލަތުގެ ކުންފުނިތަކުން އެޅި އިމާރާތްތަކުން އެއް ކޮޓަރީގެ ފްލެޓްތައް ސަރުކާރަށް ނުލިބުނީ އެގޮތަށް މަޝްރޫއު ކުރިއަށް ގެންދިއުމުގެ ގާބިލުކަން ނެތް ކަމަށް ކުންފުނިތަކުން ބުނުމުން ކަމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒް މިއަދު ވިދާޅުވެއްޖެ އެވެ.

ހިޔާ މަަޝްރޫއުގައި ހިމެނޭ އެއް ކޮޓަރީގެ ފްލެޓްތައް ލިބޭނެ ކަމުގެ ލިޔުން ކުރީގެ ސަރުކާރުން ގިނަބަޔަަކަށް ދޫކޮށްފައި ވަނިކޮށް، އެ ލިއުންތައް މިހާރުގެ ސަރުކާރުން ވަނީ ބާތިލުކޮށްފަ އެވެ. އެގޮތަށް ނިންމި އިރު ހައުސިން މިނިސްްޓަރު މުހައްމަދު އަސްލަމް ފުރަތަމަ ވިދާޅުވީީ އެއީ އެއް ކޮޓަރީގެ ފްލެޓްތައް އެވަަރަށް ނެތުމުން ނިންމި ނިންމުމެއް ކަމަށެވެ.

އެ ފްލެޓްތަކަށް ވީ ގޮތް ރަަައްޔިތުންނަށް އޮޅުންފިލުވައި ދިނުމަށް ގޮވާލައްވައި ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް ރައްޔިތުންގެ މަޖިލީހަށް މިއަދު ހުށަހެޅުއްވި ގަރާރުގެ ބަހުސްގައި އަލީ ނިޔާޒް ވިދާޅުވީ ފްލެޓް އަޅައި ސޯޝަލް ހައުސިންއަށް ސަރުކާރަށް ދޫކުރުމުގެ ކެޕޭސިޓީ ކުންފުނިތަކުގައި ނެތްކަން ސަރުކާރު ބަދަލުވުމުގެ މަރުހަލާގައި ވެސް އެނގުނު ކަމަށެވެ.

"މިސާލަކަށް ސްޓެލްކޯގެ މައި މެންޑޭޓަކަށް މި އޮންނަނީ ރައްޔިތުންނަށް ހެޔޮ އަގުގައި ކަރަންޓް ފޯރުކޮށްދިނުން. އެމްޑަބްލިއު އެސްސީގެ މެންޑޭޓަކަށް މި އޮންނަނީ ރައްޔިތުންނަށް ފެން ފޯރުކޮށްްދިނުން އަދި އެމްޕީއެލްއަށް މި އޮންނަނީ އެެހެން މެންޑޭޓެއް،" ނިޔާޒް ވިދާޅުވި އެވެ.

އޭނާ ވިދާޅުވީ ބޯހިޔާވަހިކަމުގެ މަޝްރޫއުތައް ހިންގަން އެ ކުންފުނިތަކަށް ހަވާލުކުރީމާ ޖެހުނީ ދަރަންޏަށް ފައިސާ ނަގައިގެން އެ މަަސައްކަތްކުރަން ކަމަށާއި އެއީ ކުރެވޭނެ ކަމެއް ނޫން ކަމަށް ކުންފުނިތަކުގެ އާ މެނޭޖްމަންޓްތަކުން ސަރުކާރަށް ލަފާ ދިން ކަމަށެވެ.

"އެހެންވީމާ ކުރިން އެ ޑިޒައިންކޮށްފައި އޮތް ގޮތަށް އެ ޑިޒައިން ބަދަލުވެގެން ދިޔަ ކަމަށް އަޅުގަނޑު ގަބޫލުކުރަނީ،" އޭނާ ވިދާޅުވި އެވެ.

އަލި ނިޔާޒް މިމޭރުމުން ވާހަކަދެއްކެވީ އެއް ކޮޓަރީގެ ފްލެޓްތައް ސަރުކާރުން ބޮޑު އަގުގައި ވިއްކަމުން ގެންދާ ކަމަށް މެމްބަރު ޝިޔާމް ވިދާޅުވުމުން، އެ ތުހުމަތަށް ރައްދު ދެއްވުމުގެ ގޮތުންނެވެ. ގަރާރުގެ ބަހުސްގައި ޝިޔާމް ތުހުމަތު ކުރެއްވީ އެއް ކޮޓަރީގެ ފްލެޓްތައް ލިބޭނެކަމަށް ބުނެ ކުރީގެ ސަރުކާރުން ލިއުން ދީފައިވާ މީހުންނަށް އެތަންތަން ސަރުކާރުން ނުދިނީ ކުންފުނިތަކާ އެއްބަސްވެގެން ބޮޑު އަގުގައި އެތަންތަން ވިއްކަން ކަމަށެވެ.

ހިޔާ މަޝްރޫއުގެ ފްލެޓްތައް ދިނުން ލަސްވުމުގެ ކަންބޮޑުވުންތަކުގެ ތެރޭގައި އަމާޒުވި ފާޑުކިއުންތަކަށް ރައްދެއްގެ ގޮތުގައި، އެއް ކޮޓަރީގެ ފްލެޓްތަކަށް ކުރީގެ ސަރުކާރުން ލިއުން ދޫކުރީ "ވުޖޫދުގައި" ނެތީސް ކަަމަށް ހައުސިން މިނިސްޓަރު މުހައްމަދު އަސްލަމް ވިދާޅުވެފައިވެ އެވެ.

އެކަމަކު، އެ ފްލެޓްތައް އިމާރާތްކުރަމުން އަންނަކަން ބައެއް ކުންފުނިތަކުން ހާމަކުރި އެވެ.

އެނގިފައިވާ ގޮތުގައި ސަރުކާރުގެ ކުންފުނިތަކާ ހަވާލުކުރި އެއް ކޮޓަރީގެ ފްލެޓްތަކަކީ ޖާގައިގެ ގޮތުން މާ ކުދި ތަންތަނަށް ވާތީ ބޭނުން ނުވާ ކަމަށް މި ވެރިކަމުގައި އުފެއްދި ފަހި ދިރިއުޅުން ކޯޕަރޭޝަނުން ބައެއް ކުންފުނިތަކަށް އެންގި އެވެ.

މިގޮތަށް ސިޓީއަކުން އެންގުމުން ބައެއް ކުންފުނިތަކުން ވަނީ ސަރުކާރަށް ރިޒާވްކުރި އެއް ކޮޓަރީގެ ފްލެޓްތަށް އަނެއްކާވެސް މުވައްޒަފުންނަށް ދޫކޮށްފަ އެވެ. އެ ތަންތަަނަށް މުވައްޒަފުން ކުރިމަތިލައި ފްލެޓް ލިބޭ ދާއިމީ ލިސްޓު އިއުލާންކޮށްފައި ވަނިކޮށް، އެއް ކޮޓަރީގެ ފްލެޓް ލިބެން ހުރިތޯ ރައީސް އޮފީހުގެ ސިޓީއެއް ބައެއް ކުންފުނިތަކަށް ލިބުނެވެ.

ބައެއް ކުންފުނިތަކުން އެންގީ، "މިހާރު" އަށް ކަށަވަރުވެފައިވާ ގޮތުގައި، މުވައްޒަފުން ނުނަގާ ފްލެޓެއް ހުރެއްޖެ ނަމަ ސަރުކާރަށް އަންގާނެ ކަމަށެވެ.