އޭދަފުއްޓަށް ބަދަލުކުރި ހިޔާ ބައެއް ކުދިންނާ މެދު ހިތްހަމަނުޖެހުންތަކެއް

ދައުލަތުގެ ބެލުމުގެ ދަށުން ކުޑަކުދިންގެ ހިޔާ އާއި ފިޔަވަތީގައި ކުރިން ބަލަހައްޓަމުން އައިސް، ފަހުން ބ. އޭދަފުއްޓަށް ބަދަލުކުރި ބައެއް ކުދިންނާ ދޭތެރޭ އެ ރަށުގެ ބަޔަކު ހިތްހަމަނުޖެހުން އިއްޔެ ފާޅުކޮށްފި އެވެ.

ކުދިންނަށް އުފާވެރި، ރައްކާތެރި މާހައުލެއް ފޯރުކޮށްދިނުމުގެ މަގުސަދުގައި، އެކި ރަށްރަށަށް ދައުލަތުން ބަލަހައްޓާ ކުދިން ބަދަލުކުރަން ފެށީ މިދިޔަ ޑިސެމްބަރު 24 ގަ އެވެ. ސަރުކާރުން އަލަށް ފެށި އެ މަސައްކަތުގައި އޭދަފުއްޓަށް 17 ކުދިން ބަދަލުކޮށް ބައިތިއްބާފައިވަނީ "އަމާން ހިޔާ" ގަ އެވެ. އެއީ ހަތަރު އާއިލާއަކަށް ނިސްބަތްވާ ކުދިންނެވެ.

އާއިލާގެ ލޯބި ނުލިބި، ބަންދު ތަނެއްގައި އުޅެން ޖެހުމަކީ ކުދިންގެ ހެދިބޮޑުވުމަށް ވެސް ނުރަނގަޅު އަސަރުތައް ކުރާނެ ކަމަކަށް ވާތީ، ސަރުކާރުން އެކަން ފެށީ އެ ކުދިންނަށް އާއްމުންގެ އަޅާލުމާއި ލޯބި ހޯދައިދިނުމެވެ.

"އަމާން ހިޔާ" ގައި ތިބޭ ކުދިންނަށް އެހެން އާއިލާތަކަށް ޒިޔާރަތް ކުރެވޭނެ އެވެ. އަދި އެހެން ކުދިންނާ އެކު ކުޅިވަރު ކުޅެ، ކުޑަކުދިންނަށް އާއްމުކޮށް އޮންނަ ހުރިހާ ފުރުސަތުތަކެއް ވެސް ލިބޭނެ އެވެ.

އޭދަފުށީގެ އިތުރުން ށ. އަތޮޅު އަދި ފުވައްމުލަކުގެ ފެމިލީ އެންޑް ޗިލްޑްރަން ސާވިސް ސެންޓަރުގައި ގާއިމްކޮށްފައިވާ އަމާން ހިޔާއަށް ކުދިން ބަދަލުކޮށްފައި ވެ އެވެ.

އެކަމަކު އޭދަފުއްޓަށް ބަދަލުކުރި ބައެއް ކުދިންގެ އަހުލާގީ މައްސަލަތަކާ މެދު ބައެއް މީހުންގެ ކަންބޮޑުވުންތަކެއް އެބަ ހުއްޓެވެ.

އޭދަފުށީ ކައުންސިލް މެމްބަރަކު މިއަދު ވިދާޅުވީ ބައެއް ކުދިންގެ ފަރާތުން ދިމާވާ މައްސަލަތަކާއި އާންމުންގެ ކަންބޮޑުވުން ޖެންޑާ މިނިސްޓަރު އައިޝަތު މުހައްމަދު ދީދީގެ ސަމާލުކަމަށް ދެ ފަހަރެއްގެ މަތިން ގެނެސްފައިވާ ކަމަށެވެ.

އޭދަފުށީގެ ބައެއް މީހުންގެ ހިތްހަމަނުޖެހުންތަކުގެ ތެރޭގައި "އަމާން ހިޔާ"ގައި ތިބޭ ކުދިން އުސޫލެއް ނެތި ރޭގަނޑު ބޭރުގައި އުޅުމާއި ބައެއް ފަހަރު ބޭއަދަބީ ބަސްތައް ބޭނުންކުރުން ހިމެނެ އެވެ. އަދި އާންމު ތަންތަނުގައި ކޮށްގެން ނުވާނެ ބައެއް ކަންކަން ބައެއް ކުދިންގެ ފަރާތުން ފެންނަ ކަމަށް ވެސް، އެ ރަށުގެ ބައެއް މީހުން ބުނެ އެވެ.

އިއްޔެ އެ ރަށުގެ ބަޔަކު ވަނީ އެ ކުދިން ތިބޭ އަމާން ހިޔާ ކައިރިއަށް އެއްވެފަ އެވެ. އޭގެ ސަބަބަކީ އަމާން ހިޔާގެ އޮފީސް އިމާރާތުގެ ބިއްލޫރިތަކެއް ތަޅާލުމެވެ.

އެއްވި މީހުން އެ ކުދިންނަށް ނިސްބަތްކޮށް ހުތުރު ބަހުން ވާހަކަދައްކާ އަޑުއިވޭ ވީޑިއޯއެއް ވެސް ސޯޝަލް މީޑިއާގައި ދައުރުވި އެވެ.

ޖެންޑާ މިނިސްޓްރީން މީގެ ކުރިން ބުނީ އެހެން ރަށްރަށުގައި ހުރި "އަމާން ހިޔާތައް" ވެސް އަންނަ އަހަރު ހުޅުވައި، އިތުރު ކުދިން އެތަނަށް ބަދަލުކުރާނެ ކަމަށެވެ.