މި ކުދިންނާ މެދު ލޯތްބެއް، ކުލުނެއް ނެތް؟

ވިހާފައި ދޫކޮށްލި، އާއިލާތަކުން ހަވާލުނުވި ތުއްތު ކުދިންނެވެ؛ ރަޖާ އޮޅާލައި ބައިތިއްބާފައި ތިބި އެ ކުދިންގެ ފޮޓޯ އާއްމުކުރައްވައި ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވެދެއްވި ގޮތުގައި، ދައުލަތުގެ ބެލުމުގެ ދަށުގައި އެ ތިބީ އިތުރު އެއްވެސް ގޮތެއް ނެތިގެންނެވެ.

މަންމަ އާއި ބައްޕަގެ ލޯތްބެއް، ރަހުމެއް ކުލުނެއް ނެތެވެ. އާއިލާތަކުގެ އަޅާލުން ނުލިބުނީ އެވެ.

މިނިސްޓަރު އައިޝާގެ ކަންބޮޑުވުމަކީ އިހުމާލުތަކުގެ ސަބަބުން ދައުލަތަށް ނަގަން ޖެހޭ ކުދިންގެ އަދަދު އިތުރުވަމުން ދިއުމެވެ. ދައުލަތުގެ ބެލުމުގެ ދަށުގައި ކުދިން ބައިތިއްބާ މަރުކަޒުތަކަކީ އެންމެ ރަނގަޅު މާހައުލަށް ނުވިޔަސް އަޅާލުމާއި ލޯބިން މަހްރޫމުވެފައި ތިބި ގިނަ ކުދިންތަކެއް އެ ތަނުގައި އެބަތިއްބެވެ.

ޖެންޑާ މިނިސްޓްރީން އެންމެ ފަހުން އާއްމުކޮށްފައިވާ ތަފާސްހިސާބުތަކުގައިވާ ގޮތުގައި ދައުލަތުން 200 އަށް ވުރެ ގިނަ ކުދިން ބަލަހައްޓަމުން އެބަދެ އެވެ. އޭގެ ތެރޭގައި ދެ ޖިންސުގެ އެކި އުމުރުފުރާތައް ހިމެނޭއިރު ކޮންމެ މަހަކު ކަހަލަ ގޮތަކަށް ދައުލަތުން ކުއްޖަކާ ހަވާލުވާން ޖެހެ އެވެ.

އޭގެ ތެރެއިން ބައެއް ކުދިންނާ މިނިސްޓްރީން ހަވާލުވާން ޖެހެނީ ވިހެއުމާ އެކު ހޮސްޕިޓަލާ ހިސާބުންނެވެ. އަނެއް ބައި ކުދިންނަށް އާއިލީ މާހައުލު ހުންނަ ގޮތް ޖާގައެއް ނެތިގެން އެ ކުދިންގެ ރައްކާތެރިކަމަށްޓަކަ އެވެ.

މިނިސްޓަރު އެދިވަޑައިގަންނަވަނީ ދައުލަތުން ބަލަހައްޓަން ޖެހިފައިވާ ކުދިންނާ ދޭތެރޭގައި "މުޖުތަމައުގެ ހިތް" ހުޅުވާލުމަށެވެ. އެންމެ ރަނގަޅު ހައްލަކީ ފޮސްޓާކުރުން ކަމަށް ވިދާޅުވި އެވެ.

ކުޑަކުދިންގެ ހިޔާގައި ބަލަހައްޓަމުން ދިޔަ ކުދިންނަށް އާއިލީ މާހައުލެއް ހޯދައިދޭން ސަރުކާރުން ވަނީ އެ ކުދިން ރަށްރަށުގެ އަމާން ވެށިތަކަށް ބަދަލުކޮށްފަ އެވެ. އެހެން ކުދިންނެކޭ އެއްގޮތަށް އުޅުމުގެ ފުރުސަތު އެ ކުދިންނަށް ލިބިފައިވިޔަސް އެ މާހައުލުގައި ވެސް އެ ކުދިންނަށް އުނި ވަނީ އާއިލާއެއްގެ ތެރޭގައި ހެދި ބޮޑުވުމެވެ.

ޖެންޑާ މިނިސްޓްރީން ބުނީ، ފޮސްޓާކުރުމުގައި މިހާރު ވަނީ ކުރިއަށް ވުރެ ބޮޑަށް ލުއިތަކެއް ހޯދައިދީފައި ކަމަށެވެ.

ދައުލަތުގެ ބެލުމުގެ ދަށުގައި ހުރި ކުއްޖަކު ފޮސްޓަކުރަން އެދި ހުށަހެޅުމުން ޖެންޑާ މިނިސްޓްރީން އެ އާއިލާއެއްގެ އެސެސްމަންޓް ހަދާނެ އެވެ. އެއީ އެ ކުއްޖާ އަށް އެންމެ ރަނގަޅު މާހައުލެއްތޯ ކަށަވަރު ކުރުމަށެވެ. އޭގެ ފަހުން އެސެސްމަންޓުގެ މައްޗަށް ބިނާކޮށް ބެލެނިވެރިކަމާ ހަވާލުވާން ހުށަހަޅާ މީހެއްގެ އިންޓަވިއު ކުރިއަށް ގެންދާނެ އެވެ. އެ ކުއްޖެއްގެ ގާނޫނީ ބަލަދުވެރިކަން ކޯޓުން ހަވާލުކުރާނީ އޭގެ ފަހުންނެވެ.

ދައުލަތުގެ ބެލުމުގެ ދަށުން ކުދިން ގެންގޮސްގެން އާއިލާތަކުގެ ތެރޭގައި ބޮޑުކުރުމުގައި، މުޅި މުޖުތަމައުގެ ވިސްނުން އަދި ބަދަލު ނުވިޔަސް މިހާތަނަށް ކުދިން ފޮސްޓާކޮށްގެން ވަރަށް ރަނގަޅަށް ބަލަހައްޓާ އާއިލާތައް ތިބި ކަން މިނިސްޓްރީން ފާހަގަކުރެ އެވެ.