ޓެލިކިލާހަށް އޭޝިއާ ސަރަހައްދުގެ އެވޯޑެއް

ކޮވިޑު-19 ގެ ބަލިމަޑުކަމުގައި ޓީވީ މެދުވެރިކޮށް ކިޔަވައިދިނުމަށް އެޑިއުކޭޝަން މިނިސްޓްރީން ދައްކާ "ޓެލިކިލާސް" އަށް އޭޝިޔާ ސަރަހައްދުގެ ޝަރަފުވެރި އެވޯޑެއް ލިބިއްޖެ އެވެ.

އެ ޕްރޮގްރާމަށް ޔުނެސްކޯ ވެންހޫ އެވޯޑު ލިބިފައިވަނީ ބަލިމަޑުކަމުގައި މެދުކެނޑުމެއްނެތި ގައުމީ ޓީވީން ފިލާވަޅުތައް ދެއްކުމުގެ ޕްރޮޖެކްޓުންނެވެ. އެ އެވޯޑާއެކު ރާއްޖެއަށް 20،000 ޑޮލަރު ލިބިފައި ވެ އެވެ.

ޓެލިކިލާސް މެދުވެރިކޮށް އެޑިއުކޭޝަން މިނިސްޓްރީން ކިޔަވައިދޭން ފަށާފައިވަނީ ކޮވިޑުގެ ސަބަބުން މިދިޔަ މާޗު މަހު ސްކޫލުތައް ބަންދުކުރުމަށްފަހު މާޗު 15، 2020 ގަ އެވެ. އޭގެ ފަހުން ސްކޫލުތައް ހުޅުވިއަސް ޕީއެސްއެމްގެ ޔެސް ޗެނަލާއި މުންނާރު އަދި ދިވެހި ޗެނަލުން ޓެލިކިލާސް ފިލާވަޅުތައް ދައްކާފައިވެ އެވެ.

މިދިޔަ ޑިސެމްބަރު 3 ގައި ސްކޫލުތައް ބަންދުވުމާއެކު ޓެލިކިލާސް މެދުކަނޑާލުމަށްފަހު މިނިސްޓްރީން މިހާރު އަންނަނީ އެ ޕްރޮގްރާމް ދެއްކުމަށް ތައްޔާރުވަމުންނެވެ.

ވެންހުއި އެވޯޑަކީ ޔުނެސްކޯ އޭޝިޔާ ޕެސިފިކް ޕްރޮގްރާމް އޮފް އެޑިއުކޭޝަނަލް އިނޮވޭޝަން ފޯ ޑިވެލޮޕްމަންޓާއި ނޭޝަނަލް އޮފް ދަ ޕީޕަލްސް ރިޕަބްލިކް އޮފް ޗައިނާ ފޯ ޔުނެކްސޯ ގުޅިގެން 2010 ވަނަ އަހަރުން ފެށިގެން ކޮންމެ އަހަރަކު ވެސް ދެމުން އަންނަ އެވޯޑެކެވެ.

އެ އެވޯޑުގެ މަގުސަދަކީ އޭޝިއާ ޕެސިފިކް ސަރަހައްދުގައި ތައުލީމީ ދާއިރާ ކުރިއެރުވުމަށް އީޖާދީގޮތެއްގައި ފާހަގަކޮށްލެވޭ ހިދުމަތްތަކެއް ކުރާ މީހުންނާއި އިދާރާތަކުގެ އަގުވަޒަންކޮށް އެ ފަރާތްތަކަށް ހިތްވަރު ދިނުމެވެ.

އެޑިއުކޭޝަން މިނިސްޓަރު ޑރ. އައިޝަތު އަލީ ވަނީ ކާމިޔާބުކަމާއެކު ޓެލިކިލާސް ގެންދިއުމުގައި އެހީތެރިކަން ދިން ފަރާތްތަކަށް ޝުކުރު އަދާކުރައްވައިފަ އެވެ.