އެމްޕީއެލް/އެފްއެސްއެމް ތެލުގެ ވައްކަން ބަލަން ބޮޑު އޮޑިޓެއް ކުރަންޖެހޭތީ އިތުރު މުހުލަތެއް

މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ އަށް ބޭނުންވާ ތެޔޮ ހޯދުމުގައި އެފްއެސްްއެމްގެ ބަޔަކާ ވެސް ގުޅިގެން ހިންގާފައިވާ ކަމަށް ތުހުމަތުކުރާ އަށް މިލިއަން ރުފިޔާގެ ވައްކަމާ ގުޅިގެން ކުރަން ޖެހެނީ ވަރަށް ބޮޑު އޮޑިޓެއް ކަމަށް އޮޑިޓާ ޖެނެރަލް، ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒް ކޮމިޓީ (އެސްއޯއީ ކޮމިޓީ) އަށް އަންގަވައިފި އެވެ.

އެސްއޯއީ ކޮމިޓީން މިއަދު ބޭއްވި ބައްދަލުވުމުގައި އެ ކޮމިޓީގެ މުގައްރިރު އަދި ހުޅުދޫ ދާއިރާގެ އެމްޑީޕީ މެމްބަރު އިލްޔާސް ލަބީބް ވިދާޅުވީ ތެލުގެ މައްސަލައިގެ އޮޑިޓް ނިންމަން ކޮމިޓީން ކުރިން ދިން ތިން މަސް ދުވަސް ހަ މަހަށް އިތުރުކޮށްދޭން އޮޑިޓާ ޖެނެރަލްގެ އޮފީހުން އެދިފައިވާ ކަމަށެވެ.

އޭނާ ވިދާޅުވީ އެފްއެސްމް އިން ތެލުން ވައްކަން ކުރާކަމަށް އެކި ގޮތް ގޮތުން އަޑުއިވޭ ކަމަށާއި އެހެންވެ އެކަން ބަލަން ކުރަން ޖެހެނީ ބޮޑު ތަހުގީގެއް ކަަމަށެވެ.

އެސްއޯއީ ކޮމިޓީން އޮޑިޓާ ޖެނެރަލްގެ އޮފީހާ ހަވާލުކުރީ އެމްޕީއެލް އާއި އެފްއެސްއެމުން މިދިޔަ ދެ އަހަރު ދުވަހު ހިންގާފައިވާ ތެލުގެ މުއަމާލާތްތަކުގެ އޮޑިޓެއް ކުރުމަށެވެ.

"މިހާރު އެބޭފުޅުން [އޮޑިޓާ ޖެނެރަލްގެ އޮފީހުން] އެބަ އޮތް މިއީ ވަރަށް ބޮޑު އޮޑިޓެއް ކަަމަށް [އަންގަވާފައި]. ފިއުލް ސަޕްލައިގެ ތެލުގެ ތެރެއިން މި ވައްކަން ކުރާކަން އަޅުގަނޑުމެންނަށް އެކި ގޮތްގޮތުން އެބަ އަޑުއިވޭ. އެހެންވީމާ ވަރަށް ބޮޑު ތަހުގީގެެއް، އެ ބޭފުޅުން އޮޑިޓްގައި މިކަން ވަރަށް ބޮޑަށް ބަލަން ޖެހޭތީ ވަގުތު ބޭނުންވާ ކަމަށް އެބޭފުޅުން އެދިފައި އޮތީ،" އިލްޔާސް ވިދާޅުވި އެވެ.

އެމްޕީއެލް އާއި އެފްއެސްއެމްގެ މުވައްޒަފުން ގުޅިގެން ހިންގި ކަމަށް ބުނާ ތެލުގެ ޚިޔާނާތުގެ އަގު އަށް މިލިޔަން ރުފިޔާ އަށް އަރާ ކަމަށް އެމްޕީއެލްގެ ކުރީގެ ޗެއާމަން މުހައްމަދު ޒަކީ (ނަޒާކީ ޒަކީ) ކުރިން ވެސް ވަނީ ވިދާޅުވެފަ އެވެ. އެ ޚިޔާނާތުގެ މައްސަލަ މަޖިލީހުގެ ސަމާލުކަމަށް އައީ ޒަކީ ކުރެއްވި ޓްވީޓަކާ ގުޅިގެންނެވެ. އޭނާ އެމްޕީއެލްގެ ޗެއާމަން ކަމުން އިސްތިއުފާ ދެއްވީ އެ ވާހަކަ ދެއްކެވުމަށް ފަހުގަ އެވެ.

މިއަދުގެ ބައްދަލުވުުގައި އިލްޔާސް ވިދާޅުވީ ޚިޔާނާތުގެ އަގު އަށް މިލިޔަން ރުފިޔާއަށް އަރާކަން މިހާރު ގާތްގަނޑަކަށް ޔަގީންވެފައިވާ ކަމަށެވެ. އެހެންވެ އިތުރަށް އެކަން ބެލުމަށް އޮޑިޓަށް އިތުރު ތިން މަސް ދުވަސް ދޭން އޭނާ ހުށަހެޅުއްވި އެވެ. ބައްދަލުވުމުގައި ބައިވެރިވަޑައިގެންނެވި އެއްވެސް މެމްބަރަކު އިއުތިރާޒް ނުކުރައްވާތީ ކޮމިޓީން ފާސްވީ އެގޮތަށެވެ. އެހެންވެ މި ދިން މުއްދަތާ އެކު އޮޑިޓް ނިންމަން ޖެހޭނީ އަންނަ މެއި މަހުގެ ހަ ވަނަ ދުވަހަށެވެ.