އައްޑޫގައި 1،300 އަށް ވުރެ ގިނަ މީހުން ވެކްސިން ޖަހައިފި

މާލެ ސަރަހައްދު ނަގާފައި މިހާރު އެންމެ ބާރަށް ކޮވިޑް ފެތުރެމުން ދާ އައްޑޫގައި މިހާތަނަށް 1،300އަށް ވުރެ ގިނަ މީހުންނަށް ކޮވިޑް ވެކްސިން ދީފި އެވެ.

އައްޑޫ އިމަޖެންސީ އޮޕަރޭޝަން ސެންޓަރުން ބުނީ އިއްޔެއާ ހަމައަށް ޖުމްލަ 1،369 މީހުން ވެކްސިން ޖަހާފައިވާ ކަމަށެވެ. އޭގެ ތެރޭގައި ހިމެނެނީ ހިތަދޫން 1،130 މީހުންނާއި ފޭދޫން 108 މީހުން، މަަރަދޫން 76 މީހުން، މަރަދޫފޭދޫން 22 މީހުން އަދި ހުޅުމީދޫން 33 މީހުންނެވެ.

އައްޑޫގައި ވެކްސިން ޖަހަން ފެށީ، މާލެއެކޭ އެއްގޮތަށް، މި މަހު 1 ގަ އެވެ. އިއްޔެ 176 މީހަކު ވަނީ ވެކްސިން ޖަހައިފަ އެވެ.

އައްޑޫގައި މިހާތަނަށް 60 މީހަކު ވަނީ ކޮވިޑަށް ޕޮޒިޓިވްވެފަ އެވެ. އޭގެ ތެރެއިން ފަސް މީހަކަށް އެޑްމިޓްކޮށް އަންނަނީ ފަރުވާ ދެމުންނެވެ.

ކޮވިޑްގެ ކޭސްތަކެއް ފެނުމާ ގުޅިގެން އައްޑޫ މޮނިޓަރިން އަށް ލައި ކޮންޓެކްޓް ޓްރޭސިން ހެދުމުގެ އިތުރުން އިއްޔެ ވަނީ ރެންޑަމް ސާމްޕަލް ވެސް ނަގަން ފަށައިފަ އެވެ. އެ މަސައްކަތް ހަފުތާއަކަށް ކުރިއަށް ގެންދާނެ އެވެ.