ގުރުއާން ކްލާސްތަކާއި ޓިއުޝަން ސެންޓަރުތައް ހުޅުވަން ހުއްދަ ދީފި

ކޮވިޑް ފެތުރެން ފެށުމާ އެކު ބަންދުކުރި، ގުރުއާން ކްލާސްތަކާއި ޓިއުޝަން ސެންޓަރުތައް ހުޅުވައި ކިޔަވައިދިނުމުގެ ހުއްދަ މިއަދު ދީފި އެވެ.

އެޑިއުކޭޝަން މިނިސްޓްރީން ކުރި އިއުލާނުގައި ބުނީ، ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ މިންގަނޑުތަކާ އެއްގޮތަށް ޓިއުޝަނާއި ގުރުއާން ކްލާސްތައް ހުޅުވައި ހިންގުމުގެ ހުއްދަ ދީފައިވާ ކަމަށެވެ.

އެއާއެކު، އެޑިއުކޭޝަން މިނިސްޓްރީގައި ރަޖިސްޓްރީކޮށްގެން ހިންގާ ޓިއުޝަނާއި ގުރުއާން ކްލާސްތައް މިއަދުން ފެށިގެން ހުޅުވައިގެން ހިދުމަތް ދިނުން އެންމެ ރަނގަޅުކަމަށް ބުންޏެވެ.

"މި ތަންތަން ހިންގަންވާނީ ކޮވިޑް-19 އިން ރައްކާތެރިވުމަށް އެކުލަވާލާފައިވާ އެންމެހާ އުސޫލުތަކާއި މިންގަނޑުތަކަށް ފެތޭގޮތަށް، ދަރިވަރުންގެ ރައްކާތެރިކަން ކަށަވަރުކުރުމަށްފަހު ކަމުގައި ދެންނެވީމެވެ،" އިއުލާނުގައި ބުންޏެވެ.

ކޮވިޑް-19 އިން ރައްކާތެރިވުމަށް މިދިޔަ މާޗު ހިސާބުގައި ޓިއުޝަން ސެންޓަރުތަކާއި ގުރުއާން ކްލާސްތައް ބަންދުކުރި ގޮތަށް އެ ތަންތަން ހުޅުވާފައި ނުވެ އެވެ. ނަމަވެސް ދޮޅު މަސް ދުވަހުގެ ބަންދަކަށް ފަހު މި މަހުގެ 10 ގައި ސްކޫލުތައް ހުޅުވާލުމާއެކު ބައެއް ގުރުއާން ކްލާސްތައް ވެސް ހުޅުވި އެވެ. ނަމަވެސް އެޗްޕީއޭއިން އެދުމާއެކު އެ ތަންތަން ބަންދުކުރީ އެވެ.

ކޮވިޑުން ސަލާމަތްވުމަށް މިދިޔަ މާޗު 12 ގައި ސްކޫލުތައް ބަންދުކުރި ގޮތަށް މާލެ ސަރަހައްދުގައި ގްރޭޑް ހަޔަކުން ފެށިގެން ދަށުގެ ގްރޭޑުތަކަށް ކިޔަވައިދީފައެއް ނުުވެ އެވެ. އެހެން ސަރަހައްދުތަކުގައި މިދިޔަ އަހަރުގެ ޖުލައި 1ގައި ސްކޫލުތައް ހުޅުވައި ޑިސެމްބަރު 3 ގައި ފުރަތަމަ ޓާމަށް ބަންދުވުމާ ހަމައަށް ގްރޭޑު 1-12 ގެ ދަރިވަރުންނަށް ކިޔަވައިދީފައި ވެ އެވެ. އެހެންވެ، މި މަހުގެ 10 ވަނަ ދުވަހަކީ މާލެ ސަރަހައްދުގައި ދަށު ގްރޭޑުތަކުގެ ދަރިވަރުންނާ ގާތްގަނޑަކަށް އަހަރެއް ފަހުން ބައްދަލުވި ފުރަތަމަ ދުވަހެވެ.