ސްކޫލް ބަންދުގައި އިތުރު ހަރަކާތްތައް ނުބާއްވަން އަނެއްކާވެސް އަންގައިފި

އަންނަ ހަފްތާގައި ފެށޭ ސްކޫލް ޓާމް ބަންދުގައި އިތުރު ހަރަކާތްތައް ނުބާއްވަން އެޑިޔުކޭޝަން މިނިސްޓްރީން ސްކޫލުތަކަށް އަނެއްކާވެސް އަންގައިފި އެވެ.

މިދިޔަ އޯގަސްޓުގައި ފެށުނު ދިރާސީ އާ އަހަރާ އެކު މިނިސްޓްރީން ވަނީ އެއްވެސް ޓާމް ބަންދެއްގައި ޓީޗަރުން ސްކޫލުތަކަށް ނެރުން ވެސް މަނާކޮށްފަ އެވެ. އަދި ބަންދުގައި އިތުރު ހަރަކާތްތަކަށް ދަރިވަރުން ނެރުން ވެސް އޮތީ މަނާކޮށްފަ އެވެ.

ނަމަވެސް ބައެއް ސްކޫލުތަކުން ޗުއްޓީއާ ދިމާކޮށް އިތުރު ހަރަކާތްތައް ހިންގާ ކަމުގެ ޝަކުވާ ބެލެނިވެރިން ކުރެ އެވެ.

އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު "މިހާރު" އަށް ވިދާޅުވީ ޗުއްޓީގައި ދަރިވަރުންނާއި ޓީޗަރުން ބައިވެރިވާ އެއްވެސް ކަމެއް ސްކޫލުތަކުގައި ބޭއްވުން ކުރިން ވެސް އޮތީ މަނާކޮށްފައި އޮތުމުން އެކަން މިއަދު އަލުން އަންގާފައިވާ ކަމަށެވެ.

އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ހުސެއިން ސައީދު މުހައްމަދު ވިދާޅުވީ މި އަންނަ ޗުއްޓީގައި ވެސް އެއްވެސް އިތުރު ހަރަކާތެއް ސްކޫލުގައި ދަރިވަރުން އަދި ޓީޗަރުން ބައިވެރިކޮށްގެން ބޭއްވުން މަނާވާނެ ކަމަށާއި އެފަދަ ކަމަކަށް އެއްވެސް ބަޔަކަށް ހުއްދަ ދީފައި ވެސް ނުވާނެ ކަމަށެވެ.

ނަމަވެސް އެސޯސިއޭޝަންތަކުން އަމިއްލައަށް ބާއްވާ ކޭމްޕްތަކާއި އިތުރު ހަރަކާތްތައް ބޭއްވޭނެ ކަމަށާއި އެކަން ވާން ޖެހޭނީ ސްކޫލުން ބޭރުގައި އަމިއްލައަށް ބައިވެރިވެގެން ހިންގާ ހަރަކާތްތަކަށް ކަމަށް ވެސް އޭނާ ވިދާޅުވި އެވެ.

ރާއްޖޭގެ ހުރިހާ ސްކޫލުތަކެއްގެ ދަރިވަރުންނަށާއި އެ ސްކޫލުތަކަށް ނިސްބްތަވާ ޓީޗަރުން މި އަންނަ ޗުއްޓީގެ އެއްވެސް ހަރަކާތެއްގައި ބައިވެރި ނުވުމަށް މިހާރު ސްކޫލުތަކަށް އަންގާފައިވާނެ ކަމަށް ވެސް ސައީދު ވިދާޅުވި އެވެ. އަދި ސްކޫލްގެ ނަމުގައި އެފަދަ އިތުރު ހަރަކާތްތަކުގައި ބައިވެރި ނުވާން އަންގާފައި ވާނެ ކަމަށް ވެސް އޭނާ ވިދާޅުވި އެވެ.

"ރާއްޖޭގެ އެއްވެސް ސްކޫލަކަށް ނޯންނާނެ އެއްވެސް ހަރަކާތެއް ހިންގުމަށް ހުއްދަ ދީފައެއް. ސްކޫލުތަކުގައި ނުބޭއްވޭނެ. މިނިސްޓްރީ އޮފް އެޑިޔުކޭޝަނުން ވެސް ނުރާވާނެ. އަދި ސްކޫލު ނަމުގައި ވެސް ބައިވެރި ނުވެވޭނެ. އަދި ސްކޫލުތަކުގެ ޓީޗަރުންނަށް ވެސް ސްކޫލު ނަމުގައި [މި ޗުއްޓީގައި] ބައިވެރި ނުވެވޭނެ،" އޭނާ ވިދާޅުވި އެވެ.

ޓީޗަރުންގެ "ވޯކް ލޯޑް" ކުޑަކުރުމަށް މިނިސްޓްރީން އަންނަނީ ގިނަ މަސައްކަތްތަކެއް ކުރަމުންނެވެ. ޓީޗަރުން ލައްވާ އިތުރަށް އަދި ރަސްމީ ގަޑީގެ އިތުރުން މަސައްކަތްތައް ނުކުރުވުމަށާއި ޓީޗަރުންނާއި ބެލެނިވެރިން މުއާމަލާތް ކުރަން ކްލާސްތަކުން ވަކިވަކި ވަައިބާ ގުރޫޕް ނުހެދުމަށް ވެސް ވަނީ އަންގައިފަ އެވެ.

ދެވަނަ ޓާމުގެ މިޑް ބްރޭކް ފެށޭނީ މި މަހު 22 ގަ އެވެ. ދެން ސްކޫލުތައް ހުޅުވާނީ އަންނަ މަހު 5 ގަ އެވެ.