ބިލްބާއޯ ތަށި އުފުލާލިއިރު މެސީ އަށް ރަތެއް

ސެވިލް (ޖެނުއަރީ 18) - ސްޕެނިޝް ސުޕަ ކަޕް ފައިނަލުގައި ރޭ 3-2 އިން ބާސެލޯނާ ބަލިކޮށް އެތުލެޓިކް ބިލްބާއޯ އިން މުބާރާތުގެ ތަށި އުފުލާލިއިރު، ބާސެލޯނާގެ ކެޕްޓަން ލިއޮނަލް މެސީ އަށް ރަތް ކާޑެއް ދައްކައިފި އެވެ.

މިއީ ބާސެލޯނާގެ މެޗެއްގައި މެސީ އަށް ރަތް ކާޑެއް ދެއްކި ފުރަތަމަ ފަހަރެވެ. އިތުރު ވަގުތުގެ ދެ ވަނަ ހާފުގެ ފަހު ކޮޅުގައި މެސީ އަށް ރަތް ކާޑު ދެއްކީ ބޯޅަ ނެތިސް ބިލްބާއޯގެ އަސެއާ ވިޔަލިބްރޭ އަށް އަތުން ހަމަލާދިނުމުންނެވެ. ރެފްރީ އަށް އެ މަންޒަރު ނުފެނުނު ނަމަވެސް މެސީ އަށް ރަތް ކާޑު ދައްކަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ.

ރޭގެ މެޗު ފަށައިގެން 40 ވަނަ މިނިޓްގައި އެންޓޮއިން ގްރީޒްމަން ބާސެލޯނާ އަށް ލީޑުނަގައިދިނެވެ. އެކަމަކު އެ ޓީމަށް ލީޑުގައި ހިފަހައްޓައިލެވުނީ އެންމެ ދެ މިނިޓް އެވެ. މެޗުގެ 42 ވަނަ މިނިޓްގައި އިނާކީ ވިލިއަމްސް ދިން ބޯޅައަކުން އޮސްކާ ޑެ މާކޯސް ވަނީ ބިލްބާއޯ އަށް އެއްވަރުކޮށްދީފަ އެވެ. ބާސެލޯނާ އިން ދެ ވަނަ ފަހަރަށް ލީޑުނެގީ 77 ވަނަ މިނިޓްގައި ގްރީޒްމަން ވައްދާލި ގޯލުންނެވެ. މިއީ ޖޯޑީ އަލްބާ ތަނަވަސްކޮށްދިން ފުރުސަތަކުން ގްރީޒްމަން ޖެހި ގޯލެކެވެ.

ބިލްބާއޯ އިން ބާސެލޯނާގެ ފަހަތަށް ޕްރެޝަރު ބޮޑުކޮށް ގިނަ ވަގުތު ކުޅެ ދެ ވަނަ ފަހަރަށް ނަތީޖާ ހަަމަހަމަކުރީ މެޗުގެ ފުރިހަމަ ވަގުތު ހަމަވެގެން ދެއްކި އިތުރުވަގުތުގައި ވިޔަލިބްރޭ ޖެހި ގޯލުންނެވެ. އެ ގޯލު ޖަހަން ފުރުސަތު ތަނަވަސްކޮށްދިނީ އިކާ މުނިއަައިން އެވެ. އިތުރު ވަގުތުގެ ފުރަތަމަ ހާފުގެ ކުރީކޮޅުގައި ބިލްބާއޯ އަށް މެޗުގައި ފުރަތަމަ ފަހަރަށް ލީޑުނަގައިދިން ގޯލު ޖެހީ އެ ޓީމަށް މޮޅުކުޅުމެއް ދައްކަމުން އަންނަ ވިލިއަމްސް އެވެ.

ބާސެލޯނާ އިން ނަތީޖާ ހަމަހަމަކުރަން ކުރަމުން އައި މަސައްކަތް ނާކާމިޔާބުވި އެންމެ ބޮޑު ސަބަބަކީ މެސީ އަށް ރަތް ކާޑު ދެއްކުމެވެ. މެސީގެ ކެރިއަރުގައި ރޭގެ މެޗުގެ ކުރިން ދެއްކި ދެ ރަތް ކާޑު ވެސް ފެނުނީ އޭނާ އާޖެންޓީނާ އަށް ކުޅެނިކޮށެވެ. ބާސެލޯނާ އަށް ކުޅުނު 753 މެޗުގައި މެސީ އަށް ދެއްކީ އެންމެ ރަތް ކާޑެކެވެ.

މެޗަށް ފަހު ބާސެލޯނާގެ ކޯޗު ރޮނާލްޑް ކޫމަން ބުނީ މެޗުގައި މެސީ ކުޅުނީ ފިޓްކަމަށް އޭނާ ވެސް ނިންމުމުން ކަމަށާއި ފެނިގެންދިޔަ ރަތް ކާޑާ މެދު ބުނާނެ އެއްޗެއް ނެތް ކަމަށެވެ.

ބިލްބާއޯ އިން ފައިނަލުގެ ފުރުސަތު ހޯދީ ސެމީގައި އެންމެ ފަހުގެ ޗެމްޕިއަން ރެއާލް މެޑްރިޑް ބަލިކުރުމަށް ފަހު އެވެ. ފައިނަލުގައި ބާސެލޯނާގެ މައްޗަށް ކުރިހޯދައި ބިލްބާއޯ އިން ސުޕަ ކަޕްގެ ޗެމްޕިއަންކަން ހޯދިއިރު، މިއީ 1985 ގެ ފަހުން އެ ޓީމަށް ލިބުނު ފުރަތަމަ ތަށްޓެވެ.