ކޮވިޑުން އަރައިގަންނަން އީޔޫ-ޑަބްލިއުއެޗުއޯ އިން 19 މިލިއަން ރުފިޔާ ދީފި

ކޮވިޑް-19 އާ ގުޅިގެން ރާއްޖެ އަށް ލިބިފައިވާ ގެއްލުންތަކުން އަރައިގަތުމަށާއި އިމަޖެންސީތަކަށް މިހާރަށް ވުރެ ރަނގަޅަށް ތައްޔާރުވުމަށްޓަކައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އާއި ޔޫރަޕިއަން ޔޫނިއަން (އީޔޫ) ގުޅިގެން 19 މިލިއަން ރުފިޔާ އިއްޔެ ހަދިޔާ ކޮށްފި އެވެ.

މި އެހީ ބޭނުން ކުރާނީ ކޮވިޑް ޖެހޭ މީހުން ބެލެހެއްޓުމުގެ ކަންތައްތައް މިހާރަށް ވުރެ ހަރުދަނާ ކުރަން ކަމަށް އީޔޫ އިން ކުރި ޓުވީޓެއްގައި ވެ އެވެ. ދެ ޖަމިއްޔާ ގުޅިގެން ދޭ މި އެހީގެ ދަށުން، އައިސީޔޫގައި ބައިތިއްބައިގެން ދޭ ފަރުވާގެ ފެންވަރު ރަނގަޅު ކުރަން އިސްކަމެއް ދޭނެ ކަމަށް ޑަބްލިއުއެޗްއޯ އިން ބުންޏެވެ. އޭގެ ތެރޭގައި އިތުރު ރީޖަނަލް އައިސީޔޫއެއް ގާއިމް ކުރުން ހިމެނެ އެވެ.

ހުޅުމާލެ އައިސޮލޭޝަން ފެސިލިޓީ އާއި އެހެން ރީޖަނަލް އައިސީޔޫތަކަށް ބޭނުންވާ ބޭހާއި އިތުރު މެޑިކަލް ސަޕްލައި ފޯރުކޮށްދޭނެ ކަމަށް ވެސް ޑަބްލިއުއެޗުއޯ އިން ބުންޏެވެ.

އީޔޫ އިން ރާއްޖެ އާއި ސްރީލަންކާ އަށް ކަނޑައަޅާފައިވާ އެކްޓިން އެމްބެސެޑަރު އެޗްއީ ޑެނިސް ޗައިބީ ވިދާޅުވީ ރާއްޖެ އަށް މާލީ އެހީ ދިނުމަކީ މި ބަލިމަޑުކަމުން އަރައިގަންނަން އެކި ގައުމުތަކަށް އީޔޫ އިން ވަމުން އަންނަ އެހީތަކުގެ ތެރޭގައި ހިމެނޭ ކަމެއް ކަމަށެވެ.

"ރާއްޖެ ފަދަ ޓޫރިޒަމަށް ބަރޯސާ ވެފައިވާ ގައުމަކަށް އެހީވުމުން، ދިވެހިންގެ އިތުރުން މި ގައުމަށް ދަތުރުކުރާ އީޔޫ އާއި އެހެން ގައުމުތަކުގެ ޓޫރިސްޓުންނަށް ވެސް ރާއްޖޭގެ ސިއްހީ ނިޒާމު ހަރުދަނާވުމުން ފައިދާ ވާނެ،" އޭނާ ވިދާޅުވި އެވެ.

އީޔޫ އާއި ޑަބްލިއުއެޗްއޯ އިން ރާއްޖެ އަށް ވަމުން އަންނަ އެހީތެރިކަމަށް ހެލްތު މިނިސްޓަރު އަހުމަދު ނަސީމް ވެސް ޝުކުރު އަދާކުރެއްވި އެވެ.