ގަތަރާއި ސައުދީ ސުލްހަވެ ބޯޑަރު ހުޅުވާލައިފި

ކުވޭތު ސިޓީ (ޖެނުއަރީ 5) - ގަތަރާއި ސައުދީ އަރަބިއާއާ ދެމެދު ޖެހިފައިވާ މައްސަލަތައް އެއްފަރާތްކޮށް، ދެ ގައުމު އެއްގަލަކަށް އަރައި އެއްގަމު މަގުން ބޯޑަރު ހުޅުވާލާފައިވާ ކަމަށް ކުވޭތުވެ ފޮރިން މިނިސްޓަރު ވިދާޅުވެއްޖެ އެވެ.

ސައުދީގެ ވައިގެ ސަރަހައްދު ވެސް ގަތަރުގެ ބޯޓުތަކަށް ވަރަށް އަވަހަށް ހުޅުވާލާނެ ކަމަށާ އަދި ކަނޑުމަގުން ވެސް ގަތަރުގެ ބޯޓު ފަހަރަށް ސައުދީ އަށް ދަތުރު ކުރެވޭ ގޮތް ހަދާނެ ކަމަށް ވެސް ކުވޭތުގެ ފޮރިން މިނިސްޓަރު އަހުމަދު ނަސީރު އަލް ސަބާހު ވިދާޅުވި އެވެ.

ސައުދީގެ ވައިގެ ސަރަހައްދު ގަތަރުގެ ބޯޓުތަކަށް ބޭނުން ނުކުރެވޭތީ ސައުދީ ހުރަސްކޮށް ދަތުރު ކުރުމަށް އީރާނުގެ ވައިގެ ސަރަހައްދު ބޭނުން ކުރަން ޖެހުމުން ގަތަރުން ވަނީ އަހަރަކު އިތުރަށް 100 މިލިއަން ޑޮލަރު ހޭދަކުރަން ޖެހިފައި ކަމަށް އީރާނުގެ މީޑިއާތަކުން ބުނެފައިވެ އެވެ.

ސައުދީން ގަތަރަށް ދަތިކުރުމުގެ ފިޔަވަޅު އެޅިތާ ތިން އަހަރާއި ބައިގެ ފަހުން ފިޔަވަޅުތައް އުވާލަން ނިންމީ ގަލްފް ކޯޕަރޭޝަން ކައުންސިލް (ޖީސީސީ) ގެ ބައްދަލުވުމެއް ސައުދީގައި މިއަދު ބޭއްވުމަށް ތައްޔާރުވެފައި ވަނިކޮށެވެ. ޖީސީސީގެ ބައްދަލުވުމުގައި ގަތަރުގެ އަމީރު ޝެއިޚް ތަމީމް ބިން ހަމަދު އަލް ސާނީ ބައިވެރިވެވަޑައިގަންނަވާނެ އެވެ. ވޭތުވެދިޔަ ތިން އަހަރު ބޭއްވި ޖީސީސީ ސަމިޓުގައި ގަތަރުގެ އަމީރު ބައިވެރިވެވަޑައިގެންފައެއް ނުވެ އެވެ. އެމެރިކާގެ ސީނިއާ އޮފިޝަލަކު ވިދާޅުވެފައި ވަނީ ޖީސީސީގެ ބައްދަލުވުމުގައި ގަތަރާއި ސައުދީއާ ދެމެދު އެއްބަސްވުމެއްގައި ސޮއިކުރާނެ ކަމަށެވެ.

ޖޫން 2017 ގައި ސައުދީން ގަތަރާ ގުޅުން ކަނޑާލުމާ އެކު ޔުނައިޓެޑް އަރަބް އެމިރޭޓްސް، ބަހުރޭން އަދި މިސްރުން ވެސް ވަނީ ގަތަރާ ސިޔާސީ ގުޅުން ކަނޑާލައި، ވިޔަފާރީގެ ދަތިކުރުމުގެ ފިޔަވަޅުތައް އަޅައިފަ އެވެ. އެ ފިޔަވަޅުތައް އުވާލުމަށް 13 ކަމަކަށް ޑިމާންޑްކޮށްފައިވެ އެވެ. އޭގެ ތެރޭގައި އަލް ޖަޒީރާ ޓީވީ ހުއްޓާލުން ހިމެނެ އެވެ. ނަމަވެސް އެއިން އެއްވެސް ކަމަކަށް ގަތަރުން ތަބާވެފައެއް ނުވެ އެވެ.

ސައުދީން ބުނަމުން ދަނީ ގަތަރުން ޓެރަރިޒަމަށް ވާގިވެރިވާ ކަމަށެވެ. ނަމަވެސ ސައުދީގެ ތުހުމަތު ގަތަރުން ދޮގު ކުރެ އެވެ.

ޖީސީސީގައި ހިމެނެނީ ސައުދީ އަރަބިއާ، ޔޫއޭއީ، ބަހުރޭން، ކުވޭތު، އޮމާން އަދި ގަތަރެވެ.