އަލިފާނުގެ ހާދިސާގައި ފިހުނު އެކަކަށް އައިސީޔޫގައި ފަރުވާދެނީ

ތިލަފުށި ފަޅުތެރޭގައި އޮތް ދެ ދޯންޏެއްގައި ރޯވެ އިއްޔެ ހިނގި އަލިފާނުގެ ހާދިސާގައި ފިހުނު އެކަކަށް ފަރުވާދެމުން އަންނަނީ އައިސީޔޫގައި ކަމަށް އައިޖީއެމްއެޗުން މިއަދު ބުނެފި އެވެ.

ކައިރިކައިރީގައި އޮތް ދެ ދޯނީގެ ތެރެއިން އެއް ދޯންޏަކަށް ތެޔޮ އަޅަނިކޮށް ހިނގި ހާދިސާގައި ފިހުނީ ދިވެއްސަކާއި ބިދޭސީއެކެވެ.

އައިޖީއެމްއެޗުގެ މީޑިއާ އޮފިޝަލް ހައްވާ އަފީފާ "މިހާރު" އަށް ވިދާޅުވީ ފިހުނު ދެ މީހުންގެ ތެރެއިން އައިސީޔޫގައި ފަރުވާދެމުން އަންނަނީ ދިވެހި މީހާއަށެވެ.

"އޭނާގެ ހަށިގަނޑުން 20 ޕަސެންޓު ފިހިފައި ހުރި،" އަފީފާ ވިދާޅުވި އެވެ.

ބިދޭސީ މީހާއަށް މާ ބޮޑު އަނިޔާއެއް ނުވެ އެވެ. އެހެންވެ ފަރުވާ ދިނުމަށް ފަހު އޭނާ ދޫކޮށްލީ އެވެ.

ދެ ދޯނީގައި ރޯވި އަލިފާންގަނޑު ގާތްގަނޑަކަށް ގަޑިއެއްހާ އިރުގެ ތެރޭގައި ވަނީ ނިއްވާލައިފަ އެވެ. ދެ ދޯންޏަށް ވެސް ވަނީ ގެއްލުންތަކެއް ލިބިފަ އެވެ.