ފަރުވާ ނުފެށި އެތައް ބަޔަކު ތިބި އިރު ހިންމަފުށީ ރިހެބް "ހުހަށް"

މަސްތުވާތަކެތި ބޭނުންކުރާ މީހުންނަށް ފަރުވާ ނުލިބި އެތައް ދުވަހެއް ވަންދެން ތިބެން ޖެހުނަސް، އެންމެ ގިނަ މީހުން ފަރުވާ އަށް ދާން ހުކުމްކޮށްފައިވާ ކ. ހިންމަފުށީގައި ހުންނަ ރިހެބިލިޓޭޝަން ސެންޓަރުން ފަރުވާ ދެމުން އަންނަނީ އެންމެ 97 މީހުންނަށް ކަމަށް، ނޭޝަނަލް ޑްރަގް އެޖެންސީ (އެންޑީއޭ) ގެ ހިސާބުތަކުން ހާމަވެއްޖެ އެވެ.

އެ އެޖެންސީން "މިހާރު" އާ ހިއްސާކުރި މައުލޫމާތުތަކަށް ބަލާއިރު ހިންމަފުށީގައި ހިންގާ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުގެ ޖާގައަކީ 172 އެވެ. ނަމަވެސް، ފަރުވާ އަށް ހުކުމް ކޮށްފައިވާ އެތައް ބަޔަކު ތިބި އިރު ވެސް އެ ޖާގައަށްވާ ވަރަށް މީހުން އެތަނަކަށް ނުގެންދެ އެވެ.

ހިންމަފުށީ ސެންޓަރަކީ، ރާއްޖޭގައި މި ވަގުތު ރެސިޑެންޝަލް ފަރުވާދޭ ހަމައެކަނި ސެންޓަރެވެ. ރާއްޖޭގެ އެކި ހިސާބުތަކުގައި ދެން ގާއިމްކޮށްފައިވަނީ ޑިޓޮކްސިފިކޭޝަން ސެންޓަރުތަކެވެ.

ޑްރަގް ކޯޓުން ބުނިި ގޮތުގައި މި އަހަރުގެ ޖެނުއަރީން ފެށިގެން މިދިޔަ މަހުގެ ނިޔަލަށް ރިހެބިލިޓޭޝަން ފަރުވާ ހޯދުމަށް 333 މީހެއްގެ މައްޗަށް އަމުރު ނެރެފައިވެ އެވެ. މަސްތުވާތަކެއްޗާ ބެހޭ ގާނޫނު ބުނާގޮތުން، ފަރުވާ ހޯދަން އަމުރު ނެރޭ ހިސާބުން އެ އަމުރެއް ހިނގަން ފަށާނެ އެވެ. ނަމަވެސް ޖާގައިގެ އިތުރުން ތަފާތު އެކި ސަބަބުތަކާ ހުރެ ފަރުވާ ނުފެށި މި ވަގުތު ވެސް 617 މީހުން ވެއިޓިން ލިސްޓުގައި އެބަ ތިއްބެވެ. އެހެންވެ ޑްރަގް ކޯޓުން މިދިޔަ މަހާ ހަމައަށް އަމުރު ނެރުނު އެންމެންނަކީ ފަރުވާގައި ތިބި މީހުންނެއް ނޫނެވެ.

ހިންމަފުށީގައި ހުންނަ، އަންހެނުންގެ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުން މި ވަގުތު ހަ މީހަކަށް ފަރުވާ ދެ އެވެ. ނަމަވެސް އެ ތަނުގެ ކެޕޭސިޓީއަކީ 12 އެވެ. ހަމަ އެ ރަށުގައި ހުންނަ ސެންޓްރަލް ޑިޓޮކްސިފިކޭޝަން ސެންޓަރުގެ ކެފޭސިޓީއަކީ 10 އެވެ. އެކަމަކު އެ ތަނުގައި މި ވަގުތު ތިބީ އެންމެ ދެ މީހުންނެވެ.

މާލޭގައި ހުންނަ ކޮމިއުނިޓީ ސާވިސް ސެންޓަރުގެ ކެޕޭސިޓީ އަކީ 285 އެވެ. ފަރުވާގައި ތިބީ 632 މީހުންނެވެ. އެންޑީއޭ އިން ބުނީ 632 މީހުންގެ ތެރެއިން މި ވަގުތު ފަރުވާގައި ތިބީ 253 މީހުން ކަމަށެވެ. ބާކީ ތިބީ، އެންޑީއޭގެ ފަރުވާ ނިންމާފައި އަދި ފަރުވާއަށް ވަކިކޮށްފައި ތިބި މީހުންނެވެ. އެ ލިސްޓުގައި ހިމަނާފައިވަނީ އެ މީހުންނާ މެދު ޑްރަގް ކޯޓުން ގޮތެއް ނުނިމޭތީ އެވެ.

ހާފްވޭ ހައުސްގައި 49 މީހަކަށް ކޮމިއުނިޓީ ފަރުވާދޭއިރު އެ ފަރުވާއަށް ކަނޑައަޅާފައިވަނީ ޖާގައަކީ 40 އެވެ. ސެމީ ރެސިޑެންޝަލް ފަރުވާއަށް 10 ޖާގަ ކަނޑައަޅާފައިވެ ވެ އެވެ. ނަމަވެސް މި ވަގުތު އެ ޕްރޮގްރާމް ވަނީ މެދުކަނޑާލައިފަ އެވެ.

ސެންޓަރުތަކުގައި ޖާގަ ހުރެފައި، ފަރުވާ ނުފެށި އެތައް ބަޔަކު ތިބީ ކީއްވެގެންތޯ ސުވާލުކުރުމުން އެ އެޖެންސީގެ އޮފިޝަލަކު ވިދާޅުވީ ކޮވިޑް-19 ގެ ހާލަތަށް ރިއާޔަތްކުރުމަށް ފަހު ރިހެބިލިޓޭޝަން ސެންޓަރަށް ފަރުވާ ހޯދަން ގެންދަނީ ފަހަރަކު 10 މީހުންގެ ބެޗެއް ކަމަށެވެ. ކަރަންޓީނުގެ މުއްދަތު ފުރިހަމަކުރުމަށް ފަހު އަނެއްކާ ވެސް އާ ބެޗެއް ފަރުވާއަށް ގެންދާ ކަމަށް ވިދާޅުވި އެވެ.

ހިންމަފުށީ ރިހެބިލިޓޭޝަން ސެންޓަރަށް ގެންދާ މީހުން ކަރަންޓީނުވުމަށް އެ ސެންޓަރުގެ ވަކި ބައެއް ވަނީ ހާއްސަކޮށްފަ އެވެ.

އޮފިޝަލް ވިދާޅުވީ ފަރުވާ ހޯދަން މި ހާލަތުގެ ސަބަބުން ބައެއް މީހުން މާލެ އަންނަން ބޭނުން ނުވާ ކަމަށެވެ. ފަރުވާ ފެށުމަށް އެ މީހުންގެ ފަރާތުން އެއްބާރުން ވެސް ނުލިބޭ ކަމަށާއި އޭގެ ތެރެއިން ބައެއް މީހުން ފަރުވާއަށް ދާން ބޭނުން ނުވާ ކަމަށް ވެސް ވިދާޅުވި އެވެ.

"ޖާގަ ހުރެގެން އެ ކުދިންނަށް ގުޅާފައި ބުނީމަ ވެސް އެއްބާރުލުމެއް ނުދޭ،" އޮފިޝަލް ވިދާޅުވި އެވެ.

އޭނާ ވިދާޅުވީ ގަދަބާރުން ފަރުވާއަށް ފޮނުވުމަކީ އެންޑީއޭއިން ކުރާނެ ކަމެއް ނޫނެވެ. އެގޮތަށް ފަރުވާއަށް އެއްބާރުލުން ނުދޭ މީހުންގެ މައުލޫމާތު ޑްރަގް ކޯޓަށް ފޮނުވާ ކަމަށް ވިދާޅުވި އެވެ.