ކޮވިޑް ތެރޭ ކޮރަޕްޝަން ހިންގި ކަމުގެ 34 ޝަކުވާ، އޭސީސީގެ ވަރުގަދަ އިންޒާރެއް!

ކޮވިޑް-19ގެ ބަލިމަޑުކަމުން ރައްޔިތުންގެ ފުރާނަ ސަލާމަތްކޮށް ރައްކާތެރިކޮށްދޭން ދައުލަތުގެ އެކި މުއައްސަސާތަކުން ދިން ޚިދުމަތާއި ތަކެތި ހޯދުމުގައި ކޮރަޕްޝަނަށް މަގުފަހިވާ ގޮތަށް އަމަލުކޮށްފައިވާ ކަމަށް ތުހުމަތުކޮށް 34 ޝަކުވާއެއް ހުށަހެޅި ކަމަށް އެންޓި ކޮރަޕްޝަން ކޮމިޝަން (އޭސީސީ)އިން މިއަދު ބުނެފި އެވެ.

ޒިންމާދާރު މަގާމުތަކުގައި ތިބެ ކޮރަޕްޝަންގެ އަމަލުތައް ހިންގާ ނަމަ ތަހުގީގުކޮށް، މަގާމަށް ނުވަތަ ނިސްބަތްވާ ސިޔާސީ ފިކުރަށް ބެލުމެއް ނެތި ރައްޔިތުންގެ ކުރިމަތީގައި ޖަވާބުދާރީކުރުވާނެ ކަމަށް ވެސް ބުނެފައިވެ އެވެ.

އެންޓި ކޮރަޕްޝަން ދުވަހުގެ މުނާސަބަތުގައި، ކޮރަޕްޝަނުން ދުރުވެ ތިބުމުގެ މުހިއްމުކަން ފާހަގަކުރައްވައި އޭސީސީގެ ރައީސް މަރިޔަމް ޝިއުނާ ނެރުއްވި ބަޔާނުގައި ބަލިމަޑުކަމުގެ ދުވަސްވަރު ވެސް ކޮރަޕްޝަން ހިންގާ މީހުންގެ މަސައްކަތަށް ހުއްޓުމެއް ނެތް ކަމުގެ ކަންބޮޑުވުންފާޅުކުރައްވާފައިވެ އެވެ.

ސިއްހީ ބޮޑު ބަލިމަޑުކަމެއްގެ ތެރެއިން ރައްޔިތުންގެ ފުރާނަ ސަލާމަތްކުރުމުގެ މަސައްކަތުގައި، ޒިންމާދާރު މަގާމުތަކުގައި ތިއްބަވާ ފަރާތްތަކުގެ ވިސްނުމަކީ އެފަދަ ހާލަތެއްގެ ނާޖާއިޒު ފައިދާ ނަގައި ނުހައްގު މުއްސަނދިކަމެއް ހޯދުން ކަމަށް ދެކޭ ނަމަ ރައްޔިތުންނަށް ޖަވާބުދާރީވާން ޖެހޭ ކަން ހަނދާންކުރަން ޖެހޭ ކަމަށް ވިދާޅުވި އެވެ.

"އޭސީސީގެ އަމާޒަކީ ރައްޔިތުންގެ ފައިސާއިން ނަޖާއިޒު މަންފާ ހޯދާ ފަރާތްތަކާ މެދު މަގާމަށް ނުވަތަ ނިސްބަތްވާ ޕާޓީއަށް ބެލުމެއް ނެތި ރައްޔިތުންގެ ކުރިމަތީގައި ޖަވާބުދާރީ ކުރުވައި ގާނޫނީ އޮނިގަނޑުގެ ތެރެއިން ފިޔަވަޅު އެޅުމެވެ،" ޝިއުނާ ވިދާޅުވި އެވެ.

އޭނާ ވިދާޅުވި ގޮތުގައި މިކަންކަން މިގޮތަށް ކުރިއަށް ގެންދިއުމުގައި ހިތްވަރު ލިބޭނީ ރައްޔިތުންގެ ފަރާތުން ލިބިގެންދާ އެހީތެރިކަމާއި އެއްބާރުލުމާ އެކުގައި އެވެ.

ކޮވިޑުގެ ޚަރަދުތަކާ ގުޅޭ ގޮތުން ގިނަ ޝަކުވާތަކެއް ހުށަހެޅި ކަން އޭސީސީން އާއްމުކޮށްފައިވާއިރު ކޮވިޑް-19ގެ ފަރުވާއަށް ވެންޓިލޭޓަރުތައް ހޯދުމުގައި ކޮރަޕްޝަނަށް މަގުފަހިވާ ގޮތަށް އަމަލުކޮށްފައިވާ މައްސަލަ ތަހުގީގުކޮށް ދައުވާކޮށްދޭން ޕްރޮސިކިއުޓަ ޖެނެރަލްގެ އޮފީހަށް ހުށަހެޅި އެވެ. އެކަމަކު ހުށަހަޅާފައިވާ މައުލޫމާތުތަކުގައި ދައުވާ ކުރެވޭނެ އެކަށީގެންވާ ހެކި ނެތް ކަމަށް ބުނެ ޕީޖީން ދައުވާމުކުރަން ނިންމެވުމުން އޭސީސީން ވަނީ މައްސަލަ މުރާޖައާކޮށްދޭން އެދިފަ އެވެ.

އެކަން ކުރަމުން އަންނަ ކަމަށް ޕީޖީ އޮފީހުން ވަނީ ބުނެފަ އެވެ.