ތިން ދުވަހުން ހަތް ބައްރަށް ދަތުރުކޮށްގެން ޔޫއޭއީގެ އަންހެނަކަށް ރެކޯޑެއް

އެންމެ ތިން ދުވަހުގެ ތެރޭގައި ދުނިޔޭގެ ހަތް ބައްރުގެ 208 ގައުމަކަށް ދަތުރުކޮށްގެން ޔުނައިޓެޑް އަރަބް އެމިރޭޓްސް (ޔޫއޭއީ) ގެ ޒުވާން އަންހެން ޑޮކްޓަރަކު ދުނިޔޭގެ ރެކޯޑް ފޮތުން ޖާގަ ހޯދައިފި އެވެ.

މި ރެކޯޑް ޑރ. ޚަވްލާ އަލް ރޮމައިތީ ހެދީ ދުނިޔެ މިހާރު ތަޖުރިބާކުރަމުންދާ ކޮވިޑް-19 ގެ ބަލިމަޑުކަމުގެ މުސީބާތުގެ ތެރެއަށް ވެއްޓުމުގެ ކުރިންނެވެ. އެގޮތުން ޔޫއޭއީ އިން ފެށި ދަތުރު އޭނާ ނިންމައިލީ ފެބްރުއަރީ 13 ގައި އޮސްޓްރޭލިއާގެ ސިޑްނީންނެވެ. އެ ދަތުރު ނިންމައިލި އިރު ރޮމައިތީ ހަތް ބައްރަށް ދަތުރުކުރަން ނެގީ ތިން ދުވަހާއި 14 ގަޑިއިރާއި 46 މިނިޓް، 48 ސިކުންތެވެ.

މި ރެކޯޑާ ބެހޭ ގޮތުން ރޮމައިތީ ވިދާޅުވީ ރެކޯޑް މުއްދަތެއްގެ ތެރޭގައި ހަތް ބައްރަށް ދަތުރުކުރަން ނިންމި ސަބަބަކީ ޔޫއޭއީ އަކީ އެކި ގައުމަތަކަށް ނިސްބަތްވާ މީހުންގެ މަސްހުނި އާބާދީއެއް އޮތް ތަނަކަށް ވުމުން އެ މީސްމީހުން ނިސްބަތްވާ ތަންތަން ތަޖުރިބާކޮށްލުމުގެ ބޭނުމުގައި ކަމަށެވެ.

"ޔޫއޭއީގައި އެބައުޅޭ ދުއިސައްތަ ވަރަކަށް ގައުމަށް ނިސްބަތްވާ މީހުން. އެހެންވެ ބޭނުންވީ އެ މީހުންގެ ގައުމުތަކަށް ޒިޔާރަތްކޮށް އެ މީހުންގެ ސަގާފަތާއި އާދަކާދަތައް ވެސް ބަލައިލުން،" ރޮމައިތީ ވިދާޅުވި އެވެ.

އޭނާ ވިދާޅުވީ ރެކޯޑް ހޯދަން ކުރި މަސައްކަތްތަކަކީ އެއްގޮތަކަށް ވެސް ފަސޭހަ ކަމެއް ނޫން ކަމަށެވެ. އެގޮތުން އެއްގަމާއި ވައިގެ މަގުން ގިނަ ދަތުރުތައް ކުރި ނަމަވެސް ވަރަށް ގިނަ ގޮންޖެހުންތަކާ ކުރިމަތިވި ކަމަށް ވިދާޅުވި އެވެ.

"އެތައް ފަހަރަކު ހުއްޓާލަން ވެސް އުޅުނިން. އެކަމަކު މިކަން ކާމިޔާބުވުމުގެ އެންމެ ބޮޑު ސިއްރަކީ އާއިލާގެ މީހުންނާއި ގާތް ރައްޓެހިން ދެމުން ދިޔަ ހިތްވަރު،" ރޮމައިތީ ވިދާޅުވި އެވެ. "މި ކާމިޔާބީގެ ކްރެޑިޓް އަސްލު ހައްގުވާ ބަޔަކީ އެއީ."

އޭނާ ވިދާޅުވި ގޮތުގައި ދުނިޔޭގެ ރެކޯޑް ފޮތުން ޖާގައެއް ލިބުމަކީ ވަރަށް ބޮޑު ޝަރަފެކެވެ. އަދި އޭނާގެ ރެކޯޑަކީ ގައުމަށް ވެސް ހޯދައިދިން ފަހުރެއް ކަމަށް ވިދާޅުވި އެވެ.

އޭނާ ވިދާޅުވީ މި ރެކޯޑަކީ އެތައް ބަޔަކަށް ހިތްވަރަކަށް ވާނެ ކަމަށް ގަބޫލުކުރާ ކަމަށެވެ.

ރޮމައިތީގެ ކުރިން އެންމެ ކުރު މުއްދަތެއްގެ ތެރޭގައި ހަތް ބައްރަށް ދަތުރުކުރުމުގެ ރެކޯޑް ކުރިން އޮތީ އެމެރިކާ ދެ މީހެއްގެ އަތުގަ އެވެ. އެއީ ކޭޒީ ސްޓިއުވާޓާއި ޖޫލީ ބެރީ އެވެ. އެ މީހުން ރެކޯޑް ހެދީ ތިން ދުވަހާއި 20 ގަޑިއިރާއި ހަތަރު މިނިޓާއި 19 ސިކުންތުން ދަތުރުކޮށްގެންނެވެ.