ޓްރަމްޕުގެ ނާކާމިޔާބީން ޓިކްޓޮކަށް ހަމަނޭވާ ލެވިއްޖެ

ގައުމީ ސަލާމަތަށް ނުރައްކާތެރި އެޕެއް ކަމަށް ބުނެ ޑޮނަލްޑް ޓްރަމްޕްގެ ސަރުކާރުން އެމެރިކާގައި ޓިކްޓޮކް މަނާކުރަން ކުރި މަސައްކަތް އެ ގައުމުގެ ކޮމާސް ޑިޕާޓަމަންޓް ހުއްޓުވައިފި އެވެ.

މިގޮތަށް ނިންމީ ޓިކްޓޮކް އެމެރިކާގެ ކުންފުންޏަކަށް ވިއްކައި ނުލާ ނަމަ އެ އެޕް މަނާކުރާނެ ކަމަށް ބުނެ ދިން ސުންގަޑި މި މަހުގެ 12 އަށް ހަމަވުމުންނެވެ. ޓްރަމްޕްގެ ސަރުކާރުން ޓިކްޓޮކަށް އަޅަން ރޭވި ފިޔަވަޅު އެންމެ ފަހު ވަގުތު ކޮމާސް ޑިޕާޓްމަންޓުން ހުއްޓުވައިލި އިރު، ކުރިއެކޭ އެއްގޮތަށް ދެން އެމެރިކާގައި ޓިކްޓޮކް ޑައުންލޯޑްކޮށް، ބޭނުންކުރެވޭނެ އެވެ. ޓިކްޓޮކް މަނާކުރަން ސަރުކާރުން ކޯޓަށް ހުށަހެޅި މައްސަލަ ވެސް އޮތީ އިންތިހާބުގެ ފަހުން ނޫނީ ގޮތެއް ނުނިންމަން ބާއްވައިފަ އެވެ.

ޓްރަމްޕް ޓިކްޓޮކަށް ޖެއްސި ތުރާތަކަށް ނިމުމެއް އައިސްފައި މި ވަނީ މި މަހުގެ 3 ގައި ބޭއްވި ރިއާސީ އިންތިހާބުގައި ރައީސްކަމުގެ ދެވަނަ ދައުރަކަށް ވާދަކުރައްވައި ބަލިވެވަޑައިގެންފައި ވަނިކޮށެވެ. އެކަމަކު ޓްރަމްޕް ގެންދަވަނީ ބަލި ގަބޫލުކުރައްވަން ދެކޮޅު ހައްދަވަމުންނެވެ.

ޓިކްޓޮކް އެމެރިކާގައި ހިންގަން ބޭނުންވާ ނަމަ އޮތް ގޮތަކީ އެ ގައުމު ހިއްސާވާ ގޮތަށް ޓިކްޓޮކް އެމެރިކާގައި އޮޕަރޭޓްކުރުން ކަމަށް ބުނެ، ދިން އިންޒާރުތަކާ އެކު ބައިޓްޑާންސުން ވަނީ އެމެރިކާގެ ދެ ކުންފުންޏަކާ އެކު ޕާޓްނަޝިޕް ވެސް މިދިޔަ ސެޕްޓެމްބަރު މަހު ހަދައިފަ އެވެ. އެ ދެ ކުންފުންޏަކީ އޮރޭކަލް ކޯޕަރޭޝަނާއި ވޮލްމާޓެވެ.

ޓްރަމްޕްގެ ސަރުކާރުން ތުހުމަތުކޮށްފައިވާ ގޮތުގައި ޓިކްޓޮކަކީ ޗައިނާގެ ކޮމިއުނިސްޓް ސަރުކާރާއި އަސްކަރިއްޔާ އިން ވާގިދީގެން އެމެރިކާ އަށް ޖާސޫސުކުރާ އެޕެކެވެ. އަދި އެ އެޕް ބޭނުންކުރާ އެމެރިކާ މީހުންގެ ޒާތީ މައުލޫމާތުތައް ވެސް ނަހަމަ ގޮތުގައި ބޭނުންކުރާ ކަމަށް ތުހުމަތުކުރެ އެވެ. އެކަމަކު އެ ތުހުމަތުތަކަށް ޓިކްޓޮކުން އިންކާރުކުރެ އެވެ.