ދިރާގުން ހޮސްޕިޓަލިޓީ ދާއިރާއަށް ހާއްސަ ޕްލެޓްފޯމެއް

ހޮސްޕިޓާލިޓީ ދާއިރާ އަށް މުހިންމު "މިޝަން ކްރިޓިކަލް" ހިދުމަތްތައް އެއް ޕްލެޓްފޯމަކުން ލިބޭނެ ނިޒާމެއް ދިރާގުން ތައާރަފްކޮށްފި އެވެ.

ދިރާގުން ބުނި ގޮތުގައި މި ޕްލެޓްފޯމް ފަރުމާކޮށްފައި ވަނީ ހޮސްޕިޓާލިޓީ އިންޑަސްޓްރީގެ މާހިރުންނާ ގުޅިގެން ކުރިއަށް ގެންދިޔަ ރިސާޗްތަކާއި އެ ބޭފުޅުންގެ ލަފަޔާ އެކުގަ އެވެ.

"އިކޯސިސް" ނަމުގައި ތައާރްފްކުރި މި ޕްލެޓްފޯމަކީ ދިރާގުން ބުނި ގޮތުގައި ރިސޯޓްތަކަށް އިތުރު ރައްކާތެރިކަމާއި އޮޕަރޭޝަން މެނޭޖްކުރަން ލުއިފަސޭހަތައް ލިބޭނެ ގޮތަކަށް ހަދާފައިވާ ޕްލެޓްފޯމެކެވެ. މި ޕްލެޓްފޯމުން ލިބޭ ހިދުމަތްތަކުގެ ތެރޭގައި އަލިފާނުގެ އަސަރު ދެނެގަތުން، އޯޑިއޯ ހިދުމަތް، ޑްރޯން ޑިޕްލޮއިމެންޓް، ހުއްދަނެތި ވަންނަ މީހުން ދެނެގަތުން އަދި ލޮކޭޝަން ބޭސްޑް ހިދުމަތްތައް ވެސް ލިބޭނެ ކަމަށް ދިރާގުން ބުންޏެވެ.

ދިރާގުން ބުނީ އަލިފާނުގެ އަސަރު ދެނެގަންނަ ފަޔާ އެލާމް މޮނިޓަރިން ހިދުމަތަކީ ކަސްޓަމަރުންގެ ނެޓްވޯކާއި، ލޮކޭޝަނާ ގުޅިފައިވާ ހިދުމަތެއް ކަމަށެވެ. އީކޯސިސް ޚިދުމަތް ލިބޭ ކޮންމެ ތަނެއްގައި ވެސް މި ހިދުމަތް ލިބޭނެ ކަމަށާއި ހާދިސާއެއް ހިނގައިގެން އުޅޭ ތަން ފަޔާ ސާވިސްގެ ޑޭޝްބޯޑުން ފަސޭހަކަމާއެކު ހޯދައި، އަލިފާން ނިވުމުގެ މަސައްކަތް ފެށޭނެ ކަމަށް ބުންޏެވެ.

މީގެ އިތުރަށް ލޮކޭޝަން ބޭސްޑް ސާވިސް މެދުވެރިކޮށް ޖީޕީއެސް ޓްރެކިން ޑިވައިސް، މޯޝަން ސެންސާ އަދި ސީސީޓީވީ ކެމެރާ ފަދަ ޑިވައިސްތަކުން އެއްގަމާއި ކަނޑުގެ ސަރަހައްދުތައް މޮނިޓާ ކުރެވޭނެ ކަމަށް ބުންޏެވެ. އަދި މީގެ ލައިވް ފީޑްގެ ރިކޯޑިން ފަހުން ބަލައިލެވޭނެ ކަމަށް ވެސް ދިރާގުން ބުންޏެވެ. މީގެ އިތުރުން ޕްލެޓްފޯމުގައި ހިމެނޭ ޑްރޯން ހިދުމަތުން އެއްގަމާއި ކަނޑުގައި އެމަޖެންސީ ހާލަތްތައް ދެނެގަންނަށް ފަސޭހަވެގެން ދާނެ ކަމަށާއި ޑްރޯން ހިދުމަތުގައި އޮޓޮމެޓިކުން އަދި އަމިއްލަ އަށް ފްލައިޓް ކޮންޓްރޮލް ކުރެވޭނެ ވެސް ބުންޏެވެ.

އިކޯސިސްގެ ސައުންޑް ސިސްޓަމް މެދުވެރިކޮށް ޕަބްލިކް އެނައުންސްމަންޓް ދިނުމާއި ބެކްގްރައުންޑް މިއުޒިކް ޖެހުމުގެ އިތުރުން ގެސްޓުންނަށް އިން-ރޫމް ޑިވައިސް މެދުވެރިކޮށް ކޮޓަރީގައި މިއުޒިކް ޖެހޭނެ އެވެ. މި ޕްލެޓްފޯމުގައި ހިމެނޭ "ޖިއޯ ފެންސިން" ޓެކްނޮލޮޖީ ބޭނުންކޮށްގެން، ކަނޑައެޅިފައިވާ ދިމާލެއްގައި ދަތުރުކުރާ އުނޅަދުތައް ޓްރެކްކޮށް، ހުއްދަނެތި ވަދެ ނިކުމެ އުޅޭ އުޅަނދުތައް ބަލައި، އެ ފަދަ އުޅަނދެއް ފެނިއްޖެ ނަމަ ވަގުތުން ކަމާބެހޭ ފަރާތްތަކަށް އެކަމާބެހޭ ނޮޓިފިކޭޝަން ވެސް ފޮނުވޭނެ އެވެ.

ދިރާގުން ބުނި ގޮތުގައި އެ ކުންފުނީގެ އަމާޒަކީ ކުންފުނީގެ ބިޒްނަސް ކަސްޓަމަރުންނަށް ކަނެކްޓިވިޓީގެ އިތުރުން އެކި ކަހަލަ ޒަމާނީ ޑިޖިޓަލް ވަސީލަތްތައް މެދުވެރިކޮށް އެހީތެރިކަން ފޯރުކޮށްދިނުމެވެ. ދިރާގުން ބުނީ ނިއު ނޯމަލްގައި މަސައްކަތްކުރަން ސްމާޓް އަދި ޑިޖިޓަލް ޕްލެޓްފޯމްތަކާއި ސޮލިއުޝަންތައް ތައާރަފުކޮށް، މި ޑިޖިޓަލް ޒަމާނުގައި ވިޔަވާރިތައް ފުރިހަމައަށް ކުރިއަށް ގެންދެވޭނެ ވަސީލަތްތައް ހޯދައިދިނުމަށް ދިރާގުން އަބަދުވެސް މަސައްކަތްކުރާ ކަމަށެވެ.