ކްރިމިނަލް ކޯޓުގެ ބަންދާ މެދު ގޮތް ނިންމާ މަޖިލިސްތައް ހިންގާ ގޮތް ޖޭއެސްސީން ބަލަނީ

ކްރިމިނަލް ކޯޓުން ބަންދާ މެދު ގޮތެއް ނިންމާ މަޖިލިސްތައް ކުރިއަށް ގެންދާ ގޮތް ބަލަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ޖޭއެސްސީން ބުނީ ކްރިމިނަލް ކޯޓުގެ ބަންދާ މެދު ގޮތެއް ނިންމާ މަޖިލިސްތަކަށް ފަނޑިޔާރުން ހަމަޖެއްސުމާއި އެ މަޖިލިސްތައް ތާވަލް ކުރުމާއި ތާވަލާ އެއްގޮތަށް ފަނޑިޔާރުންނަށް ހާޒިރު ނުވެވޭ ހާލަތްތަކުގައި ފަނޑިޔާރުން އަމަލުކުރަން ޖެހޭ ގޮތާއި އަދި އެހެން ފަނޑިޔާރުން ހަމަޖެއްސުމުގެ އުސޫލާ ގުޅޭ މައުލޫމާތު ހޯދައި، ދިރާސާ ކުރަން އެ ކޮމިޝަނުން މިއަދު ނިންމާފައިވާ ކަމަށެވެ. އެގޮތަށް ނިންމި ސަބަބެއް އެ ކޮމިޝަނުން ހާމައެއް ނުކުރެ އެވެ.

ބަންދާ މެދު ގޮތެއް ނިންމުމުގެ މަޖިލިސްތައް ކްރިމިނަލް ކޯޓުން އަބަދުވެސް ކުރިއަށް ގެންދަނީ ކަނޑައެޅޭ ވަކި ތަރުތީބަކުން އެކި ދުވަހު އެކި ފަނޑިޔާރުން ތިއްބަވާ ގޮތަށެވެ.

ޖޭއެސްސީން އެގޮތަށް ނިންމިއިރު އެ ކޮމިޝަނުން މީގެކުރިން ވެސް ވަނީ ބައެއް ކަންކަމުގައި ކޯޓުތަކުން އަމަލު ކުރަމުންދާ އުސޫލުތައް ދިރާސާ ކުރަން ވަނީ ފަށައިފަ އެވެ.