ދ. އަތޮޅުގައި ހޮސްޕިޓަލުގައި މަރުވި މީހަކު ކޮވިޑަށް ޕޮޒިޓިވްވެއްޖެ

ކަނޑިންމަ ރިސޯޓުން ދ. އަތޮޅު ހޮސްޕިޓަލަށް ގެންގޮސް ފަރުވާދެމުން އައި މީހަކު މަރުވެއްޖެ އެވެ. އޭނާ ކޮވިޑަށް ޕޮޒިޓިވްވެފައިވާތީ ހެލްތު ޕްރޮޓެކްޝަން އޭޖެންސީން ވަނީ މިއީ މި ބަލީގައި ރާއްޖެ އިން މަރުވި 38 ވަނަ މީހާގެ ގޮތުގައި އިއުލާންކޮށްފަ އެވެ.

އެތަނުން ބުނީ ކޮވިޑުގައި ރޭ މަރުވީ 60 އަހަރުގެ ދިވެހި ފިރިހެނެއް ކަމަށެވެ. އޭނާ ކޮވިޑަށް ޓެސްޓްކުރީ، މަރުވި ފަހުންނެވެ. އެއީ، އޭނާގެ ހަށިގަނޑުގައި ބަލީގެ އަލާމާތްތައް ހުރެގެން ކަމަށް އެޗްޕީއޭ އިން ބުންޏެވެ.

ކޮވިޑަށް، ޕޮޒިޓިވްވާ މީހުންގެ އަދަދު މިހާރު ވަނީ ވަރަށް ބޮޑަށް ދަށްވެފަ އެވެ. އެކަމަކު، އަދިވެސް ރައްކާތެރިކަމުގެ ފިޔަވަޅުތަކުގެ މަތީގައި ދެމިތިބެން އެޗްޕީއޭ އިން އަންނަނީ އިލްތިމާސްކުރަމުންނެވެ.

ރާއްޖެ އިން މިހާތަނަށް 11،600 އަށް ވުރެން ގިނަ މީހުން ކޮވިޑަށް ޕޮޒިޓިވްވެފައިވާއިރު އޭގެ ތެރެއިން 10،000 އަށް ވުރެން ގިނަ މީހުން ވަނީ ރަނގަޅުވެފަ އެވެ. މިހާރު ފަރުވާދެމުން އަންނަނީ 800 މީހުންނަށް ކަމަށް އެޗްޕީއޭގެ ހިސާބުތަކުން ދައްކަ އެވެ. އޭގެތެރެއިން ހޮސްޕިޓަލްގައި އެޑްމިޓްކޮށްފައި ތިބީ 54 މީހުންނެވެ.