އަދީބު ގޭ ބަންދަށް ބަދަލުކޮށްފި

ކުރީގެ ނައިބު ރައީސް އަހުމަދު އަދީބު ގޭ ބަންދަށް ބަދަލުކޮށްފި އެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ޚިޔާނާތާ ގުޅިގެން އަދީބަށް ކުރާ ހަތް ދައުވާއާ ގުޅިގެން އޭނާ ހުންނެވީ ޖަލުގައި ޝަރީއަތް ނިމެންދެން ބަންދުކޮށްފަ އެވެ. އެ ދައުވާތަކަށް އޭނާ އިއުތިރާފްވެ ވަޑައިގަތުމުން އަވަސް ނިޔާގެ މައްސަލައެއްގެ ގޮތުން އަންނަ ހޯމަ ދުވަހު އެ މައްސަލާގެ ހުކުމް އިއްވާނެ އެވެ.

އަދީބު ގޭ ބަންދަށް ބަދަލު ކުރުމާ ބެހޭގޮތުން ކަރެކްޝަންސް އިން ބުނީ އަދީބު ގޭބަންދަށް ބަދަލު ކުރީ ސިއްހީ ހާލަތު ހުރި ގޮތުން ކަމަޭވެ.

އަދީބުު ގޭ ބަންދަށް ބަދަލުކުރީ، އޭނާއަށް ކުރާ ދައުވާތަކަށް މިދިޔަ ބުދަ ދުވަހު ކޯޓުގައި އިއުތިރާފްވެ ވަޑައިގެން އެމްއެމްޕީއާރުސީގެ ޚިޔާނާތުގެ ފައިސާއާބެހޭ ތަފްސީލުތައް އޭނާ ފުރަތަމަ ފަހަރަށް ދެއްވާފައި ވަނިިކޮށެވެ. އަދި ކުރެވުނު ކުށްތަކަށް ތައުބާވެ، ރައްޔިތުންގެ ކިބައިން އޭނާ ވަނީ މައާފަށް އެދިވަޑައިގެންފަ އެވެ.

އަދީބު ދައުވާތަކަށް އިއުތިރާފްވީ އޭނާއާ އެކު ދައުލަތުން ހެދި އިއުތިރާފްގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ ދަށުން އަދީބު ކުށަށް އެއްބަސްވާ ނަމަ، އޭނާގެ އަދަބު ލުއިކޮށްދޭނެ އެވެ.