ފުރަތަމަ ދެ މެޗު ތިމަރަފުށްޓާއި ކުޑަހުވަދޫ އަށް

އެސްޓީއޯ މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ފަހު ބުރުގެ ފުރަތަމަ ދެ މެޗު ތ. ތިމަރަފުށްޓާއި ދ. ކުޑަހުވަދޫ ކާމިޔާބުކޮށްފި އެވެ.

ކުޑަހުވަދޫގައި ކުޅުނު ގްރޫޕް އެކެއްގެ ފުރަތަމަ މެޗުން އެ ޓީމު މޮޅުވީ އދ. މަހިބަދޫއާ ވާދަކޮށް 1-0 އިންނެވެ. މި މެޗުގެ ހަމައެކަނި ލަނޑު ކާމިޔާބުކުރީ ކުޑަހުވަދޫ ޓީމުގެ ޖުމައިލް ޖަމީލް އެވެ. މި ގްރޫޕްގެ ދެ ވަނަ މެޗުގައި މާދަމާ އެންމެ ފަހުގެ ޗެމްޕިއަން ސ.ފޭދޫ ކުޅޭނީ ގއ. ދެއްވަދޫގަ އެވެ.

ގްރޫޕް ދޭއްގެ ފުރަތަމަ މެޗުން ތިމަރަފުށި މޮޅުވީ ނ. ލަންދޫއާ ވާދަކޮށް 1-0 އިންނެވެ. ތިމަރަފުށީގައި ކުރިއަށްދާ މި ގްރޫޕްގެ ފުރަތަމަ މެޗުގައި ލަންދޫ ކޮޅަށް ތިމަރަފުށީ ޓީމުން ޖެހި ހަމައެކަނި ލަނޑު މެޗުގެ ދެ ވަނަ ހާފްގައި ކާމިޔާބުކުރީ އަބްދުﷲ މުނާޒް އެވެ.

ގްރޫޕް ދޭއްްގެ ދެ ވަނަ މެޗުގައި މާދަމާ ބ.އޭދަފުށި ބައްދަލުކުރާނީ ހދ. ހަނިމާދޫއާ އެވެ.

މި މުބާރާތުގެ ފުރަތަމަ ސެމީ ފައިނަލް އޮންނާނީ އަންނަ މަހު ހަތް ވަނަ ދުވަހު ކުޑަހުވަދޫގަ އެވެ. އެ މެޗުގައި ބައްދަލުކުރާނީ ގްރޫޕް އެކެއްގެ އެއް ވަނަ ޓީމާއި ގްރޫޕް ދޭއްގެ ދެ ވަނަ ޓީމެވެ. ދެ ވަނަ ސެމީ ފައިނަލް އަންނަ މަހު އަށް ވަނަ ދުވަހު އޮންނާނީ ތިމަރަފުށީގަ އެވެ. އެ މެޗުގައި ބައްދަލުކުރާ ގްރޫޕް ދޭއްގެ އެއް ވަނަ ޓީމާއި އެކެއްގެ ދެ ވަނަ ޓީމެވެ.

މުބާރާތުގެ ފައިނަލް މެޗު އޮންނާނީ އަންނަ މަހު 10 ވަނަ ދުވަހުގެރޭ މާލޭގަ އެވެ.