ޕްރިންސިޕަލުންގެ އުސޫލާ ގުޅޭ މައްސަލަ މަޖިލީހަށް ހުށަހަޅަނީ

ޕްރިންސިޕަލުންގެ އުސޫލާ ގުޅޭ މައްސަލަ މަޖިލީހަށް ހުށަހަޅަން އިދިކޮޅު ކޯލިޝަނުން މިއަދު ނިންމައިފި އެވެ.

މަޑުއްވަރީ ދާއިރާގެ މެމްބަރު އަދި އިދިކޮޅު ޕީއެންސީގެ ނައިބު ރައީސް އާދަމް ޝަރީފު ކުރެއްވި ޓްވީޓެއްގައި ވިދާޅުވީ، "ޕްރިންސިޕަލުން ވަޒީފާ އަދާކުރާ ސްކޫލު ކަނޑައަޅާނެ އުސޫލު" ގެ ސަބަބުން ތައުލީމީ ނިޒާމް ބިނާކުރި ޕްރިންސިޕަލުން މުޅިން މާޔޫސްވެފައިވާ ކަމަށެވެ. އެއީ ވަރަށް ސީރިއަސް އަދި އެތައް ހާސް ދަރިވަރުންނަކާ ގުޅުންހުރި މައްސަލައެއް ކަމަށް ވިދާޅުވި އެވެ.

"މި މައްސަލަ މަޖިލީހަށް ހުށަހެޅުމަށް މި ދަނީ ތައްޔާރުވަމުންނެވެ. [މަޖިލީހުގެ ރައީސް] މުހައްމަދު ނަޝީދު ހައްލެއް ހޯއްދަވައިދެއްވާނެ ކަމަށް އުއްމީދުކުރަން،" ތައުލީމީ ދާއިރާގައި ގިނަ އަހަރުތަކެއް ވަންދެން މަސައްކަތްކުރައްވާފައިވާ އާދަމް ޝަރީފް ވިދާޅުވި އެވެ.

ރައްޔިތުންގެ މަޖިލީހުގެ މި އަހަރުގެ ދެވަނަ ދައުރު ނިންމާލައި މަޖިލިސް ވަނީ އެއް މަހުގެ ޗުއްޓީއަށް ގޮސްފަ އެވެ. ޖަލްސާތައް ފަށަނީ އަންނަ މަހުގެ ތެރޭގަ އެވެ.

އެޑިއުކޭޝަން މިނިސްޓްރީން މިދިޔަ ބުރާސްފަތި ދުވަހު އާއްމުކުރި އުސޫލު ބުނާގޮތުން، ޕްރިންސިޕަލުން މަސައްކަތްކުރާނެ ސްކޫލެއް ކަނޑައަޅާނީ އެޑިއުކޭޝަން މިނިސްޓަރުގެ ލަފާގެ މަތިން ޕާމަނަންޓް ސެކްރެޓަރީ (ޕީއެސް) އެކުލަވާލައްވާ ފަސް މެމްބަރުންގެ ކޮމިޓީއަކުންނެވެ.

އޭގައި ހަމަޖައްސާފައިވާ ގޮތުން އެއް ސްކޫލެއްގައި ޕްރިންސިޕަލަކަށް ގިނަވެގެން މަސައްކަތް ކުރެއްވޭނީ ވެސް އަށް އަހަރެވެ. ޓެނުއަޝިޕްގެ މުއްދަތު ހަމަވުމުން އެ ޕްރިންސިޕަލް ޖެހޭނީ އެހެން ސްކޫލަކަށް ބަދަލުވާށެވެ. އެ މުއްދަތުގައި ވެސް ޕްރިންސިޕަލަކު ހުންނެވި ސްކޫލު ބަދަލުކުރުމުގެ ބާރު، އެ ކޮމިޓީއަށް ލިބެ އެވެ.

އެ އުސޫލު އާއްމުކުރި ދުވަހުން ފެށިގެން އެއަށް އަމަލުކުރަން ފަށައި ސިވިލް ސާވިސްގެ އިދާރީީ އޮނިގަނޑުގައި ތިބި ޕްރިންސިޕަލުން، އެޑިއުކޭޝަން މިނިސްޓްރީގެ އިދާރީ އޮނިގަނޑަށް ބަދަލުކުރަން ވަނީ ފަށައިފަ އެވެ. އެކަމަކު ޕްރިންސިޕަލުންގެ ޓެނުއަޝިޕް ހަމަޖައްސައި ނިންމަންޖެހޭނީ އެއް އަހަރުގެ ތެރޭގަ އެވެ. އެހެންވެ ރަސްމީ ލިޔުން ލިބުމާ ހަމައަށް، އެ ޕްރިންސިޕަލަކު މިވަގުތު ހުންނެވި ސްކޫލެއްގައި މަސައްކަތްކުރެއްވޭނެ އެވެ.

ޕްރިންސިޕަލުންނާ މަޝްވަރާކުރުމެއް ވެސް ނެތި ހަދާފައިވާ އުސޫލާ މެދު ގިނަ ބޭފުޅުން ދަނީ ކަންބޮޑުވުން ފާޅުކުރަމުންނެވެ. "މިހާރު" އާ ވާހަކަދެއްކެވި ޕްރިންސިޕަލަކު ވިދާޅުވީ އެ އުސޫލުގެ ސަބަބުން ވަޒީފާގެ ޔަގީންކަމެއް ނުލިބޭ ކަމަށެވެ. އެހެންވެ ތައުލީމީ ދާއިރާ ދޫކޮށް ދިއުމުގެ ވިސްނުން ގެންގުޅުއްވާ ކަމަށް ވިދާޅުވި އެވެ.

"މިހުރީ ވަރަށް ބޮޑަށް ހިތްދަތިވެފައި. އަޅުގަނޑު ބޭނުންވަނީ ޓީޗަރަކަށް ބަދަލުވާން މިހާރު. އެކަމަކު ޓީޗަރުގެ ވަޒީފާ ނުލިބިއްޖެނަމަ ދާއިރާ ދޫކޮށްދާން ބޭނުންވަނީ. މިހާރު ވެސް އެހެން ވަޒީފާއެއް ލިބޭތޯ ބަލަމުން މި ދަނީ،" އެ ޕްރިންސިޕަލް ވިދާޅުވި އެވެ. ޕްރިންސިޕަލުންގެ ކަންބޮޑުވުން މިގޮތަށް ހުރި ކަމުގައި ވިޔަސް އެޑިއުކޭޝަނުން ބުނެފައިވަނީ މިކަމުން ޕްރިންސިޕަލުންގެ ހައްގެއް ނުގެއްލޭނެ ކަމަށާއި ލިބޭނީ ކުރިއެރުން ކަމަށެވެ.