އިއްލެގެ "ނީނާ" އަޅުވާނީ އަންނަ އަހަރު

ދާދި ފަހުން ޓީޒާއެއް ދައްކައިލި، ޑައިރެކްޓަރު އިލްޔާސް ވަހީދު (އިއްލެ) ގެ އާ ފިލްމު "ނީނާ" އަންނަ އަހަރު އަޅުވާ ގޮތަށް ނިންމައިފި އެވެ.

މި ފިލްމުގެ މަސައްކަތް މި އަހަރުގެ ކުރީކޮޅު ފެށި އިރު ނިންމާފައި އޮތީ މި އަހަރުގެ ފަހުކޮޅު އަޅުވާށެވެ. ނަމަވެސް ކޮވިޑް-19 ގެ ބަލިމަޑުކަމާ ހެދި، ދިވެހި ފިލްމުތައް އަޅުވާ މާލޭގެ ރަސްމީ ސިނަމާ ވެސް މާޗް މަހުން ފެށިގެން ބަންދުކޮށްފައި ވާތީ އަންނަ އަހަރަށް ފަސްކުރީ އެވެ. އެކަމަކު އަދި ވަކި ތާރީހެއް ނުނިންމަ އެވެ.

"ނީނާ" ގެ ޝޫޓިން މި އަހަރުގެ ކުރީކޮޅު ލ. އަތޮޅުގައި ނިންމާފައިވާ އިރު، ފިލްމު މިހާރު އޮތީ ޕޯސްޓް-ޕްރޮޑަކްޝަން މަރުހަލާގަ އެވެ. މި ފިލްމަކީ މިދިޔަ އަހަރު އިއްލެ ޑައިރެކްޝަނަށް ނުކުތް ކާމިޔާބު ފިލްމު "ބަވަތި" ގެނެސްދިން ކުންފުނި އައި ފިލްމްސްގެ ދެވަނަ ފިލްމެވެ.

"ނީނާ" ގެ ބަތަލާ އަކީ "ބަވަތި" ގައި ވެސް މޮޅު އެކްޓިންއެއް ދެއްކި ނުޒުހަތު ޝުއައިބް (ނުޒޫ) އެވެ. މި ފިލްމު އާ އެކްޓަރަކު ވެސް ތައާރަފުކުރާނެ އެވެ. އެއީ ޝަރަފް އަބްދުﷲ އެވެ. "ނީނާ" ގެ ކާސްޓްގައި ކުރީގެ ބަތަލާ މަރިޔަމް ރަޝީދާ އާއި މަރިޔަމް ޝަކީލާ ވެސް ހިމެނެ އެވެ.

މި އަހަރު ދިވެހި ސިނަމާ އަށް އައީ އެންމެ ފިލްމެކެވެ. އެއީ މާޗް 4 ގައި އެޅުވި އަލީ ސީޒަންގެ "އަނދިރިކަން" އެވެ. ކޮވިޑާ ހެދި އޮލިމްޕަސް ބަންދުކުރަން ޖެހުނީ އެ ފިލްމުގެ ތިންހަތަރު ޝޯއެއް ދެއްކި ތަނާ އެވެ.

"އަނދިރިކަން" ގެ ފަހުން ވެސް ފިލްމުތަކެއް އަޅުވަން ޕްލޭންކުރި ނަމަވެސް ފަހުން އެ ފިލްމުތައް ވަނީ މުއްދަތެއް ނެތް ގޮތަށް ފަސްކޮށްފަ އެވެ. އެހެންވެ މި އަހަރުގެ ބާކީ މިއޮތް މުއްދަތުގެ ތެރޭގައި ވެސް އެއްވެސް ފިލްމެއް އޮލިމްޕަހަށް އަންނާނެ ކަމަކަށް ނުބެލެވެ އެވެ.