ރިޔާސީ ނިޒާމުގެ ދިފާއުގައި މައުމޫން ނުކުންނަވައިފި

ރާއްޖެ އަށް އެންމެ ކަމުދާ ވެރިކަމުގެ ނިޒާމަކީ ރިޔާސީ ނިޒާމު ކަމަށް ވިދާޅުވެ، އެ ނިޒާމުގެ ދިފާއުގައި ކުރީގެ ރައީސް މައުމޫން އަބްދުލްގައްޔޫމް ނުކުންނަވައިފި އެވެ.

ރާއްޖޭގައި ބާއްވަން ފެންނަނީ ވެރިކަމުގެ ކޮން ނިޒާމެއްތޯ ކަނޑައަޅަން މީގެ 13 އަހަރު ކުރިން، މައުމޫންގެ ވެރިކަމުގައި ބޭއްވި ނިޒާމީ ވޯޓުގައި އެ މަނިކުފާނު އޭރު ވެސް ތާއީދު ކުރެއްވީ ރިޔާސީ ނިޒާމަށެވެ. ނަމަވެސް، މިހާރު ވެރިކަމުގައި އޮތް އެމްޑީޕީން ތާއީދުކުރީ ބަރުލަމާނީ ނިޒާމަށެވެ.

ރައްޔިތުންގެ ފެންނަ ނުފެންނަ ވޯޓުން، ރާއްޖޭގައި ބާއްވަން 2007 ގައި 62 ޕަސެންޓުން ކަނޑައެޅީ ރިޔާސީ ނިޒާމެވެ.

ރިޔާސީ ނިޒާމާ އެއްކޮޅަށް މައުމޫން އަނެއްކާ ވެސް މި ނުކުންނެވީ ބަރުލަމާނީ ނިޒާމަށް ވެރިކަން ހިންގުން ބަދަލުކުރަން ކާށިދޫ ދާއިރާގެ މެމްބަރު އަދި ޑީއާރުޕީގެ ލީޑަރު އަބްދުﷲ ޖާބިރު ގާނޫނު އަސާސީ އަށް އިސްލާހު ގެންނަން ރައްޔިތުންގެ މަޖިލިހަށް މިއަދު ހުށަހަޅުއްވާފައި ވަނިކޮށެވެ.

މައުމޫން މިރޭ ކުރެއްވި ޓުވީޓެއްގައި ވިދާޅުވީ، ރާއްޖޭގެ ސިޔާސީ، އިޖުތިމާއީ، އިގުތިސާދީ ހާލަތަށް ބަލާއިރު، ރާއްޖެ އަށް އެންމެ ކަމުދަނީ ރިޔާސީ ނިޒާމުކަން ކަށަވަރު ކަމަށެވެ.

"2007 ވަނަ އަހަރު ރާއްޖޭގެ ރައްޔިތުން ވަރަށް ބޮޑު އަޣުލަބިއްޔަތަކުން ނިންމަވާފައި ވަނީ ވެސް ހަމަ އެހެން،" މައުމޫން ވިދާޅުވި އެވެ.

ބަރުލަމާނީ ނިޒާމަށް ރާއްޖޭގެ ވެރިކަން ބަދަލުކުރަން ޖާބިރު ހުށަހެޅުއްވިއިރު، ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަކީ ވަރަށް ބޮޑަށް އެ ނިޒާމަށް ތާއީދު ކުރައްވާ ބޭފުޅެކެވެ. ރައީސް އިބްރާހިމް މުހައްމަދު ސޯލިހުގެ ވެރިކަމުގެ މެދުތެރެއިން ވެސް ބަރުލަމާނީ ނިޒާމަށް ބަދަލުކުރަން ނަޝީދު މަސައްކަތްޕުޅު ކުރައްވާ ކަމުގެ ތުހުމަތު ސިޔާސީ ބައެއް ބޭފުޅުން ކުރައްވަ އެވެ.

ރާއްޖޭގައި މިހާރު އަމަލުކުރަމުން އަންނަ ގާނޫނުއަސާސީ އަށް އަމަލުކުރަން ފެށިތާ 12 އަހަރު ފުރުމާ ދިމާކޮށް ވިޝާމް އެންޑް ކޯ ނަމަަކަށް ކިޔާ ލޯފާމަކުން ކުރިއަށް ގެންދިޔަ ޕްރޮގްރާމަށް ދެއްވި އިންޓަވިއުއެއްގައި ނަޝީދު ވިދާޅުވެފައި ވަނީ ގާނޫނުއަސާސީ އަށް މިހާރުން މިހާރަށް ގެންނަން ޖެހޭ އިސްލާހެއް ނެތް ކަމަށާއި ނަމަވެސް ވެރިކަން ކުރަން ހަމަ އެންމެ ރަނގަޅީ ބަރުލަމާނީ ނިޒާމު ކަމަށެވެ. ގާނޫނުއަސާސީ ބިނާވެފައި އޮތީ ވެސް އެ ނިޒާމަށް ފަހިވާ ގޮތަށް ކަމަށް މި މަހުގެ ހަތެއްގައި ދެއްވި އެ އިންޓަވިއުގައި އެ މަނިކުފާނު ވިދާޅުވެފައި ވެ އެވެ.

މިދިޔަ އަހަރުގެ ޑިސެމްބަރު 7 ގައި ރައްޔިތުންގެ މަޖިލިހާއި ޕީއެސްއެމް ގުޅިގެން ބޭއްވި "އާސްކް ސްޕީކަ" ޕްރޮގްރާމްގައި ކުރި ސުވާލަކާ ގުޅިގެން، ނަޝީދު ވިދާޅުވެފައި ވަނީ ވެރިކަމުގެ ނިޒާމު ކަނޑައަޅާނީ ދިވެހި ރައްޔިތުން ކަމަށާއި އެ މަނިކުފާނު އެފަދަ މަސައްކަތްޕުޅެއް ފައްޓަވާނީ މުޅި އެމްޑީޕީން އެ ގޮތް ބޭނުންވެއްޖެ ނަމަ ކަމަށެވެ.

ރައީސް އިބްރާހިމް މުހައްމަދު ސޯލިހު އެންމެ ފަހުން ވިދާޅުވެފައި ވަނީ ވެރިކަން ހިންގުން ބަރުލަމާނީ ނިޒާމަކަށް ބަދަލު ކުރަން ވިސްނަވާކަށް އެ މަނިކުފާނަށް ވަގުތެއް ނެތް ކަމަށާއި ހުރިހާ ވަގުތެއް ހުސްކުރައްވަން ބޭނުންފުޅު ވަނީ ރައްޔިތުންނަށް ވެވަޑައިގަތް ވައުދުތައް ފުއްދަވަން ކަމަށެވެ.

މި އަހަރުގެ ޖޫން 23 ގައި ރައީސް އޮފީހުގައި އޮތް ނިއުސް ބްރީފިންއެއްގައި ރައީސް ވިދާޅުވެފައި ވަނީ، ވެރިކަމުގެ ނިޒާމް ބަދަލުކުރުމާ މެދު ވިސްނެވުމަށް ވުރެ މުހިއްމު ކަންކަން ކުރައްވަން ޖެހިވަޑައިގެންފައި އެބަހުރި ކަމަށެވެ. އިސްކަން ދެއްވަނީ ފަސް އަހަރަށް ވެވަޑައިގަތް ވައުދުތައް ފުއްދަވަން ކަމަށް ރައީސް ވިދާޅުވި އެވެ. އެ މަނިކުފާނު ވިދާޅުވެފައިވާ ގޮތުގައި ވެރިކަމުގެ ނިޒާމު ކަނޑައެޅުމުގައި ދެން ވެސް ގޮތް ނިންމާނީ ރައްޔިތުންނެވެ.

"ދެން ވެސް އެއްވެސް އިރެއްގައި ނިޒާމާ ބެހޭ ގޮތުން ގޮތެއް ނިންމާ ކަމަށް ވަންޏާ ފުރަތަމަ އަހަން ޖެހޭނީ ރައްޔިތުންގެ ކައިރިން، ރައްޔިތުން ނިންމާ ގޮތެއްގެ މައްޗަށް ގާނޫނުއަސާސީއަށް ބަދަލެއް ގެންނަން ނިންމާނީ،" ރައީސް އިބްރާހިމް މުހައްމަދު ސޯލިހު މީގެ ތިން މަސް ކުރިން ވިދާޅުވެފައި ވެ އެވެ.