އެލައިޑުން ފައިސާ ނުދައްކާތީ ހުކުމް ތަންފީޒު ކުރަން ޔޮޓް ޓުއާސް އިން ކޯޓުގައި އެދެފި

ޔޮޓް ޓުއާސް ކުންފުންޏަށް 22 މިލިއަން ޑޮލަރު ދޭން އެލައިޑް އިންޝުއަރެންސްގެ މައްޗަށް ސިވިލް ކޯޓުން ކުރި ހުކުމާ އެއްގޮތަށް ފައިސާ ނުދައްކާތީ އެ ހުކުމް ތަންފީޒު ކުރަން ޔޮޓް ޓުއާސްގެ ފަރާތުން ކޯޓުގައި އެދިއްޖެ އެވެ.

ރައްޔިތުންގެ މަޖިިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ޔޮޓް ޓުއާސް ކުންފުންޏަށް 22 މިލިއަން ޑޮލަރު ހަ މަސް ތެރޭގައި ދައްކަން ސިވިލް ކޯޓުން މިދިޔަ މަހު ހުކުމްކުރީ އެ ކުންފުނިން ހިންގި އަލިދޫ ރިސޯޓަށް 2014 ވަނަ އަހަރު ލިބުނު ގެއްލުންތަކާ ގުޅިގެން އިންޝުއަރެންސްގެ ގޮތުގަ އެވެ. ހަ މަސް ތެރޭގައި ކޮންމެ މަހަކު އެ މަހަށް ދައްކަންޖެހޭ އަދަދު ކޯޓަށް ދައްކަން އެ ހުކުމުގައި އެލައިޑްގެ މައްޗަށް އޮތީ އަންގައިފަ އެވެ.

ޖާބިރު މިއަދު ސިވިލް ކޯޓަށް ފޮނުއްވި ސިޓީގައިވަނީ އެ ހުކުމުގެ ދަށުން ފުރަތަމަ މަހު ދައްކަންޖެހޭ 3.7 މިލިއަން ޑޮލަރު އެލައިޑުން ކޯޓަށް ދައްކާފައި ނުވާ ކަމަށާއި އެ ކުންފުނިން އެ ހުކުމާ ޚިލާފް ވެފައިވާ ކަމަށެވެ. އެހެންވެ، އެ ހުކުމް ތަންފީޒު ކުރުމަށް އަވަސް ފިޔަވަޅުތަކެއް އަޅައިދޭން އެ ސިޓީގައި އޭނާ އެދިވަޑައިގެންފައިވެ އެވެ.

މަދަނީ މައްސަލަތަކުގައި ކުރާ ހުކުމްތައް އިސްތިއުނާފް ކޮށްފި ނަމަ، އާންމު އުސޫލުން އެ ހުކުމެއް ތަންފީޒު ކުރުމުގެ މަސައްކަތް ދަށު ކޯޓުތަކުން މަޑުޖައްސާލާނެ އެވެ.

އިންޝުއަރެންސްގެ ގޮތުގައި ލިބެންޖެހޭ 22 މިލިއަން ޑޮލަރުގެ ހުކުމް ތަންފީޒު ކުރަން ޔޮޓް ޓުއާސް އިން އެދުނުއިރު، އިންޝުއަރެންސް ފައިސާ ދޭން އެލައިޑުން ދެކޮޅު ހެދުމުގެ ސަބަބުން ލިބުނު ގެއްލުންތަކުގެ ބަދަލު ހޯދަން އެ ކުންފުންޏާ ދެކޮޅަށް ދައުވާ ކުރާނެ ކަމަށް ވެސް ޔޮޓް ޓުއާސް އިން ކުރިން ވަނީ ބުނެފަ އެވެ.