ކޮންޓެކްޓް ޓްރޭސިންގައި މިހާރު ބަލަނީ ގާތުގައި އުޅޭ މީހުންނަށް

ކޮންޓެކްޓް ޓްރޭސިންގައި މިހާރު ބަލަނީ ޕޮޒިޓިވްވި މީހަކާ ސީދާ ބައްދަލުވި ޑައިރެކްޓް ކޮންޓެކްޓުން ހޯދުމަށް ވުރެ ބޮޑަށް އެ މީހަކާ ގާތުގައި އުޅޭ ނުވަތަ ކްލޯސް ކޮންޓެކްޓުން ހޯދުމަށް ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން މިރޭ ބުނެފި އެވެ.

ކޮންޓެކްޓް ޓްރޭސިން ވަރުގަދަ މިކުރީ، ލޮކްޑައުންއަށް ފަހު އަލުން ލުއިތައް ދިނުމާ އެކު، މާލެ ސަރަހައްދުގައި ކޮވިޑް-19 ޖެހޭ މީހުންގެ އަދަދު ވަރަށް ބޮޑަށް އިތުރުވުމާ އެކު އެވެ. އެޗްއީއޯސީން ބުނިގޮތުގައި ބަލި ޖެހިފައިވާ މީހަކާ ސީދާ ބައްދަލުވި މީހުން ހޯދުމަށް ވުރެ ބޮޑަށް މިހާރު އިސްކަން ދެނީ އޭނާގެ ކައިރީގައި އުޅޭ މީހުން ފާހަގަކޮށް، ފިޔަވަޅުތައް އެޅުމަށެވެ.

ޑައިރެކްޓް ކޮންޓެކްޓެއްގެ ގޮތުގައި ބަލަނީ ބަލި ޖެހިފައިވާ މީހަކާ 15 މިނިޓެއްހާއިރު ސީދާ ބައްދަލުވުމުންނެވެ. ބަލި މީހަކާ ސީދާ ބައްދަލު ނުވި ނަމަވެސް އެއްގެއެއްގެ ތެރޭގައި ނުވަތަ އެއް ތަނެއްގައި އުޅޭ މީހުން ބަލަނީ ކްލޯސް ކޮންޓެކްޓުންގެ ގޮތުގަ އެވެ. އެ މީހުންގެ ތެރޭގައި ޑައިރެކްޓް ކޮންޓެކްޓުން ވެސް ހިމެނޭނެ އެވެ.

އެޗްޕީއޭގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް މިރޭ ވިދާޅުވީ ކްލޯސް ކޮންޓެކްޓުން، ޕޮޒިޓިވް މީހާއާ ބައްދަލުވެފައިވާ ހާލަތު ވެސް މިހާރު ބަލާނެ ކަމަށެވެ. އެގޮތުން ދެ މީހުން ކުރެ އެކަކު ވެސް މާސްކް އަޅައިގެން ހުރިތޯ ބަލައި، ހާއްސަކޮށް ޑައިރެކްޓް ކޮންޓެކްޓް ވެފައިވާ މީހާ އެކަން ކުރިތޯ ބަލާނެ ކަމަށް ވިދާޅުވި އެވެ. މާސްކް އަޅައިގެން ހުރި މީހާ، ބަލި މީހާގެ ގައިގާ އެއްގޮތަކަށް ވެސް އަތްލާފައި ނުވާނަމަ، އެ މީހަކު ހިމެނޭނީ ރިސްކު ކުޑަ ކެޓަގަރީގައި ކަމަށް ޑޮކްޓަރު ވިދާޅުވި އެވެ.

"އާއްމުކޮށް އެއްގެއެއްގައި އުޅޭ މީހުން މިވަނީ ކްލޯސް ކޮންޓެކްޓުންނަށް،" އޭނާ ވިދާޅުވި އެވެ.

މާލޭގައި ހަލުއިކަމާ އެކު ބަލި ފެތުރެމުން ދާއިރު، އެއް ގެއަކުން 35 މީހުން ވަނީ ޕޮޒިޓިވްވެފަ އެވެ.

އަފްޒަލް ވިދާޅުވީ މާލެ ކަހަލަ އާބާދީ ބޮޑު ތަނެއްގައި، ތޮއްޖެހިގެން އުޅެން ޖެހުމުން އެއް ފަހަރާ ގިނަ ބަޔަކު ޕޮޒިޓިވްވުމަކީ ގާތް ކަމެއް ކަމަށެވެ. އަދި ކުރިއަށް އޮތްތަނުގައި އެ ފަދަ ގިނަ ބަޔަކު ފެނުން އެކަށީގެންވާ ކަމަށް އޭނާ ވިދާޅުވި އެވެ.

މަސައްކަތް ވަރަށް ބުރަ، އުޅެނީ މަދު ބައެއް

ދޮޅު މަހެއްހާ ދުވަހު މާލެ ލޮކްޑައުންކޮށްފައި އޮތް އިރު، ދުވާލަކު ބަލި ޖެހޭ މީހުންގެ އަދަދު މަދެވެ. އަދި އޭރު، ނެޝަނަލް އިމަޖެންސީ އޮޕަރޭޝަން ސެންޓަރު ހިންގީ ގިނަ ބަޔަކާ އެކު އެވެ.

ޑރ. އަފްޒަލް ވިދާޅުވީ ޕޮޒިޓިވްވާ މީހުންގެ އަދަދު މިހާރު ކޮންމެ ދުވަހަކު ވެސް 100 އިން މަތީގައި އުޅޭއިރު، އެޗްއީއޯސީގައި މަސައްކަތް ކުރާ މީހުންގެ އަދަދު ވެސް ވަރަށް ބޮޑަށް މަދުވެފައިވާ ކަމަށެވެ. އެހެންވެ، މި ދަނޑިވަޅު، ކޭސްތަކަށް އެޓެންޑްވުމުގައި ލަސްތަކެއްވުން އެކަށީގެންވާ ކަމަށް ވިދާޅުވި އެވެ. އެކަމަކު އެތަނުގެ އަމާޒަކީ 24 ގަަޑިއިރުގެ ތެރޭގައި ކޮންޓެކްޓް ޓްރޭސިންގެ މަސައްކަތްތައް ނިންމާލުން ކަމަށް ވިދާޅުވި އެވެ.

"ނަމަވެސް އެއް ދުވަހެއްގެ ފުލް ލޯޑް ނިންމާލުމަށް ދެ ދުވަސް ވެސް ނަގައިފާނެ. މަސައްކަތް ކުރަން އަޅުގަނޑުމެންގެ މިތިބެނީ ވަރަށް މަދުބައެއް. އެކި މީހުންގެ އެކި ކެޕޭސިޓީ މި ހުންނަނީ. އެހެންވެ، މި ހާލަތުގައި ކޮންޓެކްޓް ޓްރޭސިންގައި އިތުރު ދުވަސް ވެސް ނަގައިފާނެ،" އަފްޒަލް ވިދާޅުވި އެވެ.

އޭނާ ވިދާޅުވީ އެންމެ މީހެއްގެ ކޮންޓެކްޓް ޓްރޭސިން ހެދުމަށް އެތައް ބަޔަކާ ވެސް ގުޅަން ޖެހޭ ކަމަށާއި އެކަމުގައި އެންމެ ބޮޑު ގޮންޖެހުމަކަށް ދިމާވަނީ ސައްހަ މައުލޫމާތު ނުލިބުން ކަމަށެވެ. އެހެންވެ، އެއް މަސައްކަތެއް ދެ ފަހަރާ ކުރަން ޖެހޭ ފަހަރު އަންނަ ކަމަށް ވެސް ވިދާޅުވި އެވެ.

އޭނާ ވިދާޅުވި ގޮތުގައި އެކަކު އަނެކަކު ދޭ މައުލޫމާތުގައި ފުށުއެރުންތަކެއް ހުރުމުން، ބައެއް ފަހަރު އެ މައުލޫމާތު ޔަގީންކުރުމުގައި ފުލުހުންގެ އެހީވެސް ހޯދަން ޖެހެ އެވެ. މިއީ ވެސް، މި ހާލަތުގައި ބަލި މީހުން ހޯދުމުގައި އިތުރު ލަސްތަކެއް ކުރިމަތިވާ ކަމެއް ކަމަށް ވިދާޅުވި އެވެ.

އޭނާ ވިދާޅުވީ ބައެއް ފަހަރަށް މާސްކް ނާޅައި، ނުވަތަ ޕާޓީތައް ބާއްވައިގެން ބަލި ފެތުރިފައިވާ ހާލަތްތަކުގައި އެ މައުލޫމާތު ދޭން ބައެއް މީހުން ދެކޮޅު ހަދާ ކަމަށާއި އެކަން ގިނަ ފަހަރަށް ކުރަނީ ކުށްވެރިވެދާނެ ކަމުގެ ބިރަށް ކަމަށެވެ. އެކަމަކު ޑޮކްޓަރު އެދިލެއްވީ، އެންމެންގެ ރައްކާތެރިކަމަށް ސައްހަ މައުލޫމާތު ދިނުމަށެވެ.

"ވިސްނާލާ އަޅުގަނޑުމެންގެ 100 ވަރަކަށް މީހުން މި ހޭންޑްލް ކުރަނީ ކޮންމެ މީހެއްގެ އެތައް މައުލޫމާތެއް ނަގަން. މިއީ އެންމެ ޕާފެކްޓް ސިސްޓަމެއް ނޫން. ޝޯޓްކަމިންތަކެއް ހުންނާނެ. އެކަމަކު އެކަން ކުޑަ ކުރެވޭނީ ސައްހަ މައުލޫމާތު ދީގެން،" އަފްޒަލް ވިދާޅުވި އެވެ.