ވެކްސިން އުފެއްދުމުގައި ގައިޑްލައިންތަކަށް ތަބާވާން ރަޝިޔާ އަށް އަންގައިފި

ޖެނީވާ (އޮގަސްޓް 4) - ކޮރޯނާވައިރަހަށް ވެކްސިން އުފެއްދުމުގައި މާ އަވަސް އަރުވާލައިގެން ކަންކަން ކުރުމުގެ ބަދަލުގައި ގައިޑްލައިންތަކަށް ތަބާވުމަށް ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން ރަޝިޔާ އިން އަންގައިފި އެވެ.

ރަޝިޔާ އިން ހޯމަ ދުވަހު ބުނެފައި ވަނީ ގިނަ ބަޔަކަށް ވެކްސިން ދިނުމުގެ ޕްރޮގްރާމެއް އަންނަ މަހު ފަށާނެ ކަމަށެވެ.

"ވަރަށް ފުޅާ ދާއިރާއެއްގައި ވެކްސިން އުފެއްދުމުގެ މަސައްކަތް އަންނަ މަހު ފަށާނަން،" އިންޑަސްޓްރީ މިނިސްޓަރު ޑެނިސް މަންތޫރޯ ވިދާޅުވި އެވެ.

ރަޝިޔާގައި ވެކްސިން އުފެއްދުމުގައި އެންމެ ކުރީގައި އުޅެނީ ގަމަލެޔާ އިންސްޓްޓިއުޓެވެ. ނަމަވެސް އެ ގައުމުން އަވަސް އަރުވާލައިގެން ވެކްސިންގެ އެކި މަރުހަލާތައް ކުރިއަށް ގެންދާ ކަމަށް ސިއްހީ ތަޖްރިބާކާރުން ބުނެ އެވެ.

ރަޝިޔާގައި އުފައްދާ ވެކްސިންއާ ގުޅޭ ގޮތުން ޑަބްލިއުއެޗްއޯ އިން ބުނީ ހުރިހާ ވެކްސިނެއް ވެސް އުފައްދަން ޖެހޭނީ އެކި ސްޓޭޖްތައް ފުރިހަމަ ކުރުމަށް ފަހު ކަމަށެވެ.

"ވެކްސިން އުފެއްދުމުގައި ތަބާވާން ޖެހޭ ގައިޑްލައިންތަކެއް ހުރޭ. ކޮންމެ ވެކްސިނެއް ވެސް ފުރިހަމަ ވާން ޖެހޭނީ ޓްރަޔަލްތައް ނިންމުމަށް ފަހު،" ޑަބްލިއުއެޗްއޯގެ ތަރުޖަމާން ކްރިސްޓިއަން ލިންޑްމިއާ ވިދާޅުވި އެވެ.

ޑަބްލިއުއެޗްއޯ އިން ހުކުރު ދުވަހު ބުނި ގޮތުގަައި 26 ވެކްސިނެއް މިހާރު ވަނީ ކްލިނިކަލް އިވެލުއޭޝަނުގަ އެވެ. އޭގެ ތެރޭން ހަ ވެކްސިން ވަނީ ފޭސް 3 ގެ މަރުހަލާގަ އެވެ. ސައްބީސް ވެކްސިންގެ ތެރޭގައި ހިމެނޭ ގަމަލެޔާގެ ވެކްސިން ވަނީ ފޭސް 1 ގަ އެވެ. ދުނިޔޭގެ އެކި ހިސާބުތަކުން 140 ކުންފުނިން އަންނަނީ ކޮރޯނާވައިރަހަށް ވެކްސިނެއް އުފެއްދުމުގެ މަސައްކަތް ކުރަމުންނެވެ.