ހުޅުދުއްފާރުން ވެސް މީހަކު ކޮވިޑަށް ޕޮޒިޓިވް ވެއްޖެ

ރ.ހުޅުދުއްފާރުގައި ހޯމް ކަރަންޓީނުގެ މުއްދަތު ފުރިހަމަކުރުމަށް ފަހު ޓެސްޓްކުރި މީހަކު ކޮވިޑް-19 އަށް ޕޮޒިޓިވް ވެއްޖެ އެވެ.

ހުޅުދުއްފާރު ކައުންސިލްގެ ނައިބު ރައީސް އަލީ ޖާވީދު "މިހާރު"އަށް މިއަދު ވިދާޅުވީ ކޮވިޑް-19 އަށް ޕޮޒިޓިވްވި މީހާ ޕޮޒިޓިވްވި އިރު ވެސް އޭނާ ހުރީ ކަރަންޓީނުގައި ކަަމަށެވެ.

"އެނާއާ އެއްވެސް މީހަކު ކޮންޓެކްޓެއް ނުވޭ. އޭނާ ހުރީ ހޯމް ކަރަންޓީނުގައި އުސޫލުތަކާ އެއްގޮތަށް،" އަލީ ވިދާޅުވި އެވެ.

ރ. އަތޮޅުގެ އެންމެ އާބާދީ ބޮޑު ރަށް، ދުވާފަަރުގައި ހޯމް ކަރަންޓީނުވުމަށް ފަހު ދޫކޮށްލި ބަޔަކު އިއްޔެ ވަނީ ކޮވިޑަށް ޕޮޒިޓިވްވެފަ އެވެ. އެ މީހުން ދޫކޮށްލީ ފުރަތަމަ ކުރި ޓެސްޓުން އެ ބައްޔަށް ނެގެޓިވްވުމުންނެވެ. އެކަމަކު ދޫކޮށްލި ފަހުން ނެގި ސާމްޕަލް ޕޮޒިޓިވް ވުމުން އެ ރަށް މޮނިޓަރިންގެ ހާލަތަށް ގެނެސް، ކޮންޓެކްޓް ޓްރޭސިންގެ މަސައްކަތް އަންނަނީ ކުރަމުންނެވެ.

ހެލްތު އިމަޖެންސީ އޮޕަރޭޝަން ސެންޓަރުގައި ރޭ ބޭއްވިި މީޑިއާ ބްރީފިންގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ހޯމް ކަރަންޓީނުގައި ތިބޭ މީހުން ޕޮޒިޓިވްވުމަކީ އެ ރަށެއްގެ ރައްޔިތުންނަށް މާބޮޑު ނުރައްކަލެއް ކުރިމަތިވާނެކަމެއް ނޫން ކަމަށެވެ. އޭނާ ވިދާޅުވީ ކަރަންޓީނު ރަނގަޅަށް ތަންފީޒުކުރާ ނަމަ ރަށުގެ އެހެން މީހުން ބައްޔަށް ހުށަ ނޭޅޭނެ ކަމަށެވެ.

"އެހެންވީމާ ކަރަންޓީނުގައި ތިއްބަވާ ބޭފުޅުން ބައްޔަށް އަދި ޕޮޒިޓިވް ވިޔަސް އިތުރަކަށް އެ ރަށުގެ ތެރޭގައި ބިރުވެރިކަމެއް، މިދެންނެވީ މީހަކަށް ފެތުރުމުގެ ފުރުސަތު އޮވެގެން އެކަހަލަ ކަންތައްތައް އޮންނާކަށެއް ނުޖެހޭނެ،" ނަޒްލާ ވިދާޅުވި އެވެ.