މައުމޫނަށް ނޭނގި ހައި ކޯޓަށް ދިޔައީ އިސްތިއުނާފުގެ ހައްގު ގެއްލުވާލަން: ވަކީލް

ޕީޕީއެމް ހިންގުން ރައީސް އަބްދުﷲ ޔާމީނަށް ލިބޭ ގޮތަށް ކުރި ހުކުމް އިސްތިއުނާފް ކުރަން އަމިއްލަ މީހަކު ހައި ކޯޓަށް މައްސަލަ ހުށަހެޅީ އިސްތިއުނާފްގެ ހައްގު އެ ޕާޓީގެ ރައީސް މައުމޫން އަބްދުލްގައްޔޫމަށް ގެއްލުވާލުމަށް ކަމަށް މައުމޫންގެ ވަކީލް ހުސްނުއްސުއޫދު މިރޭ ވިދާޅުވެއްޖެ އެވެ.

ޕީޕީއެމް ހިންގުން ރައީސް ޔާމީނާއި ހަވާލުކުރި މައްސަލަ އިސްތިއުނާފް ކުރުމުގެ މަސައްކަތް މައުމޫންގެ ފަރާތުން ކުރަމުން ދަނިކޮށް އެމަނިކުފާނަށް އެނގިވަޑައިގަތުމަކާ ނުލައި މައްސަލަ އިސްތިއުނާފްކުރީ ޕާޓީގެ އަމިއްލަ މެމްބަރެއް ކަމަށްވާ އައްބާސް ވާފިރު ކިޔާ މީހެކެވެ. އޭނާއަކީ ދަށު ކޯޓަށް މައްސަލަ ހުށަހެޅި ދެ މެމްބަރުންގެ ތެރެއިން ހުޅުދޫ ދާއިރާގެ މެމްބަރު މުހައްމަދު ޝާހިދުގެ ގާތް މީހެކެވެ.

މިރޭ ބޭއްވި ނޫސްވެރިންގެ ބައްދަލުވުމެއްގައި، މައުމޫންގެ ވަކީލުންގެ ޓީމުގައި ހިމެނޭ ސުއޫދު ވިދާޅުވީ އައްބާސް އެ މައްސަލަ ހައި ކޯޓަށް ހުށަހެޅީ އިސްތިއުނާފީ އުސޫލުތައް މުގުރާލުމަށް ފަހު، މައުމޫނަށް އިސްތިއުނާފްގެ ހައްގު ގެއްލުވާލުމަށް ކަމަށެވެ. އެފަދަ ކަންކަމަށް ކޯޓުތަކުން ފުރުސަތު ދީގެން ނުވާނެ ކަމަށް ވިދާޅުވެ، ސުއޫދު ވިދާޅުވީ އެފަދަ ކަންކަމަކީ ކޯޓުގެ ހުރުމަތް ކަނޑާލުން ފަދަ އަމަލުތައް ކަމަށެވެ.

"މައުމޫނަށް ވުރެ ކުރިން މައްސަލަ ހައި ކޯޓަށް ހުށަހަޅާފައި ތައްގަނޑު ޖައްސުވާލާނަމޭ ޝާހިދު އޭނާގެ ގާތް ބޭފުޅުންގެ ގާތު ވިދާޅުވި ކަމަށްވޭ. އެހެން އޮއްވާ މައުމޫނަށް ވުރެ ކުރިން ޝާހިދުގެ ކެމްޕެއިން މެނޭޖަރު އައްބާސް މައްސަލަ މި އިސްތިއުނާފްކުރީ. އެހެންވީމަ މިއީ އެބިއުޒް ދެއްތޯ؟. މައްސަަލަ ދަށު ކޯޓަށް ހުށަހެޅި ފަރާތުން އަނެއްކާ މި އިސްތިއުނާފް ވެސް މިކުރަނީ އަނެއް ފަރާތަށް ހައްގު ގެއްލުވާލަން،" ކުރިން ބަންޑާރަ ނައިބު ކަން ވެސް ކުރެއްވި ސުއޫދު ވިދާޅުވި އެވެ.

ސުއޫދު ވިދާޅުވީ އައްބާސް ހުށަހެޅި މައްސަލަ ހައި ކޯޓުން ބޭރުކޮށްލަން ޖެހޭ ކަމަށާއި މިކަން މިހެން ހިނގާއިރު ކޯޓަށް މިކަން އެނގޭ ކަމާ މެދު ސުވާލު އުފެދޭ ކަމަށެވެ. އެފަދަ ކަންކަމަށް ކޯޓުތަކުން އަދަބު ދޭންޖެހޭނެ ކަމަށާއި މިއީ އަދުލު އިންސާފު ޖޯކަކަށް ހަދައި، "ބަތް ކައްކާ ކުޅުން" ފަދަ ކަމެއް ކަމަށް ސުއޫދު ވިދާޅުވި އެވެ.

"އޮތް ހައްލަކީ އައްބާސް ހުށަހެޅި މައްސަލަ ބޭރުކޮށްލުން. އައްބާސް އެ ކުރަނީ ހައި ކޯޓާ ސަމާސަ. ހައި ކޯޓާއި ސަމާސަ ކުރެވިގެން ނުވާނެ،" ސުއޫދު ވިދާޅުވި އެވެ.

ސުއޫދު ވިދާޅުވީ ޕާޓީ ހިންގުން ރައީސް ޔާމީނާ ހަވާލު ކުރެވޭނެ ކަމަށް ގަބޫލު ނުކުރެވޭ ކަމަށާއި ޕާޓީ ހުއްޓުމަކަށް އައިސްފައިވާ ކަމަށް ބުނެ ހުކުމް ކުރިއިރު އެ ހުކުމުގެ ދަށުން ޕާޓީ ހިންގުން ލިބިގެން ދިޔައީ ޕާޓީ ހުއްޓުމަކަށް ގެނައި ރައީސް ޔާމީނަށް ކަމަށެވެ. ޕާޓީ ހުއްޓުމަކަށް އައީ ޕްރައިމަރީއެއް ނެތި ރައީސް ޔާމީނަށް ރިޔާސީ ޓިކެޓް ހޯދަން އުޅުނު މައްސަލާގައި ކަމަށާއި އެކަން އެހެން އޮއްވާ ރައީސް ޔާމީނަށް ޕާޓީ ހަވާލު ކުރުމަކީ މަސްހަލަތު ފުށުއަރާ ކަމެއް ކަމަށް އޭނާ ވިދާޅުވި އެވެ.

"ޟަރޫރީ ހާލަތު މެދުވެރިކުރީ ރިޔާސީ ޓިކެޓް ހޯދަން. އެއީ ޕާޓީގެ ކޮންގްރެސް އާއި އަސާސީ ގަވާއިދު އޮތްގޮތުން ނެތީ ލިބެން. އެހެންވެ އެކަމަށް މަގުފަހިކުރަން ޕާޓީ ހުއްޓުމަކަށް ގެނައި ފަރާތަށް ޕާޓީ ހިންގުން މި ހަވާލުކުރަނީ. މިއީ މަސްލަހަތު ފުށުއަރާ ކަމެއް. އެފަދަ ކަންކަމަށް ކޯޓުތަކުން ވެސް ފުރުސަތު ދީގެން ނުވާނެ،" ސުއޫދު ވިދާޅުވި އެވެ.

މައުމޫންގެ ސަބަބުން ޕާޓީ ހުއްޓުމަކަށް އައީ ކަމަށް ކޯޓަށް ގަބޫލު ކުރެވިއްޖެ ނަމަ ޕާޓީ ހިންގޭނެ އެހެން ގޮތްތައް ވެސް އެބަހުރި ކަމަށާއި އެކަމަކު އޭގެ ބަދަލުގައި ރައީސް ޔާމީނާ ޕާޓީ ހަވާލު ކުރި ކުރުމަކީ ދިން "އިނާމެއް" ގެ ގޮތުގައި ސުއޫދު ސިފަ ކުރެއްވި އެވެ.

"އެހެން ގޮތްތައް ވެސް އެބަހުރި. ކައުންސިލް އެބައޮތް. ޕީޖީ ގްރޫޕް އެބައޮތް. އެކަމަކު ޕާޓީ ހުއްޓުމަކަށް ގެނައި ފަރާތަށް އެ ފުރުސަތު ދިނުމަކީ ޕާޓީގެ މަސްލަހަތު ހުރި ގޮތަކަށް ނުވާނެ. އެހެންވެ ޟަރޫރީ ހާލަތެއް އޮތް ކަމަކަށް ގަބޫލެއް ނުކުރެވޭ. ގަވާއިދުގައި ނެތް ކަމެއް ކޯޓަކަށް ތައާރަފެއް ނުކުރެވޭނެ،" ސުއޫދު ވިދާޅުވި އެވެ.

ރައީސް ޔާމީނަށް ޕާޓީ ހިންގުމުގެ އެއްވެސް ދައުރެއް އަދާ ނުކުރެވޭނެ ގޮތަށް އަސާސީ ގަވާއިދުގައި އޮތްއިރު ގަވާއިދުގެ ބޭރުން ކޯޓަށް ހައްލު ހޯދައިދެވޭނެ ކަމަށް ގަބޫލު ނުކުރައްވާ ކަމަށް ސުއޫދު ވިދާޅުވި އެވެ. ހައި ކޯޓުގައި ޕީޕީއެމް ތަމްސީލު ކުރުމުގެ ފުރުސަތު ރައީސް ޔާމީންގެ ފެކްޝަނަށް ލިބެންޖެހޭނެ ކަމަށް ގަބޫލު ނުކުރާ ކަމަށާއި ހައި ކޯޓުން އަމަލުކުރަންޖެހޭނީ ދަށު ކޯޓުގެ ހުކުމް އައުމުގެ ކުރިން ޕީޕީއެމް އޮތް ހާލަތާ އެއްގޮތަށް ކަމަށް ސުއޫދު ވިދާޅުވި އެވެ.