މެލޭޝިއާއިން ކިޔަވަން 100 ސްކޮލާޝިޕްގެ ފުރުސަތު ކިއު ސްޓަޑީ އިން ހުށަހަޅައިފި

މެލޭޝިއާގައި މަތީ ތައުލީމު ހާސިލްކުރަން 100 ސްކޮލަޝިޕް ރާއްޖެ އަށް ދޭން ކިއު ސްޓަޑީ މެލޭޝިއާ އިން އިއްޔެ ހުށަހަޅައިފި އެވެ.

މި ސްކޮލަޝިޕްތަކާ ގުޅޭ ގޮތުން މަޝްވަރާކޮށްފައި ވަނީ ހަޔާ އެޑިއުކޭޝަން މިނިސްޓްރީ އާއި ކިއު ސްޓަޑީ މެލޭޝިއާ ދެމެދު އިއްޔެ ބޭއްވި އޮންލައިން ބައްދަލުވުމެއްގަ އެވެ. މި ބައްދަލުވުމުގައި ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަން އާއި ކިއު ސްޓަޑީ މެލޭޝިއާގެ އިސްވެރިން ބައިވެރިވަޑައިގަތެވެ.

ކިއު ސްޓަޑީ އަކީ، ބޭރު ދަރިވަރުންނަށް މެލޭޝިއާއިން ލިބެން ހުރި މަތީ ތައުލީމު ފޯރުކޮށްދޭ އޭޖެންސީ އެކެވެ.

ދަރިވަރުންގެ އަތުން އެއްވެސް ހަރަދެއް ކުރަން ނުޖެހޭ ގޮތަށް 10 ސްކޮލަޝިޕެއް ކިއު ސްޓަޑީ އިން ހުށަހަޅާފައި ވެ އެވެ. އަނެއް 90 ސްކޮލަޝިޕް ލިބޭ ދަރިވަރުންގެ ޓިއުޝަން ފީ، 50 ޕަސެންޓާ ހަމައަށް މައާފްކުރާނެ ކަމަށް ކިއު ސްޓަޑީ އިން ބުނެފައި ވެ އެވެ. މި ހުށަހެޅުމުގައި މަޝްވަރާކުރެވުނު އިތުރު ކަންތައްތަކުގެ ތެރޭގައި މެލޭޝިއާގެ ޔުނިވާސިޓީތަކަށް ޒިޔާރަތްކޮށް، އެ ޔުނިވާސިޓީތަކުގައި ކިޔަވާ ދިވެހި ދަރިވަރުންނާ ބައްދަލުކުރުމުގެ ފުރުސަތު ހިމެނެ އެވެ.

މި ބައްދަލުވުމުގައި ރާއްޖެ އަށް ބޭނުންވާ އިންސާނީ ވަސީލަތްތައް ތަރައްގީ ކުރަން، މެލޭޝިއާ އިން ލިބެން ހުރި ފުރުސަތުތައް މަޝްވަރާކޮށްފައި ވާ ކަމަށް ހަޔާ އެޑިއުކޭޝަން މިނިސްޓްރީން ބުންޏެވެ. އަދި ވަޒީފާ އަދާކުރަމުން އަންނަ މީހުންނަށް އަމާޒުކޮށްގެން ހާއްސަ ޓްރެއިނިންތަކަކާއި ފޯރަމެއް ބާއްވަން ވެސް މަޝްވަރާކޮށްފައި ވެ އެވެ.