އަނގަޔަށް ލައްފިލުވާ އެޅި މައްސަލައިގައި ކުރީގެ ފިރިމީހާ ހައްޔަރުކޮށްފި

ރ. އަލިފުށީގައި އަންހެނެއްގެ އަނގަޔަށް ލައްފިލުވާ އެޅި މައްސަލައިގައި، އޭނާގެ ކުރީގެ ފިރިމީހާ ރޭ ހައްޔަރުކޮށްފި އެވެ.

ފުލުހުންގެ މީޑިއާ އޮފިޝަލަކު ވިދާޅުވީ އަންހެނެއްގެ އަނގަޔަށް ލައްފިލުވާ އެޅި މައްސަލައިގައި 32 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ. އެ މައްސަލަ ފުލުހުންނަށް ހުށަހެޅީ 9:45 ހާއިރެވެ.

އެނގިފައިވާ ގޮތުގައި އެއީ އަންހެން މީހާގެ ކުރީގެ ފިރިމީހާ އެވެ. އެ ދެ މީހުންގެ ދަރިއަކު ވެސް ހުރެ އެވެ. އަނގަޔަށް ލައްފިލުވާ އެޅިޔަސް އޭނާގެ ހަށިގަނޑުގެ އެތެރެއަށް ލައްފިލުވާ ގޮސްފައިނުވާ ކަމަށް ވެ އެވެ.

މައްސަލަ ހުށަހެޅުމާއެކު ފުލުހުން ވަނީ އަންހެން މީހާ ހެލްތު ސެންޓަރަށް ގެންގޮސްފަ އެވެ. މިހާރު އޭނާ އޮތީ އުނގޫފާރު ރީޖަނަލް ހޮސްޕިޓަލުގަ އެވެ. އޭނާގެ ހާލު ރަނގަޅުވަމުން އަންނަކަމަށް، ފުލުހުން ބުންޏެވެ.

"މި މައްސަލަ ފުލުހުން ދަނީ ތަހުގީގުކުރަމުން،" ފުލުހުންގެ މީޑިއާ އޮފިޝަލް ވިދާޅުވި އެވެ.