ޔުނިވާސަލްގެ ރިސޯޓުތައް ހުޅުވުން އޮކްޓޯބަރަށް ފަސްކޮށްފި

ޔުނިވާސަލް އެންޓަޕްރައިސަސް އިން ހިންގާ ރިސޯޓުތައް ހުޅުވުން އަންނަ އޮކްޓޯބަރު މަހަށް ފަސްކޮށްފައިވާ ކަމަށް އެ ކުންފުނިން މިއަދު ބުނެފި އެވެ.

ރާއްޖޭގެ ޓޫރިޒަމް އިންޑަސްޓްރީގައި އެންމެ ނަން ހިނގާ އެއް ކުންފުނި ޔުނިވާސަލް އިން ކުރިން ނިންމާފައިވަނީ ކޮވިޑް-19 ގެ ދަތި ހާލަތަށް ފަހު، ރާއްޖޭގެ ބޯޑަރު އަންނަ މަހު ހުޅުވުމާ އެކު ހުރިހާ ރިސޯޓެއް ވެސް ހުޅުވުމަށެވެ. ނަމަވެސް އެކި ގައުމުތަކުގެ ބޯޑަރު ހުޅުވުން ލަސްވާނެ ކަމަށް މިހާރު ލަފާ ކުރެވޭތީ ރިސޯޓުތައް ހުޅުވުން ފަސްކުރީ ކަމަށް ޔުނިވާސަލުން ބުންޏެވެ.

އެކަމަކު، މިހާރުގެ ހާލަތު ބަދަލުވެ، ގިނަ ގައުމުތަކުން ބޯޑަރު ހުޅުވައިފި ނަމަ، މަދު ކޮޓަރިތައް ހުންނަ ރިސޯޓުތައް ހުޅުވާނެ ކަމަށް ޔުނިވާސަލުން ބުންޏެވެ.

ނަމަވެސް ޔުނިވާސަލުން ލަފާކުރާ ގޮތުގައި، ސެޕްޓެމްބަރު މަހުގެ ކުރިން ގިނަ ގައުމުތަކުގެ ބޯޑަރުތައް ނުހުޅުވާނެ އެވެ.

ރާއްޖޭގެ ޓޫރިޒަމް އިންޑަސްޓްރީގެ އެއް މޭސްތިރި މުހައްމަދު އުމަރު މަނިކު (އެމްޔޫ މަނިކު) ގެ ކުންފުނީގެ ދަށުން ރާއްޖޭގައި އަށް ރިސޯޓެއް ހިންގަ އެވެ. މީގެ ތެރޭގައި ކުރުނބާ މޯލްޑިވްސް އާއި ބަރޮސް މޯލްޑިވްސް އާއި ވެލައްސަރު މޯލްޑިވްސް އާއި ކަނދޮޅު މޯލްޑިވްސް އާއި ދިގަލި މޯލްޑިވްސް އާއި ފާރުފުށި މޯލްޑިވްސްގެ އިތުރުން ކުރަމަތި މޯލްޑިވްސް އާއި މިލައިދޫ މޯލްޑިވްސް ހިމެނެ އެވެ. މި ހުރިހާ ރިސޯޓެއް ވެސް ބަންދު ކޮށްފައި ވަނީ މިދިޔަ އޭޕްރިލް މަހުގަ އެވެ.

ޔުނިވާސަލްގެ ރިސޯޓުތައް ވަގުތީ ގޮތުން ބަންދުކުރީ، މުވައްޒަފުންނަށް ހާއްސަ ޕެކޭޖަކާއެކު ޗުއްޓީ ދީފަ އެވެ. މި ޕެކޭޖު ކުރިއަށް އޮތް ތިން މަސް ދުވަހު ވެސް ދިވެހި މުވައްޒަފުންނަށް ލިބޭނެ ކަމަށް އެ ކުންފުނިން ބުނެ އެވެ.

ޔުނިވާސަލްގެ ރިސޯޓުތަކުގައި ޗުއްޓީ ހޭދަކުރުމަށް އެކި ގައުމުތަކުގެ މީހުން އަދިވެސް ޝައުގުވެރިކަން ފާޅު ކުރާތީ އެ މީހުންނަށް އިތުރު އެއްވެސް ފީއަކާ ނުލައި ތާރީޚު ބަދަލު ކުރުމުގެ ފުރުސަތު ވަނީ ހުޅުވާލައިފަ އެވެ. އަންނަ އޮކްޓޯބަރު މަހު ރިސޯޓުތައް ހުޅުވުމުން ހުރިހާ ޓޫރިސްޓުންނަށް ވެސް ހާއްސަ ޑިސްކައުންޓުތަކެއް ދޭން އެ ކުންފުނިން ވަނީ ނިންމައިފަ އެވެ.