ހަމަލާދިން މީހުން ދޫވީ ހެކި ނެތް ކަމަށް ބުނެ ދައުވާ ނުކުރުމުން: ފުލުހުން

ހުޅުމާލޭގައި މިދިޔަ ފެބްރުއަރީ މަހު ޓޫރިސްޓުންނަށް ހަމަލާދިން ކަމުގެ ތުހުމަތުރެވޭ އަށް މީހަކު ދޫކޮށްލަން ޖެހުނީ ހެކި ނެތް ކަމަށް ބުނެ ޕްރޮސިކިއުޓަ ޖެނެރަލްގެ އޮފީހުން ދައުވާ ނުކުރުމުން ކަމަށް ފުލުހުން މިިރޭ ބުނެފި އެވެ.

މި އަށް މީހުން ހައްޔަރުކުރީ ޗައިނާގެ ދެ މީހަކާއި އޮސްޓްރޭލިއާގެ މީހަކަށް ހުޅުމާލޭ މަގުމަތިން ދިން ހަމަލާއާ ގުޅިގެންނެވެ. މިއީ ހަރުކަށި ފިކުރާ ދެކޮޅަށް ރ. މަޑުއްވަރީގައި ފުލުހުން ހިންގި އޮޕަރޭޝަނުގެ ބަދަލު ހިފުމުގެ ގޮތުން ދިން ހަމަލާއެއް ކަމަށް ފުލުހުން ވަނީ ބުނެފަ އެވެ.

މި އަށް މީހުންގެ ތެރެއިން އެކެއްގެ ގާނޫނީ ވަކީލް، އަލީ ސައީދު ހަސަބް "މިހާރު"އަށް ވިދާޅުވީ އެ މީހުން މިނިވަންކުރީ މިދިޔަ ބުދަ ދުވަހު ކަމަށެވެ. އަދި އެ ދުވަހު އެ މިނިވަންވީ، ޕީޖީ ދައުވާ ނުއުފުލުމުން ކަމަށް ވެސް އޭނާ ވިދާޅުވި އެވެ.

އޭނާ ވިދާޅުވި ގޮތުގައި ގާނޫނީ އިމުގެ ތެރެއިން ބަންދުގައި ބޭތިއްބުމަށް ލިބެނީ 75 ދުވަހެވެ. އެހެން ނަމަވެސް އޭގެ އިތުރަށް 15 ދުވަހުގެ މުއްދަތެއް ދީފައި ވަނީ ޕީޖީއަށް ދައުވާ ކުރުމާއި ނުކުރުމާ މެދު ގޮތެއް ނިންމުމަށް ކަމަށާއި އެ މުއްދަތު ހަމަވި އިރު ވެސް އެ މައްސަލާގައި ދައުވާކޮށްފައި ނުވާ ކަމަށް އޭނާ ވިދާޅުވި އެވެ.

ފުލުހުން ބުނީ ތަހުގީގު ފުރިހަމަކޮށް ގާނޫނު ބުނާ މުއްދަތުގެ ތެރޭގައި ދައުވާ ކުރުމަށް ޕީޖީ އޮފީހަށް މައްސަލަ ފޮނުވި ކަމަށެވެ. ނަމަވެސް ތަހުގީގަށް ހޯދާފައިވާ ހެކީގެ މައްޗަށް ދައުވާ ކުރެވެން ނެތް ކަމަށް ޕީޖީން ނިންމާފައިވާ ކަމަށެވެ. އެކަމުގެ ސަބަބުން އެ މީހުން އިތުރަށް ބަންދުގައި ބޭއްތިއްބެން ނެތުމުން މުޖުތަމަށް ދޫވީ ކަމަށް ވެސް ފުލުހުން ބުންޏެވެ.

ޕްރޮސިކިއުޓާ ޖެނެރަލް ހުސައިން ޝަމީމް ވިދާޅުވީ އެ މައްސަލައިގައި މިހާތަނަށް ލިބިފައިވާ ހެކީގެ މައްޗަށް ދައުވާ ކުރެވެން ނެތް ކަން އަންގާފައިވާނެ ކަމަށެވެ. އެކަމަކު އެ މައްސަލައަކީ އެއްގޮތަކަށް ވެސް ދައުވާ ނުކުރަން ނިންމި މައްސަލައެއް ނޫން ކަމަށް ވިދާޅުވި އެވެ.

ޕީޖީން އެދުނު ގޮތަށް ފުލުހުން އަންނަނީ މައްސަލައިގެ ތަހުގީގު ފުރިހަމަކުރަމުންނެވެ.