ކޮވިޑް-19 ކޭސްތައް ގިނަޔަސް ކޮންޓްރޯލް އަދި ނުގެއްލޭ: އެޗްޕީއޭ

ކޮވިޑް-19ގެ ކޭސްތައް ފެންނަ އަދަދު އިތުރުވެފައި ވިޔަސް، އަދި މި ފެންނަނީ އަންދާޒާކޮށްފައިވާ ހާލަތެއް ކަމަށާއި ކޮންޓްރޯލުން އަދި ނުނެއްޓޭ ކަމަށް ހެލްތު ޕްރޮޓެކްޝަން އެޖެންސީން މިރޭ ބުނެފި އެވެ.

ނެޝަނަލް އިމަޖެންސީ އޮޕަރޭޝަން ސެންޓަރުގައި މިރޭ ބޭއްވި ޕްރެސް ބްރީފިންގައި ނޫސްވެރިއަކު ކުރި ސުވާލަކަށް އެޗްޕީއޭގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް ވިދާޅުވީ މިހާރު ފެންނަ ކޭސްތަކަކީ ކުރިން ދެނެގަނެވިފައިވާ ކްލަސްޓާތަކާ ގުޅިގެން ފެންނަ ކޭސްތަކެއް ކަމަށެވެ. ކޮންޓްރޯލުން ނެއްޓުނު ކަމަށް ބަލާނީ މިހާރު ދެނެގަނެވިފައިވާ ކްލަސްޓާތަކާ އެއްވެސް ގުޅުމެއް ނެތި، އެތަން މިތަނުން ކޭސްްތައް ފެންނަ ހާލަތުގައި ކަމަށް އޭނާ ވިދާޅުވި އެވެ.

"މިސާލަކަށް ސްޕޮރެޑިކްކޮށް، އެތައް މިތަނުން އެއްވެސް ލިންކެއް ނުފެނި ބައިވަރު އިތުރު ކޭސްތަކެއް ފެންނަން ފަށައިފި ނަމަ އެ ހިސާބުން އަަޅުގަނޑުމެން ބުނާނީ އެއީ އަންކޮންޓްރޯލްޑް ސްޕްރެޑެކޭ. ދެން އަޅުގަނޑުމެން އައިޑެންޓިފައިކޮށްފައި ހުރި ކްލަސްޓާތަކެއްގެ ތެރެއިން އިތުރު ކޭސްތައް ފެނުމަކީ އަޅުގަނޑުމެން އެކްސްޕެކްޓްވެސް ކުރާ ކަމެއް،" އަފްޒަލް ވިދާޅުވި އެވެ.

އޭނާ ވިދާޅުވީ މިހާރު ދެނެގަނެވިފައިވާ ކްލަސްޓާތަކުން މި އަދަދަށް ކޭސްތައް ފެންނާނެ ކަމަށް ބަލައި، އެ ކްލަސްޓާތައް މޮނިޓާ ވެސް ކުރަމުން އަންނަ ކަމަށާއި އެހެންވީމާ އަދިވެސް ހާލަތު މިއޮތީ ކޮންޓްރޯލްގެ ދަށުގައި ކަމަށެވެ.

އަފްޒަލް ވިދާޅުވި ގޮތުގައި މިހާރު ފެނިފައިވާ ކޭސްތަކުގެ ކޮންޓެކްޓުންގެ ގޮތުގައި އަދި ފެންނަމުން އަންނަ އަދަދުތަކަކީ ވެސް އަންދާޒާކޮށްފައިވާ އަދަދުތަކެއް ކަމަށެވެ. އެގޮތުން މިއިން ކޮންމެެ ކޭހެއްގެ މަދުވެގެން 15 ކޮންޓެކްޓުން ތިބުމަކީ އެކަށީގެންވާ ކަމެއް ކަމަށް ކުރިން ވެސް ވަނީ ލަފާކޮށްފައި ކަަމަށް އެނާ ވިދާޅުވި އެވެ.

"އަދި އެއަށް ވުރެ ގިނަވުމާއި މަދުވުމަކީ ވެސް ހަމަ ޕޮސިބުލް ކަމެއް. އަނެއްކާ ދުވަސް އިތުރަށް ދާ ވަރަކަށް އިތުރު މީހުންނާ ބައްދަލުވުމުގެ ފުރުސަތު ވެސް އޮންނާނެ،" އަފްޒަލް ވިދާޅުވި އެވެ.

އަފްޒަލް މިރޭ ވިދާޅުވި ގޮތުގަައި މާލޭގެ އެންމެ ބޮޑު ކްލަސްޓާއަކީ އަދިވެސްް ބާޒާރުމަތީ ކްލަސްޓާ އެވެ. އެ ކްލަސްޓާ އިން އަދިވެސްް އިތުރު ކޭސްތައް ފެންނަމުންދާ ކަމަށް އޭނާ ވިދާޅުވި އެެވެ.

ފާއިތުވި 24 ގަޑި އިރަކީ ރާއްޖޭގައި ކޮވިޑް-19 ފެތުރެން ފެށި ފަހުން އައި އެންމެ ހިތާމަވެރި އެއް ދުވަހެވެ. އެގޮތުން އެ 24 ގަޑި އިރުގެ ތެރޭގައި 119 މީހަކު އަލަށް ޕޮޒިޓިވްވެ، އެ ބަލީގައި ފުރަތަމަ ފަހަރަށް ރާއްޖެއިން މީހަކު ވަނީ މަރުވެފަ އެވެ.

މި 24 ގަޑިއިރުގެ ތެރޭގައި އަލަށް ފެނުނު ކޭސްތަކުގެ ތެެރެއިން 95 މީހުންނަކީ އެއް ތަނެއްގައި ދިރިއުޅުނު ބިދޭސީންނެވެ. ބިދޭސީ މަސައްކަތްތެރިން ވަރަށް ބޮޑަށް ތޮއްޖެހިގެން ދިރިއުޅޭ 23 ތަނެއް މާލެއިން ފާހަގަވެ، ފުލުހުން އަންނަނީ އެ ތަންތަން މޮނިޓާ ކުރަމުންނެވެ. އެ ތަންތަނުގަައި ދިރިއުޅޭ މީހުން ކޮވިޑް-19 އަށް ޓެސްޓްކުރުމުގެ މަސައްކަތް އެޗްޕީއޭ އިން އަންނަނީ ކުރަމުންނެވެ.