ލޮކްޑައުނާ އެކު މޯލްޑިވިއަން ޑޮމެސްޓިކް ދަތުރުތައް މެދުކަނޑާލައިފި

މާލެ ސަރަހައްދު ލޮކްޑައުން ކުރުމާ އެކު މޯލްޑިވިއަންގެ ޑޮމެސްޓިކް ހުރިހާ ދަތުރެއް މެދުކަނޑާލައިފި އެވެ.

މޯލްޑިވިއަން އިން ބުނީ ލޮކްޑައުންގެ ހާލަތު ނިމުނުހާ އަވަހަކަށް ކެންސަލްވި ދަތުރުތައް އަލުން ޝެޑިއުލްކޮށް އެކަން ކަސްޓަމަރުންނަށް އަންގަމުން ގެންދާނެ ކަމަށެވެ.

ކޮވިޑް-19 ރާއްޖެއިން ފެނުނުތާ މަހަކަށް ވުރެ ގިނަ ދުވަސް ވެފައިވާ އިރު، މި ބައްޔާ ގުޅިގެން، މޯލްޑިވިއަންގެ ޑޮމެސްޓިކް ދަތުުރުތައް ވަނީ ވަރަށް ބޮޑަށް މަދު ވެސް ކޮށްފަ އެވެ.

މީގެ އިތުރުން މިދިޔަ މަހު ވެލާނާ އިންޓަނޭޝަނަލް އެއާޕޯޓް ބަންދުކުރުމާ ގުޅިގެން މޯލްޑިވިއަންގެ އިންޓަނޭޝަނަލް ޝެޑިއުލް ހުރިހާ ދަތުރެއް ވެސް ވަނީ ކެންސަލްކޮށްފަ އެވެ. އެކަމަކު ރާއްޖެއަށް ބޭނުންވާ މުދާ ގެންނާށާއި ބޭރުގައި ތިބި ދިވެހިން އުފުލަން، ހާއްސަ ފްލައިޓްތަކެއް އަންނަނީ ބާއްވަމުންނެވެ.

މާލެ ލޮކްޑައުންކުރުމާ އެކު މާލެއިން މީހުން ފޭބުމާއި މާލެއަށް މީހުން އައުން ވެސް މަނަ އެވެ. އެހެންކަމުން ހާއްސަ ހާލަތެއްގައި ނޫނީ އާންމު އެހެން ދަތުރުފަތުރު ވެސް މިހާރު ވަނީ ހުއްޓުމަކަށް އައިސްފަ އެވެ.

މާލެ ލޮކްޑައުން ކޮށްފައިވަނީ މާލެއިން ކޮވިޑް-19 އަށް ޕޮޒިޓިވް މީހަކު ފެނުމުންނެވެ. މިދިޔަ ބުދަ ދުވަހުން ފެށިގެން މިއަދާ ހަމައަށް މާލެއިން ޕޮޒިޓިވްވި މީހުންގެ އަދަދު މިހާރު ވަނީ 15 އަށް އަރައިފަ އެވެ.