ފާޑިނަންޑްގެ ހަނދާނުން ނުފިލި 2011ގެ ފައިނަލް

ލަންޑަން (އޭޕްރީލް 14) - ފުޓްބޯޅަ ކެރިއަރާ މެދު ވިސްނާއިރު އެންމެ ހިތި ތަޖުރިބާއެއްގެ ގޮތުގައި ހަނދާން ހުންނަނީ 2011 ވަނަ އަހަރުގެ ޗެމްޕިއަންސް ލީގުގެ ފައިނަލުގައި ބާސެލޯނާ އަތުން 3-1 މެންޗެސްޓާ ޔުނައިޓެޑް ބަލިވި މެޗުގެ ކަމަށް އެ ޓީމަށް އޭރު ކުޅުނު ޑިފެންޑަރު ރިއޯ ފާޑިނަންޑް ބުނެފި އެވެ.

ލަންޑަންގެ ވެމްބްލީ ސްޓޭޑިއަމްގައި ކުޅުނު ފައިނަލުގައި ޕެޑްރޯ ރޮޑްރިގޭޒްގެ ގޯލުން ބާސެލޯނާ ލީޑުނަގާފައިވަނިކޮށް ޔުނައިޓެޑަށް އެއްވަރުކޮށްދިނީ ވޭން ރޫނީ އެވެ. އެކަމަކު ދެ ވަނަ ހާފުގައި ލިއޮނަލް މެސީ އާއި ޑޭވިޑް ވިލާ ޖެހި ގޯލުތަކުން، ޕެޕް ގާޑިއޯލާގެ ކޯޗުކަމުގައި ކުޅުނު ބާސެލޯނާ މޮޅުވީ އެވެ.

ލީޑްސް ޔުނައިޓެޑް ދޫކޮށް 2002 ވަނަ އަހަރު އޭރު ދުނިޔޭގެ އެންމެ އަގުބޮޑު ޑިފެންޑަރު ގޮތުގައި ޔުނައިޓެޑަށް ބަދަލުވި ފާޑިނަންޑް ބުނީ 2011 ގެ ފައިނަލުގައި ބާސެލޯނާ އިން ޔުނައިޓެޑަށް ދިނީ ފުޓްބޯޅައިގެ ފިލާވަޅެއް ކަމަށެވެ.

"ބާސެލޯނާ ކުޅުންތެރިން ތަށްޓާ އެކު އުފާފާޅުކުރާތަން ފެނުނީމަ އަހަރެން ގިގްސް އާއި ސްކޯލްސް ގާތުގައި ބުނިން މި މަންޒަރު ބަލަން ހުންނަން ވަރަށް އުނދަގޫ ކަމަށް. މެޗު ދިޔަ ގޮތުން ލަދުވެތިވާ ކަމަށް. ބާސެލޯނާ ކުޅުނީ އެހާ ވެސް ފުރިހަމަކޮށް،" ފާޑިނަންޑް ބުންޏެވެ.

އެ މެޗުގައި ވެސް އެންމެ ބޮޑު ތަފާތެއް ދެއްކީ މެސީ އެވެ. ފާޑިނަންޑް ބުނީ މެސީގެ ހުނަރު އޭނާ އަށް އެންމެ ބޮޑަށް ތަޖުރިބާކުރެވިގެންދިޔައީ އެ މެޗުން ކަމަށެވެ.

"މެސީގެ ޖާދޫ އެންމެ ފުރިހަމަ އަށް ފެނުނު އެއް މެޗު އެއީ. ރޮނާލްޑީނިއޯ ވެސް އާދަޔާހިލާފަށް މޮޅު އެއީ ވެސް ފުޓްބޯޅައިގައި ޖާދޫ ހަދާ މީހެއް. އެކަމަކު މެސީ ކޮންމެ ކަމެއް ކުރިޔަސް ނުރައްކާ އޮވޭ. އޭނާ ފަށާ އެޓޭކް ނިމޭނީ އޭނަގެ ގޯލަކުން ނޫނީ އެހެން ކުޅުންތެރިޔަކަށް ގޯލެއް ޖަހައިދޭން ފުރުސަތު ތަނަވަސްކޮށްދީގެން،" ފާޑިނަންޑް ބުންޏެވެ.

ބާސެލޯނާ އިން 2009 ގެ ޗެމްޕިއަންސް ލީގު ކާމިޔާބުކުރީ އިޓަލީގެ ރޯމްގައި ކުޅުނު ޔުނައިޓެޑް އަތުން 2-0 އިން މޮޅުވެގެންނެވެ. އެ މެޗުގައި ވެސް ބާސެލޯނާގެ ދެ ވަނަ ގޯލު ޖެހީ މެސީ އެވެ. ފާޑިނަންޑް ބުނީ މުޅި މެޗުގެ ކުޅުމަށް ބަލާއިރު 2011 ފައިނަލުގައި މެސީ އާދަޔާހިލާފަށް މޮޅު ކަމަށާއި ވެމްބްލީގައި ކުޅުނު ފައިނަލެއްގައި އެ ފަދަ ކުޅުމެއް އެހެން ކުޅުންތެރިޔެއްގެ ފަރާތުން ނުފެންނަ ކަމަށެވެ.

މިހާރު އުމުރުން 41 އަހަރުގެ ފާޑިނަންޑް 2015 ވަނަ އަހަރު ފުޓްބޯޅައިން ރިޓަޔަކުރީ އޭނާގެ އަންހެނުން ރެބެކާ އެލިސަން އުރަމަތީގެ ކެންސަރަށް ފަރުވާ ހޯދަމުން ދަނިކޮށް މަރުވުމާ ގުޅިގެންނެވެ. އޭގެ ފަހުން އޭނާ އަންނަނީ އަމިއްލަ ޔޫޓިއުބް ޗެނަލެއް މެދުވެރިކޮށް ފުޓްބޯޅަ ޕްރޮގްރާމްތައް ހުށަހެމުގެ އިތުރުން ބީޓީ ސްޕޯޓްސް އާއި ސްކައި ސްޕޯޓްސްގެ އެނަލިސްޓެއްގެ ގޮތުގައި މަސައްކަތް ކުރަމުންނެވެ.