ޓްވިޓާގެ ކޮންޓްރޯލް ޓްރަމްޕުގެ އެކުވެރިއަކަށް؟

ޓްވިޓާ އަށް ދެވިހިފާފައިވާ އެމެރިކާގެ ރައީސް ޑޮނަޑްލްޑް ޓްރަމްޕާއި އޭނާގެ ރިބަޕްލިކަން ޕާޓީ އަށް ހަރަދުކުރާ އެމެރިކާގެ މަޝްހޫރު ވިޔަފާރިވެރިޔާ ޕޯލް އެލިއަޓް ސިންގާ ޓްވިޓާގެ ހިއްސާގެ "ބޮޑު ބައެއް" ގަނެފައިވާ ކަމަށާއި އޭގެ ސީއީއޯ ޖެކް ޑޯޒީގެ އަތުން ކޮންޓްރޯލް ނަގަން މަސައްކަތްކުރަމުންދާ ކަމަށް ރިޕޯޓްތައް ބުނެފި އެވެ.

ބައެއް ނޫސްތަކުން ބުނެފައިވާ ގޮތުގައި ޖެކްގެ އަތުން ޓްވިޓާގެ ކޮންޓްރޯލް އަތުލުމަށް ފަހު، އެ ޕްލެޓްފޯމަށް ޓްރަމްޕް ބޭނުންވާ ބައެއް ބަދަލުތައް ގެންނާނެ އެވެ. އޭގެ ތެރޭގައި އެ ޕްލެޓްފޯމް ބޭނުންކުރާ މީހުން ހިއްސާކުރާ މައުލޫމާތުގެ ތެދުދޮގު ކަށަވަރުކުރަން ރަތާއި އޮރެންޖް ކުލައިގެ ލޭބަލްތަކެއް ތައާރަފުކުރާނެ ކަމަށްވެ އެވެ.

ބްލޫމްބާގުން ރިޕޯޓްކޮށްފައިވާ ގޮތުގައި ޕޯލްގެ ކުންފުނި އެލިއަޓް މެނޭޖްމަންޓުން ޓްވިޓާގެ ހިއްސާ ގަތުމަށް ފަހު، އެ ކުންފުނިން މިހާރު ވަނީ ޓްވިޓާގެ ބޯޑަށް އައްޔަންކުރާނެ ހަތަރު މެމްބަރަކު ވެސް ނޮމިނޭޓްކޮށްފަ އެވެ. އަދި އެލިއަޓް މެނޭޖްމަންޓުން ޓްވިޓާގެ ހިއްސާ ގަތުމާ އެކު، ޓްވިޓާގެ ހިއްސާގެ ބާޒާރަށް 7 ޕަސެންޓްގެ ކުރިއެރުމެއް އައިސްފައިވާ ކަމަށް މީޑިއާތަކުން ބުނެ އެވެ.

ޓްވިޓާގެ ސީއީއޯ ޖެކް، 43، އަކީ މި ވަގުތު ޓްވިޓާގެ އިތުރުން ފަސް ބިލިއަން ޑޮލަރުގެ ރައުސުލްމާލެއް އޮތް އިތުރު ކުންފުންޏެއްގެ ހަމައެކަނި ސީއީއޯ ވެސް މެ އެވެ. އެގޮތުން އޭނާ އަކީ މޮބައިލް ޕޭމަންޓް ކުންފުނި ސްކެއާގެ ވެސް ސީއީއޯ ވެސް އެވެ.

އެހެންވެ ސިންގާ، 75، ގެ އަމާޒަކީ ޓްވިޓާގެ ސީއީއޯގެ މަގާމަށް އައުން ކަމަށް ވެސް ރިޕޯޓްތައް ބުނެ އެވެ. ޓްވިޓާގެ ވެރިއަކަށް ޕޯލް ވުމަކީ، ޓްރަމްޕް ޓްވިޓާ އަށް ކުރާ ތުހުމަތުތަކަށް ނިމުމެއް ގެންނާނެ ކަމެއްގެ ގޮތުގައި ގަބޫލުކުރެ އެވެ. ޓްރަޕްމް ވިދާޅުވާ ގޮތުގައިި ޓްވިޓާ އިން އޭނާއާ ދޭތެރޭ ތަފާތުކުރުންތަކެއް ގެންގުޅެ އެވެ.