އަޅުގަނޑުގެ މައްޗަށް ވެސް ތަހުގީގު ހިންގަވާ: އަލީ ވަހީދު

ޓޫރިޒަމް މިނިސްޓަރު އަލީ ވަހީދު، އެކުގައި މަސައްކަތް ކުރައްވާ ބައެއް ވަޒީރުންނަށް ނިސްބަތް ކުރައްވައި ވަރަށް ހުތުރު ބަހުން ބައެއްގެ ތެރޭގައި ވާހަކަ ދައްކަވާ އޯޑިއޯތަކެއް އާންމު ވެފައިވާއިރު، އޭނާގެ މައްޗަށް ވެސް ތަހުގީގެއް ހިންގުމަށް އޭނާ އަމިއްލަ އަށް މިއަދު ގޮވާލައްވައިފި އެވެ.

ޓްރާންސްޕޯޓް މިނިސްޓަރު އާއިޝަތު ނަހުލާ އަށް ވެސް ގުޅުއްވައި ދަށުދަރަޖައިގެ ވާހަކަތަކެއް އަލީ ވަހީދު ދައްކަވާ ކަމަށް ބުނާ އޯޑިއޯއެއް ވެސް ސޯޝަލް މީޑިއާގައި ލީކް ކޮށްލައިފަ އެވެ. އަދި އެޑިއުކޭޝަން މިނިސްޓަރު ޑރ. އާއިޝަތު އަލީ އާއި ހެލްތު މިނިސްޓަރު އަބްދުﷲ އަމީނަށް ނިސްބަތް ކުރައްވައި ވަރަށް ހަޑި ހުތުރު ބަހުން ވާހަކަ ދެއްކެވި އޯޑިއޯ އެއް ވެސް މި ތިން ދުވަސް ތެރޭގައި އާންމުވި އެވެ. މީގެ އިތުރުން އަލީ ވަހީދާއި ޔޫތު އެންޑް ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްހަދު އަލީއާ އެކު ކޮރަޕްޝަންގެ ސައްލާއެއް ކުރައްވާ އޯޑިއޯ ވެސް ސޯޝަލް މީޑިއާގައި އިއްޔެ ރޭ ލީކްކޮށްލާފައި ވެ އެވެ.

މި އޯޑިއޯތަކާ ގުޅޭ ގޮތުން މިހާތަނަށް ކުރެއްވި ދެވަނަ ޓުވީޓުގައި އަލީ ވަހީދު މިއަދު ވިދާޅުވީ، ދައުރު ކުރަމުންދަނީ ސައްހަ އޯޑިއޯތަކެއް ނޫން ކަމަށެވެ.

"އެކި އަޑު އެކި ގޮތަށް ގެނެސް ރޭވިގެން ހިންގާ ވަރަށް ދަށުދަރަޖައިގެ ހުތުރު ޖަރީމާއެއް. ފުރިހަމަ ތަހުގީގެއް ކުރުމުން ހަގީގަތް ސާފުވާނެ. އަޅުގަނޑުގެ މައްޗަށް ވެސް ތަހުގީގު ހިންގަވާ. ހަގީގަތް ފެންނާނެ،" ޖުމްހޫރީ ޕާޓީގެ ސްލޮޓެއްގައި ވަޒީރުކަމަށް އައްޔަން ކުރައްވާފައިވާ އަލީ ވަހީދުގެ ޓުވީޓުގައި ވެ އެވެ.

ޖުމްހޫރީ ޕާޓީގެ ރައީސްގެ މަގާމުގައި ހުންނެވި އެކަމަކު އެ ޕާޓީގެ ލީޑަޝިޕާ މެދު އުފެދުނު ހިޔާލު ތަފާތުވުމެއްގައި، ޕާޓީގެ ހަރަކާތްތަކާ މިހާރު ދުރުގައި ހުންނެވި އަލީ ވަހީދުގެ މި އޯޑިއޯތަކާ ގުޅިގެން އޭނާ މަގާމުން ވަކިކުރުމަށް ނުވަތަ އަމިއްލަ އަށް އިސްތިއުފާ ދެއްވުމަށް މިހާރު ދަނީ ގޮވައިލަމުންނެވެ.