ބޮލީވުޑްގެ ޚަބަރުތައް ކުރުކޮށް

އުންމީދީ ޒުވާން ބަތަލާ ބޫމީ ޕެޑްނޭކަރު މައިގަނޑު ކެރެކްޓާ ކުޅޭ ބިރުވެރި ފިލްމު "ދުރުގާވަތީ" ގެ ޝޫޓިން ފަށައިފި އެވެ.

ޖީ އަޝޯކް ޑައިރެކްޓްކުރާ މި ފިލްމަކީ އަކްޝޭ ކުމާރުގެ ފިލްމު ކުންފުނި ކޭޕް އޮފް ގުޑް ހޯޕްސް އާއި ބުޝަން ކުމާރުގެ ޓީ ސީރީޒްގެ އިތުރުން އަބުންދާތީއާ އެންޓަޓައިންމަންޓް ގުޅިގެން ހަދާ ފިލްމެކެވެ.

ރިލީޒްކުރާނެ ތާރީހެއް އަދި އިއުލާންނުކުރާ "ދުރުގާވަތީ" ގެ ކާސްޓްގައި މާހީ ގިލް ވެސް ހިމެނެ އެވެ.

މި އަހަރު ބޫމީ ފެނިގެންދާ އެހެން ބިރުވެރި ފިލްމެއް ވެސް ސިނަމާތަކަށް އަންނާނެ އެވެ. އެއީ

އަންމަ މަހުގެ 21 އަށް ތާވަލުކޮށްފައިވާ ކަރަން ޖޯހަރުގެ ދަރުމާ ޕްރޮޑަކްޝަންގެ "ބޫތު-ޕާޓް ވަން: ހޯންޓެޑް ޝިޕް އެވެ.

"ސްޓްރީޓް ޑާންސާ" އަށް ހަތަރު ތަރި

ހުކުރު ދުވަހު ސިނަމާތަކުގައި ދައްކަން ފެށި ޑައިރެކްޓަރު ރެމޯ ޑި ސޫޒާގެ ފިލްމު "ސްޓްރީޓް ޑާންސް" ކްރިޓިކުންނަށް ވަރަށް ކަމުދިޔަ ފިލްމަކަށްވެއްޖެ އެވެ.

ވަރަށް ގިނަ ކްރިޓިކުން މި ފިލްމަށް ފަސް ތަރިން ހަތަރު ތަރީގެ ރޭޓިންއެއް ދީފައިވާ އިރު، މަޝްހޫރު ފިލްމު ކްރިޓިކް ތަރަން އަދާޝް ބުނީ މިއީ ހުރިހާ ރަހަތައް ހެޔޮވަރު ފިލްމެއް ކަމަށެވެ. "ސްޓްރީޓް ޑާންސާ" އަށް އޭނާ ވެސް ހަތަރު ތަރީގެ ރޭޓިންއެއް ދެމުން ފިލްމު ސިފަކޮށްފައި ވަނީ ބަލައިލަން ހިތްގައިމު "ޑިލައިޓްފުލް" ފިލްމެއްގެ ގޮތުގަ އެވެ.

ތަރަން ފާހަގަކުރި ގޮތުގައި މި ފިލްމަކީ ޒުވާނުންނަށް ވަރަށް ކަމުދާނެ ފިލްމެކެވެ. އަދި ވަރަށް އަވަހަށް "ސްޓްރީޓް ޑާންސާ" 100 ކްރޯޑް ރުޕީސް (14 މިލިއަން ޑޮލަރު) ހަމަކުރާނެ ކަމުގެ އުންމީދު ބޮޑު ކަމަށް ބުންޏެވެ.

މި ފިލްމުގެ ތަރިންނަކީ ވަރުން ދަވަން އާއި ޝްދަރާ ކަޕޫރެވެ. އަދި ފިލްމުގެ ރޯލަކުން ނޯރާ ފަތެހީ އާއި ޕްރަބޫދޭވާ ވެސް ފެނިގެންދެ އެވެ.

"ޓައިގާ" ސީރީޒްގެ ތިނެއް ޕްރަބޫދޭވާ އަށް

ޓައިގާ ކިޔާ ކެރެކްޓާއެއް ސަލްމާން ޚާން ކުޅޭ އެކްޝަން ފިލްމުގެ ތިން ވަނަ ބައި ޑައިރެކްޓްކުރަން ޕްރަބޫދޭވަ އަށް ހުށަހަޅާފއިވާ ކަމަށް ރިޕޯޓްތައް ބުނެފި އެވެ.

ސަލްމާނާއި ކެޓްރީނާ ކެއިފް މައިގަނޑު ރޯލްތައް ކުޅޭ މި ސީރީޒްގެ ފުރަތަމަ ބައި "އޭކް ތަ ޓައިގާ" 2012 ގައި ކަބީރު ޚާން ޑައިރެކްޓްކުރި އިރު، 2018 ގައި "ޓައިގާ ޒިންދާ ހޭ" ގެނެސްދިނީ އަލީ އައްބާސް ޒަފަރެވެ.

އެ ދެ ފިލްމު ވެސް ޕްރޮޑިއުސްކުރީ ޔާޝްރާޖް ފިލްމްސް (ވައިއާރްއެފް) އިންނެވެ.

ޕްރަބޫދޭވޭ އަކީ މިދިޔަ މަހު ރިލީޒްކުރި ސަލްމާންގެ "ދަބަންގް 3" ގެ ވެސް ޑައިރެކްޓަރެވެ. އަދި ސަލްމާން މި އަހަރު ފިތުރު އީދުގައި ގެނެސްދޭ "ރާދޭ: އިންޑިއާސް މޯސްޓް ވޯންޓެޑް ބާއީ" ގެ ޑައިރެކްޓަރަކީ ވެސް ޕްރަބޫދޭވާ އެވެ.

އަމީޝާގެ އާ ފިލްމެއް

ބޮޑު ކާމިޔާބީއެއް ހޯދި ރިތިކް ރޯޝަންގެ ފިލްމު "ކަހޯ ނާ ޕިޔާރު ހޭ" އިން މީގެ 20 އަހަރު ކުރިން ބޮލީވުޑަށް ނުކުތް ނަމަވެސް މިހާތަނަށް މާ ބޮޑު ކުރިއެރުމެއް ނުލިބުނު ބަތަލާ އަމީޝާ ޕަޓޭލް އާ ފިލްމެއްގެ މަސައްކަތް ފަށައިފި އެވެ.

"ތޯބާ ތޭރާ ޖަލްވާ" ގެ ނަން ދީފައިވާ މި ފިލްމުގެ ޕޯސްޓަރު ވެސް މިހާރު ދައްކާލާފައިވާ އިރު، އަމީޝާ އެކު މީގެ ކާސްޓުންގެ ތެރޭގައި ހިމެނެނީ ޖަތިން ކްރާނާ އާއި އެންގެލާ ކްރިސްލިންޒްކީ އެވެ.

މާ ބޮޑު ތަފުސީލެއް އަދި ހިއްސާނުކުރާ މި ފިލްމުގެ ފުރަތަމަ ޝޫޓިން ޝެޑިއުލް ނިންމައިލުމަށް ފަހު އަންނަ މަހު ދެވަނަ ޝެޑިއުލް ފަށަން އަންނަނީ ތައްޔާރުވަމުންނެވެ.

އަމީޝާ އެންމެ ފަހުން ސްކްރީނުން ފެނިފައި ރިލީޒްނުކޮށް ގިނަ ދުވަސްތަކެއްވެފައި ވަނިކޮށް 2018 ގައި ސިނަމާތަކަށް ގެނައި ސަނީ ޑިއޯލްގެ "ބައްޔާޖީ ސުޕަހިޓް" އިންނެވެ.