ހުޅުމާލޭގައި ހިނގި ހަމަނުޖެހުމުގައި އަންހެން މީހާއަށް އަނިޔާކުރި މައްސަލަ ބަލަން ފަށައިފި

ހުޅުމާލޭގައި މިދިޔަ ހުކުރު ދުވަހު ހިންގި ހަމަނުޖެހުމުގައި އަންހެނަކަށް ފުލުހަކު އަނިޔާކުރި މައްސަލަ ބަލަން ފަށައިފި އެވެ.

ގއ. ކަނޑުހުޅުދޫގައި ރޭޕްގެ ޝިކާރައަކަށްވި، ދެ އަހަރު ވެސް ނުވާ ކުއްޖާގެ ބައްޕަ، ދިރިއުޅެމުންދިޔަ ފްލެޓު ކައިރީގައި، ފުލުހުންނާއި އާއްމުންގެ މެދުގައި ހިންގި ހަމަނުޖެހުމުގައި އަނިޔާވީ މެދު އުމުރުގެ އަންހެނަކަށެވެ. އޭނާގެ ނޭފަތާ ދިމާލުން ގިނަ އަދަދަކަށް ލޭ އައިސް ހުއްޓެވެ.

ހަމަނުޖެހުންތަކުގައި، ކުޑަކުއްޖާގެ ބައްޕަ ދިރިއުޅެމުންދިޔަ ފްލެޓުގެ ބިއްލޫރިތައް ތަޅާލާފައިވެ އެވެ. އަދި އެ ސަރަހައްދުގައި ތިބި މީހުން ކޮންޓްރޯލް ކުރަން ފުލުހުން ޕެޕަ ސްޕްރޭ ވެސް ޖަހާފައިވެ އެވެ.

ޕޮލިސް ކޮމިޝަނަރު މުހައްމަދު ހަމީދު މިއަދު ކުރެއްވި ޓްވީޓެއްގައި ވިދާޅުވީީ ހުޅުމާލޭ ފްލެޓް 108 ކައިރީގައި އޮތް ހާލަތުގެ ތެރޭގައި މެދު އުމުރުގެ އަންހެނެއްގެ ގައިގައި ފުލުސް އޮފިސަލަކު ޖެހި ކަމަށް ތުހުމަތުކުރެވޭ މައްސަލަ ސަމާލުކަމަށް އައިސްފައިވާ ކަމަށެވެ. އެ އާއިލާގެ މެމްބަރަކާ އިއްޔެ ވާހަކަ ދައްކަވާފައިވާ ކަމަށާއި ފުލުހުންގެ ޕްރޮފެޝަަނަލް ސްޓެންޑާޑް ޓީމަކުން ވެސް އޭނާ ކައިރި އަށް ޒިޔާރަތްކޮށްފައިވާ ކަމަށް ވިދާޅުވި އެވެ.

"މައްސަލައިގެ ތަހުގީގު ވަނީ ފަށާފައި،" ކޮމިޝަނަރުގެ ޓްވީޓުގައި ވެ އެވެ.

ފުލުހުންގެ ސްޕޯކްސްޕާސަން، ޗީފް އިންސްޕެކްޓާ އޮފް ޕޮލިސް އިޒްމިއާ ޒާހިރު މިއަދު ވިދާޅުވީ، ހުޅުމާލޭގައި ހުކުރު ދުވަހު އޮތް އެއްވުން ކޮންޓްރޯލް ކުރުމަށް ފުލުހުން ބާރުގެ ބޭނުން ކުރުމުގެ ތެރޭގައި އަންހެނެއްގެ ނޭފަތް ފަޅައިގެން ގޮސްފައިވާ މައްސަލަ ފުލުހުން ޕްރޮފެޝަނަލް ސްޓޭންޑާޑްސް ކޮމާންޑުން ހަމަ އެ ދުވަހު ތަހުގީގު ކުރަން ފަށާފައިވާ ކަމަށެވެ.

"ފުލުހުން ބާރުގެ ބޭނުންކުރާ ހާލަތްތަކުގައި ބާރުގެ ބޭނުން ކުރެވުނު ގޮތް ރިވިއު ކުރުމަށް އެކުލަވާލާފައިވާ 'ޔޫޒް ފޯސް ރިވިއު ކޮމިޓީ' އިން މިފަދަ ކޮންމެ ހާދިސާއެއް ރިވިއު ކުރާ ފަދައިން އެ ކޮމިޓީން މި ހާދިސާ ވެސް ރިވިއު ކުރަމުންދާ ކަމުގައި ދަންނަވަން،" އިޒްމިއާ ވިދާޅުވި އެވެ.

އަނިޔާވި މީހާގެ އަންހެން ދަރިއަކު ފޭސްބުގައި ލިޔެފައިވާ ގޮތުގައި، އޭނާގެ މަންމަ ގޭ ދޮރުމަތީގައި ހުރީ އޭރު ހިނގަމުން ދިޔަ ކަންތައްތައް ބަލައިލުމަށް ކަމަށެވެ. އެހެން ހުއްޓައި ފުލުހަކު ގޮސް މުގުރުން މަންމަގެ މޫނުގައި ޖަހައި، އެ ސަރަހައްދުގައި ތިބި އެންމެން ގެއަށް ވަންނާށޭ ކިޔައި ހަޅޭއްލެވި ކަމަށް ބުންޏެވެ.

"ދެން އެ މީހުން އަހަރެން ކޮއްޕާލައި މަންމަ މި ކޮއްޕާލީ ބައިސްކަލު ތަކެއްގެ ތެރެއަށް. އެއީ ރޭޕިސްޓެއް ނޫން. އެއީ ކުށްވެރިއެއް ނޫން،" މަންމަ އަށް ލިބިފައިވާ ޒަހަމްތަކުގެ ފޮޓޯއާ އެކު އަންހެން ކުއްޖާ ލިޔެފައި ވެ އެވެ.

"މައުސޫމް އެ ކުއްޖާގެ ބައްޕަ، ރަހުމްކުޑަކޮށް ރޭޕްކުރި މީހާ ގެންދިޔައިރު ވެސްޓާއި ހެލްމެޓް އަޅާފައި ހުރި. އެކަމަކު މިއީ، ގޭ ދޮރުމަތީގައި ހުރި ރައްޔިތު މީހާއާ މެދު ފުލުހުން ކަންތައްކުރި ގޮތް."

އެ ހަމަނުޖެހުންތަކާ ގުޅިގެން 27 މީހަކު ފުލުހުންގެ ބެލުމުގެ ދަށަށް ގެންދިޔަ އެވެ. އޭގެ ތެރެއިން ބަންދުގައި 19 މީހުން ތިބިކަމަށް ފުލުހުން އިއްޔެ ބުންޏެވެ.