ކަފާލާތުގެ ދަށުން ރާޖަޕަކްސާގެ ކޮއްކޮ ދޫކޮށްލައިފި

ކޮލަމްބޯ (އޮކްޓޯބަރު 2) - ސަރުކާރުގެ ހަތިޔާރުތައް އަމިއްލަ ކުންފުންޏަކަށް ދީގެން ނާޖާއިޒު ގޮތުގައި ފައިދާ ހޯދާފައިވާތީ ކޮރަޕްޝަނުގެ ދައުވާ މިހާރު އުފުލާފައިވާ ކުރީގެ ބާރުގަދަ ޑިފެންސް ސެކްރެޓަރީ ގޮތަބަޔާ ރާޖަޕަކްސާ ކަފާލާތުގެ ދަށުން ކޯޓުން ދޫކޮށްލައިފި އެވެ.

ކުރީގެ ރައީސް މަހިންދާ ރާޖަޕަކްސާގެ ކޮއްކޮ ގޮތަބަޔާ ކޮލަމްބޯ މެޖިސްޓްރޭޓް ކޯޓުގެ ފަނޑިޔާރު ގިހާން ޕިލަޕިޓިޔާގެ އަމުރަށް ދޫކޮށްލީ ކޯޓުގައި 200،000 ރުޕީސް ބެހެއްޓުމަށް ފަހު އެވެ. ގޮތަބަޔާގެ ޝަރީއަތުގެ އަޑުއެހުމެއް ދެން އޮންނާނީ ޑިސެމްބަރު 1 ގަ އެވެ.

ހަތިޔާރު ބޯޓުގެ މައްސަލާގައި އިތުރު ހަތް މީހަކު ވެސް ވަނީ ކޯޓުން ދޫކޮށްލައިފަ އެވެ. އޭގެ ތެރޭގައި ސަރުކާރުގެ ހަތިޔާރު ބޭނުންކޮށްގެން ކަނޑުމަތީގައި ސަލާމަތީ ގޮތުން ޚިދުމަތް ދިން ކުންފުނި ކަމަށްވާ އެވަންޓް ގާޑް މެރިޓައިމް ސާވިސްގެ ޗެއާމަން ނިސާންކާ ސެނާދިޕަތީ ވެސް ހިމެނެ އެވެ.

ކުރީގެ ސަރުކާރުގެ ކޮރަޕްޝަނުގެ މައްސަލަތައް ބަލާ ސްޕެޝަލް އެންޓި-ކޮރަޕްޝަން ކޮމިޝަނުގެ ފަރާތުން ގޮތަބަޔާގެ މައްޗަށް ދައުވާ ކުރަނީ ސަރުކާރުގެ ހަތިޔާރުތައް އަމިއްލަ ކުންފުންޏަކަށް ދީގެން ނާޖާއިޒު ގޮތުގައި ފައިދާ ހޯދާފައިވާތީ އެވެ. ގޮތަބަޔާ ހިންގެވި ކޮރަޕްޝަނުން ދައުލަތަށް 75 މިލިއަން ޑޮލަރަށް ވުރެ ބޮޑު ގެއްލުމެއް ލިބިފައިވާ ކަމަށް ބުނެފައިވެ އެވެ.

ކަނޑުމަތީގެ ބޯޓެއްގައި އާމަރީއެއް ހަދައިގެން ހަތިޔާރު ގެންގުޅުމާއި ވެރިރަށް ކޮލަމްބޯ އިން ހަތިޔާރު ގުދަނެއް ފެނިފައި ވަނީ ރާޖަޕަކްސާގެ ވެރިކަން ނިމުނުތާ ކުޑަ ދުވަސްކޮޅެއްގެ ތެރޭގަ އެވެ. ގޮތަބަޔާގެ ނުފޫޒުން ހަތިޔާރު ސަޕްލައިކޮށްދީފައިވާ އެވަންޓް ގާޑް ސެކިއުރިޓީ ސާވިސް ކުންފުނިން ބުނެފައި ވަނީ ކަނޑުމަތީގެ އާމަރީ ބޭނުންކޮށްފައި ވަނީ ކަނޑުފޭރޭ ބޯޓުތަކުން ހިމާޔަތް ހޯދައިދިނުމަށް ކަމަށެވެ.

ރާޖަޕަކްސާ އާއިލާގެ އެހެން ބައެއް މީހުންގެ މައްޗަށް ވެސް ވަނީ ކޮރަޕްޝަނުގެ ދައުވާކޮށްފަ އެވެ. ލަންކާގެ ރައީސް މައިތުރިޕާލާ ސިރިސޭނާ ވިދާޅުވެފައި ވަނީ ރާޖަޕަކްސާގެ 10 އަހަރުގެ ވެރިކަމުގައި ސަރުކާރުގެ ފައިސާ އިން ބިލިއަން ޑޮލަރުން ޚިޔާނާތްތެރިވެފައިވާ ކަމަށެވެ. އަދި ކޮރަޕްޝަނުގެ މައްސަލަތައް ބަލާ އެ ފައިސާ އަނބުރާ ހޯއްދަވާނެ ކަމަށް ވަނީ ވިދާޅުވެފަ އެވެ. އިދިކޮޅު މެންބަރެއްގެ ގޮތުގައި ޕާލަމެންޓުގައި މިހާރު ހިމެނޭ ރާޖަޕަކްސާގެ މައްޗަށް ވެސް ވަނީ ކޮރަޕްޝަނާއި އިންސާނީ ހައްގުތަކާއި ޚިލާފުވިކަމުގެ ތުހުމަތުކޮށްފަ އެވެ.