ކެންސަރުގެ ބޭސްތަކަށް ހާއްސަ ފިހާރައެއް އައިޖީއެމްއެޗްގައި ހުޅުވައިފި

ކެންސަރުގެ ބަލިތަކަށް ހާއްސަ ބޭސް ފިހާރައެއް އައިޖީއެމްއެޗްގައި މިއަދު ހުޅުވައިފި އެވެ.

މި ފާމަސީ ރަސްމީކޮށް ހުޅުއްވައިދެއްވީ އެ ހޮސްޕިޓަލުގެ ސީއީއޯ އިބްރާހިމް ސަލީމާއި ކެންސަރުގެ އޮޕަރޭޝަންތަކަށް ހާއްސަ ރާއްޖޭގެ ފުރަތަމަ ޑޮކްޓަރު މުހައްމަދު ޝިފާނެވެ.

މި ފާމަސީގެ ހިދުމަތް ކޮންމެ ދުވަހެއްގެ ހެނދުނު 9:00 އިން ހަވީރު 4:00 އަށް ލިބޭނެ އެވެ.

ފާމަސީ ހުޅުއްވައިދެއްވުމަށް ފަހު ސަލީމް ވިދާޅުވީ އެ ހޮސްޕިޓަލުން މަސައްކަތްކުރަނީ އެ ތަނުގެ ހިދުމަތް ވީހާ ވެސް ފަސޭހައިން ފޯރުކޮށްދޭން ކަމަށެވެ. އަދި ކެންސަރާ ބެހޭ ޑިޕާޓްމެންޓު ތެރޭގައި މިފަދަ ފާމަސީއެއް ހުޅުވީ އެ މަގްސަދުގައި ކަމަށް ވިދާޅުވި އެވެ.

ޝިފާން "މިހާރު" އަށް ވިދާޅުވީ އެ ފާމަސީގައި ކެންސަރާ ބެހޭ ސްޓޭންޑަޑް ބޭސްތަކެއް އަބަދު ވެސް ހުންނާނެ ކަމަށެވެ. ނަމަވެސް އެތަނުގައި ނެތް ބޭހެއް ދޭން ޑޮކްޓަރެއް އެދިފައިވާ ނަމަ، ހަފުތާއެއްގެ ތެރޭގައި ބޭރުން ގެނެސްދޭނެ ކަމަށް ވިދާޅުވި އެވެ.

"ކެންސަރުގެ ބޭހަކީ އެހެން ބޭސްތަކަށް ވުރެ ހާއްސަކޮށް ރައްކާކުރާ ބޭސްތަކަށް ވުމުން، ގިނައިން ގަނެ ސްޓޮކް ކުރާއިރު އޭގެ މުއްދަތު ހަމަވާތަން އާދޭ ބައެއް ފަހަރު. އޭގެ ބަދަލުގައި ބަލި މީހާ ބޭނުން ވީމަ ވަގުތުން ބައެއް ބޭސްތައް ގެނެސްދޭނެ" ޝިފާން ވިދާޅުވި އެވެ.

ބޭހުގެ އިތުރުން ކެންސަރަށް ފަރުވާ ހޯދާ މީހުން ބޭނުންވާ އެހެން ބައެއް ތަކެތި ވެސް އެ ފާމަސީން ލިބޭނެ ކަމަށް ޝިފާން ވިދާޅުވި އެވެ. އަދި ކުރިއަށް އޮތް ތަނުގައި މިހާރު ލިބޭ ބޭސްތަކަށް ވުރެ ގިނަ ބޭސް ލިބޭނެ ގޮތް ހަމަޖައްސާނެ ކަމަށް ވިދާޅުވި އެވެ.

އެ ފާމަސީން ލިބޭ ހުރިހާ ބޭހަކީ އާސަންދައިގެ ދަށުން ހިލޭ ލިބޭނެ ބޭހެވެ. އަދި ރާއްޖޭގެ މެޑިކަލް ކައުންސިލްގައި ރަޖިސްޓްރީކޮށްފައިވާ އޮންކޮލޮޖިސްޓެއް، އެހެން ހޮސްޕިޓަލަކުން ދީފައިވާ ބޭސް ސިޓީއާ އެއްގޮތަށް އެ ފާމަސީން ބޭސް ލިބޭނެ ކަމަށް އޭނާ ވިދާޅުވި އެވެ.

"ބަލި މީހާ އަށް ފަސޭހަ ކުރަން، ބަލި މީހާ ބޭނުންވާ ހުރިހާ ވަސީލަތްތަކެއް އެއްތަނަކުން ލިބޭނެ ގޮތް ހަމަޖައްސަން އަޅުގަނޑުމެން މި މަސައްކަތްކުރަނީ. ބޭސް ސިޓީ ހިފައިގެން ގިނަ ފާމަސީތަކަށް ދާން ޖެހޭ ގޮތް ހުއްޓާލަން،" ޝިފާން ވިދާޅުވި އެވެ.