ހޯޑެއްދޫ-މަޑަަވެލި ކޯޒްވޭ އެޅި އިރު ދެ ރަށް ހިމާޔަތްކުރަން އެދުނިން: މުއިއްޒު

ގއ.ހޯޑެއްދު އާއި މަޑަވެލި ގުޅާލި ކޯޒްވޭ ހެދި އިރު އެ ދެ ރަށް ހިމާޔަތްކުރަން ތޮއްޓެއްލާން ފިނޭންސް މިނިސްޓްރީގައި އެދިވަޑައިގެންނެވި ކަަމަށް ކުރީގެ ހައުސިން މިނިސްޓަރު ޑރ.މުހައްމަދު މުއިއްޒު މިއަދު ވިދާޅުވެއްޖެ އެވެ.

އެއް ފަޅެއްގައި އޮންނަ ހޯޑެއްދު އާއި މަޑަވެލި ގުޅުވައިދޭ ކޯޒްވޭގެ މަސައްކަތް ފެށީ ކުރީގެ ރައިސް އަބްދުﷲ ޔާމީންގެ ވެރިކަމުގައި 2016 ގަ އެވެ. އެ ކޯޒްވޭ ނިމުނުތާ މަހެއްހާ ދުވަސް ފަހުން 2018 ގައި ކޯޒްވޭގެ ސަބަބުން ދެ ރަށަށް އުދަ އަރާ ކަމަށް ބެލެވިގެން ރައްޔިތުން ނުކުމެ، ކޯޒްވޭ ކަނޑާލި އެވެ. އަދި އެއަށް ފަހު މިހާރު ވަނީ އަލުން ވެލި އަޅައި އެތަން ބައްދާލައިފަ އެވެ.

ރައްޔިތުންގެ މަޖިލީހުގެ އެންވަޔަރަމެންޓް ކޮމިޓީގެ މިއަދުގެ ބައްދަލުވުމަށް އެ މިނިސްޓްރީގެ މުވައްޒަފުންނާއި ކުރީގެ މިނިސްޓަރު މުއިއްޒާއި އެމްޓީސީސީގެ ކުރީގެ ވެރިން ހާޒިރުވެވަޑައިގެން ސުވާލުތަކަށް ޖަވާބު ދެއްވި އެވެ. ކޮމިޓީގެ މެމްބަރުން އެބޭފުޅުންނާ ތަކުރާރުކޮށް ސުވާލުކުރެއްވި އެއް ކަމަކީ ކޯޒްވޭއާ އެކު ތޮށްޓެއް ލާން އެންވަޔަަރްމެންޓް ޕްރޮޓެކްޝަން އެޖެންސީ (އީޕީއޭ) އިން އެންވަޔަރްމެންޓް އެސެސްމެންޓް ރިޕޯޓްގައި ބުނެފައިވާ ފިޔަވަޅުތައް ނޭޅި ސަބަބާ ގުޅޭ ގޮތުންނެވެ. އީއައިއޭ ރިޕޯޓްގައި ވެސް ބުނެފައި އޮތީ ކޯޒްވޭއާ އެކު ދެ ރަށުގެ ހިމާޔަތަށް ތޮށްޓެއް ލާން ޖެހޭ ކަމަށެވެ.

އެ ސުވާލަށް ޖަވާބު ދެއްވަމުން މުއިއްޒު ވިދާޅުވީ ހޯޑެއްދޫ-މަޑަވެލި ކޯޒްވޭ އެޅުމުގެ ހުރިހާ މަސަައްކަތެއް ވެސް ކުރީ އީއައިއޭގެ ރޫހާ އެއްގޮތަށް ކަމަށާއި އެކަމުގައި އެހެން ވުޒާރާތަކުން ލިބެން ޖެހޭ އެއްބާރުލުން ނުލިބުމަކީ ހައުސިން މިނިސްޓްރީގެ މައްސަލައެއް ނޫން ކަަމަށެވެ. އީއައިއޭ ރިޕޯޓްގައި ބުނެފައިވާ ތޮށި ލުމަކީ ކޯޒްވޭ އެޅުމުގެ މަަސައްކަތުގެ އަގަށް 40 އަކަށް ޕަސެންޓް އިތުރުވާނެ ކަމެއް ކަމަށާއި އެހެންވެ، ފިނޭންސް މިނިސްޓްރީން އެކަމުގެ ހުއްދަ ހޯދަން ހައުސިން މިނިސްޓްރީން އެދުނު ކަމަށް ވެސް އޭނާ ވިދާޅުވި އެވެ.

"ރިކޮމެންޑޭޝަންގައި އޮތް އެންމެ މުހިއްމު ކަންތައް އެއީ ރިޖް ލުމުގައި، އެއީ އިތުރު ޕްރޮޖެކްޓަކަށް ނުވަތަ ސާޅީހަކަށް ޕަސެންޓް ޕްރޮޖެކްޓްގެ އަގަށް އަރާ އެއްޗަކަށް ވާތީވެ އެކަމުގައި އަޅުގަނޑުމެން އޮތީ ހުއްދަ އަށް އެދިފައި. ދެން އެއީ ދެން އަންނަ އަހަރުގެ ބަޖެޓަށް ފޯލްވާ ގޮތަށް، ދެން އަންނަ އަހަރުގެ ބަޖެޓުން ވެސް ދެވޭނެ [ފައިސާއެއް]" މުއިއްޒު ވިދާޅުވި އެވެ.

ދައުލަތުގެ ބަޖެޓުން 29 މިލިއަން ރުފިޔާ ޚަރަދު ކޮށްގެން، ހެދި ކޯޒްވޭގެ ދިގުމިނުގައި 440 މީޓަރު އަދި ފުޅާމިނުގައި ހަތް މީޓަރު ހުރެ އެވެ. މަޑަވެއްޔާއި ހޯޑެއްދޫ ގުޅާލާފައި ވަނީ، އެ ދެމެދުގައި އޮންނަ ހާދޫ ކިޔާ ފަޅުރަށެއް ހިމަނައިގެން، އެ ރަށާ އެކު އެވެ. އެކަމަކު، ވިއްސާރަ މޫސުމުގައި އޮއިބާރު އަދި ވަރަށް ބޮޑަށް ފެން ދެމޭ އެ ސަރަހައްދު ބައްދާލައި، ވެލީގެ ފާލަމެއް އެޅުމުން، މޫސުން ގޯސްވާ ފަހަރުތަކުގައި، ފެން ދައުރުވާނެ ގޮތެއް ނެތި، ހޯޑެއްދޫގެ ހުރިހާ ފަރާތަކަށް ވެސް ރާޅު އަރަ އެވެ. އަދި ބައެއް ފަހަރު ކޯޒްވޭ މަތިން ވެސް ލޮނުގަނޑު އަރަ އެވެ. ފެން ދައުރު ކުރުމަށް، ތިން ސަރަހައްދެއް ކަނޑާފައި ހުރި ނަމަވެސް، އެތަން ކުޑަވުމުގެ ސަބަބުން، އެކަށީގެންވާ ގޮތެއްގައި އެތަނަކުން ފެން ދައުރެއް ނުކުރެ އެވެ.