އިލެކްޓްރިކް ކާރަށް ބަދަލުވުން ހޮންޑާ އިން އަވަސްކޮށްފި

ކުރިން ނިންމާފައި އޮތް ވަރަށް ވުރެ ތިން އަހަރު އަވަސްކޮށް، 2022 އިން ފެށިގެން ހޮންޑާ އިން ޔޫރަޕްގެ މާކެޓްތަކަށް މުޅިން ވެސް ވިއްކާނީ އިލެކްޓްރިކް ނުވަތަ ހައިބްރިޑް ކާރު ކަމަށް އެ ކުންފުނިން ބުނެފި އެވެ.

ޖަޕާނުގެ ހޮންޑާ އިން ބުނީ މިކަމަކީ ގްރީން ޓެކްނޮލޮޖީ އަށް ކުރާ މަސައްކަތުގެ ވަރަށް މުހިއްމު ބައެއް ކަމަށާއި ޔޫރަޕްގެ ގައުމުތަކަށް ބަލާ އިރު، ތިމާވެއްޓާ ރައްޓެހި އުފެއްފުންތަކަށް ދެމުން އަންނަ ސަމާލުކަން ވެސް ބޮޑުވަމުން އަންނަ ކަމަށެވެ.

އެހެންވެ ކުރިން ޕްލޭންކުރި ވަރަށް ވުރެ ތިން އަހަރު އަވަސްކޮށް، ޔޫރަޕްގެ މާކެޓެއް ބަދަލެއް ގެންނަން ނިންމުމަކީ ހޮންޑާ އަށް ލިބޭ ވަރަށް ބޮޑު ކުރިއެރުމެއް ކަމަށް ބުންޏެވެ.

"އަހަރެމެންނަށް ފާހަގަކުރެވެނީ ދުނިޔޭގެ އެހެން ހިސާބުތަކަށް ވުރެ ވަރަށް މާ ހަލުވިކޮށް ޔޫޕަރްގެ ގައުމުތަކުގައި ތިމާވެއްޓާ ރައްޓެހި އުފެއްދުންތަކަށް އޮތް ޑިމާންޑް ވެސް ބޮޑުވަމުން އަންނަކަން." ހޮންޑާގެ ސީނިއާ ވައިސް ޕްރެޒިޑެންޓް ޓޮމް ގާޑްނާ ވިދާޅުވި އެވެ.

ހޮންޑާ އިން ބުނިގޮތުގައި ކުރިއަށް އޮތް ތިން އަހަރު އެ ކުންފުނިން ޔޫރަޕްގެ މާކެޓަށް އާ ހަ މޮޑެލެއްގެ ކާރުތައް ތައާރަފުކުރާނެ އެވެ. އޭގެ ތެރޭގައި އަންނަ އަހަރު ވިއްކަން ފަށާ ހޮންޑާ ޖޭޒްގެ ހައިބްރިޑް ވާޝަން ވެސް ހިމެނެ އެވެ.

ޖަރުމަންގެ މަޝްހޫރު ކުންފުނި ވޯކްސްވޭގެން އިން ވަނީ އެ ކުންފުނިން އުފައްދާ އުޅަނދުތަކުގެ އިލެކްޓްރިކް ނުވަތަ ހައިބްރިޑް ވާޝަން އުފެއްދުމަށް ކުރިއަށް އޮތް ފަސް އަހަރަށް 34 ބިލިއަން ޑޮލަރު އިންވެސްޓްކުރަން ނިންމައިފަ އެވެ. އެ ކުންފުނީގެ އަމާޒަކީ 2028 އެވެ.

ދެކުނު ކޮރެއާ ހިއުންޑައިން ދާދި ފަހުން ވަނީ އިލެކްޓްރިކް ވެހިކަލްތައް އުފެއްދުންތަކަށް 35 ބިލިއަން ޑޮލަރު އިންވެސްޓްކުރަން ނިންމާފައިވާކަން އިއުލާންކޮށްފަ އެވެ. އެ ކުންފުނީގެ ޓާގެޓަކީ 2025 އެވެ.

ބްލޫމްބާގް ނިއު އެނަޖީ ފައިނޭންސުން އަދާކުރާ ގޮތުގައި 2040 އާ ހަމައަށް އަންނަ އިރު، ދުނިޔޭގެ އެއްގަމު ދަތުރުފަތުރަށް ބޭނުންކުރާ އުޅަނދުފަހަރުގެ 57 ޕަސަންޓަކީ އިލެޓްރިކް ވެހިކަލްތަކަށް ވާނެ އެވެ.