އަލީ ހުސައިންގެ ގަރާރު ރުއްގަހުގެ ހިމާޔަތަށް

ރިސޯޓުތައް ފެހިކުރުމުގެ ބޭނުމުގައި، އެހެން ރަށްރަށުން ރުއްގަސް ނެގުން ހުއްޓާލަން ގޮވާލައި ރައްޔިތުންގެ މަޖިލިހަށް މިއަދު ގަރާރެއް ހުށަހަޅައިފި އެވެ.

ރައްޔިތުންގެ މަޖިލިހުގެ ކެންދޫ ދާއިރާގެ ޖުމްހޫރީ ޕާޓީގެ މެމްބަރު އަލީ ހުސެއިން ހުށަހެޅުއްވި ގަރާރުގައި ބުނެފައި ވަނީ ބިން ހިއްކައިގެންނާއި އެހެނިހެން ގޮތް ގޮތުން ތަރައްގީކުރަމުން އަންނަ ރިސޯޓުތައް ފެހިކުރުމަށް، ރާއްޖޭގެ މީހުން ދިރިއުޅޭ ރަށްރަށާއި ފަޅު ރަށްރަށުން ރުއްގަސް ނަގަމުންދާ ކަމަށެވެ. އެހެންވެ، އަލީ ހުސެއިން ހުށަހެޅުއްވީ ސަރުކާރުގެ ސަމާލު ކަމަށް މިކަން ގެނެސް، އެކަން ހުއްޓުވުމަށެވެ.

އަލީ ހުސެއިންގެ މި ގަރާރު އައީ، މިފަހުން ވެސް ރަށްރަށުން ރުއް ނެގުމުގެ މައްސަލަތަކެއް ފެންމަތިވެ، ސޯޝަލް މީޑިއާގައި ވަރަށް ބޮޑަށް ފާޑު ކިޔުން އަމާޒުވެފައި ވަނިކޮށެވެ.

ގަރާރުގައި ވަނީ ވޭތުވެދިޔަ ހަތަރު އަހަރެއްހާ ދުވަހުގެ ތެރޭގައި، ރުއްގަސް ނަގައިގެން ރިސޯޓުތަކަށް ގެންދާ މައްސަލަ ވަރަށް ސީރިއަސް ކަމަށެވެ. ގަރާރުގައި ވަނީ، ރަށްރަށުގައި ތަރައްގީގެ މަޝްރޫއުތައް ހިންގުމަށް ކަމަށް ބުނެ ރުއްގަސް މުލުން ލުހެގެން ގެންދިއުން އާންމު ކަމަކަށްވީ އެމްއެމްޕީއާރުސީގެ ބޮޑު ހިޔާނާތުގެ ތެރެއިން ދޫކުރި ފަޅުތަކާއި ފަރުތައް ހިއްކައި އެތަން ތަނުގައި އާޓިފިޝަލް ރަށްތައް ހެދި ހިސާބުން ކަމަށެވެ.

ތަރައްގީގެ މަޝްރޫއުތައް ހިންގުމަށް ކަމަށް ބުނެ، ގަވާއިދުތަކުގައި ހުރި ބާގަނޑުތަކުގެ ބޭނުންކޮށްގެން، ގިނަ އަދަދަށް ރުއްގަސް ނަގަން ޖެހޭ ގޮތަށް އެންވަޔަރަމަންޓަލް އިމްޕެކްޓް އެސެސްމަންޓް (އީއައިއޭ) ފަރުމާ ކުރަން ފަށާފައިވާ ކަމަށް ވެސް ގަރާރުގައިވެ އެވެ.

ރަށްރަށުގެ ގަސްބޯ ވަލު ތެރޭގައި މަގު ހެދުމާއި ރަށްރަށުގެ ހޭޅިފަށުގައި ހެދިފައި ހުރި ރުއްގަސް ނަގަން ޖެހޭ ގޮތަށް ރިންގް ރޯޑް ހެދުން ފަދަ، ތަރައްގީގެ ނަމުގައި ހިންގާ މަޝްރޫއުތަކަށް އީއައިއޭ ހަދައި ރުއްގަސް ނެގުމަށް މަސައްކަތްކޮށް ކާމިޔާބު ކޮށްފައި ވެސް އެބަހުރި ކަމަށް ގަރާރުގައިވެ އެވެ.

ގަރާރުގައި ރުއްގަސް ނަގައިގެން ގެންދިޔަ ރަށްތަކުގެ ތަފްސީލްތައް ހިމަނާފައިވެ އެވެ. އޭގެ ތެރޭގައި ދާދި ފަހުން ރުއްގަސް ގެންދިޔަ ހއ. ކެލާ، ހއ. ބާރަށް އަދި ށ. ފޯކައިދޫ ހިމެނެ އެވެ.

އަލީ ހުސައިންގެ ގަރާރުގައި ވަނީ ކަނޑައެޅިފައިވާ ހަރުދަނާ ގަވާއިދުތަކުގެ ބޭނުން ނުކޮށް، ރަށްރަށަށް ބޮޑެތި ގެއްލުންވާ ގޮތަށް ރުއްތައް އުފުރައިގެން ގެންދިއުމަކީ ރަށްރަށުގެ ތިމާވެއްޓަށާއި ރައްޔިތުންނަށް ވެވޭ ބޮޑު އިހުމާލެއް ކަމަށް ބުނެފަ އެވެ. އެހެންވެ، އެކަމުގައި އަޅަންވީ ފިޔަވަޅުތައް ގަރާރުގައި ހިމަނާފައިވެ އެވެ.

އެގޮތުން ތަރައްގީގެ މަޝްރޫއަކަށް ކޮންމެހެން ނަގަން ޖެހޭ ރުއްގަސް އިންދަން ޖެހޭނީ އެ ރަށެއްގައި ނުވަތަ އުފުރާ ސަރަހައްދާ އެންމެ ކައިރިން އޮތް އާންމު ތަނެއްގައި ކަމަށް ކަނޑައަޅާ މިހާރު އޮތް ގަވާއިދު މިހާރުން މިހާރަށް އިސްލާހު ކުރަން ޖެހޭ ކަން ގަރާރުގައި ފާހަގަކުރި އެވެ.

"މިގޮތަށް ރޭވިއްޖަ ނަމަ ރަށުން ނަގަނީ ކޮންމެހެން ނަގަން ޖެހޭ ގަހެއް އަދި ރުކެއް ކަން ޔަގީން ކުރުމުގެ އިތުރުން ސަރުކާރުގެ ރަށްފެހި ވައުދު ހާސިލް ކުރުމަށް ލިބޭ ބާރަކަށް ވެސް ވާނެ،" ގަރާރުގައިވެ އެވެ.

ގަރާރުގައި ބުނެފައި ވަނީ ރުއްގަސް ނެގުމުގެ ކަންތައް މިހާ ފުޅާކޮށް ހުއްޓުމެއްނެތި ދިމާވާން މެދުވެރިވާ ހުރިހާ ސަބަބެއް ހޯދައި ފިޔަވަޅު އަޅަން ޖެހޭ ކަމަށެވެ.