"ކްރިޝް 4" ޑައިރެކްޓްކުރާނީ ރާކޭޝް ރޯޝަނެއް ނޫން، ސަންޖޭ ގުޕްތާ؟

ރިތިކް ރޯޝަން ސުޕަހީރޯ ކެރެކްޓާއެއް ކުޅޭ "ކްރިޝް" ސީރީޒްގެ ހަތަރު ވަނަ ފިލްމު އޭނާގެ ބައްޕަ ރާކޭޝް ރޯޝަންގެ ބަދަލުގައި ޑައިރެކްޓްކުރާނީ ސަންޖޭ ގުޕްތާ ކަމަށް ރިޕޯޓްތައް ބުނެފި އެވެ.

ރާކޭޝް ކުރިން ބުނެފައިވާ ގޮތުގައި "ކްރިޝް 4" އަންނަ އަހަރުގެ ފަހުކޮޅު ގެނެސްދޭނެ އެވެ. މި ފިލްމު އޭނާގެ ބަދަލުގައި އެހެން މީހަކާ ޑައިރެކްޓްކުރަން ހަވާލުކުރީ ރާކޭޝްގެ ސިއްހީ ހާލަތު ހުރި ގޮތުން ކަމަށްވެ އެވެ.

އޭނާ އަށް މި އަހަރުގެ ކުރީކޮޅު ކަރުގެ ކެންސަރަކަށް ފަރުވާ ވެސް ހޯދާފައިވެ އެވެ.

މިހާރު ބެލެވޭ ގޮތުން "ކްރިޝް 4" ސިނަމާތަކަށް ގެންނަން ނިންމާފައި ވަނީ 2021 ގަ އެވެ.

އެ ފިލްމުގެ ޓީމްގެ އިތުރުބާރު ހިފޭ މީހަކާ ހަވާލާދީ ބޮލީވުޑް ހަންގާމާ އިން ބުނީ ފިލްމު ޑައިރެކްޓްކޮށްދޭން ސަންޖޭ އަށް ހުށަހެޅުމުން އެކަން އޭނާ ގަބޫލު ކޮށްފައިވާ ކަމަށާއި ސަންޖޭ އަކީ ސުޕަހީރޯ ފިލްމެއް ޑައިރެކްޓްކުރެވިދާނެ މީހެއް ކަމަށް ރާކޭޝް ގަބޫލުކުރާ ކަމަށެވެ.

ރާކޭޗް ޕްރޮޑިއުސްކޮށް، ރިތިކް 2017 ގެ ކުޅުނު ފިލްމު "ކާބިލް" އަކީ ވެސް ސަންޖޭ ޑައިިރެކްޓްކުރި ފިލްމެކެވެ. އެހެންވެ އޭނާ އާއި ރޯޝަން އާއިލާއާ މިހާރު ވަރަށް ގާތް ގުޅުމެއް ވެސް އޮވެ އެވެ. ސަންޖޭ މި ވަގުތު އަންނަނީ ބޮޑު ކާސްޓަކާ އެކު ހަދާ ގޭންސްޓާ ފިލްމު "މުމްބާއީ ސާގާ" ގެ މަސައްކަތްކުރަމުންނެވެ. އެ ފިލްމު ސިނަމާތަކަށް ގެންނަން ނިންމާފައި ވަނީ އަންނަ އަހަރުގެ ޖޫން 19 ގަ އެވެ.

ހަންގާމާ އިން ބުނިގޮތުގައި 250 ކްރޯޑް ރުޕީސް (36 މިލިއަން ޑޮލަރު) ގެ ބަޖެޓަކުން ހަދާ "ކްރިޝް 4" ގެ މަސައްކަތް ފަށާނީ އަންނަ އަހަރުގެ މެދުތެރޭ ނުވަތަ ފަހުކޮޅު އެވެ. އަދި ގިނަ އަދަދަކަށް ވީއެފްއެކްސް ވެސް ހިމެނޭ ފިލްމުގެ ތައްޔާރީތައް މިހާރު ވަމުން އަންނަ ކަމަށް ބުންޏެވެ.

"ކްރިޝް" އަކީ ރާކޭޝް 2003 ގައި "ކޮއި...މިލް ގަޔާ" ގެ ނަމުގައި ގެނެސްދިން ފިލްމުގައި ރިތިކް ކުޅުނު ކެރެކްޓާއިން ކުރި ފަޅުވައިގެން ގެނެސްދޭން ފެށި ސީރީޒެކެވެ. އެގޮތުން "ކްރިޝް" 2006 ގައި ގެނެސްދިނުމަށް ފަހު "ކްރިޝް 3" ގެނެސްދިނީ 2013 ގަ އެވެ. އެ ދެ ފިލްމުގައި ވެސް ބަތަލާގެ ރޯލް ކުޅުނީ ޕްރިޔަންކާ ޗޯޕްޅާ އެވެ.

ނަމަވެސް "ކްރިޝް 4" ގެ ބަތަލާއަކީ ކާކު ކަމެއް އަދި ނޭނގެ އެވެ. ބައެއް ރިޕޯޓްތައް ބުނާގޮތުން މި ފަހަރު ފިލްމުން ފެނުމުގެ ފުރުސަތު ބޮޑީ ކްރިތީ ސެނަން އެވެ.

ރާކޭޝް މިދިޔަ އަހަރު ދިން އިންޓަވިއުއެއްގައި ފިލްމުގެ ހަތަރު ވަނަ ބައިން ވެސް ޕްރިޔަންކާ ފެނިދާނެކަމުގެ އިޝާރާތެއް ދީފައިވެ އެވެ.