ޑެންގީ ޖެހިގެން 11 އަހަރުގެ ކުއްޖަކު މަރުވެއްޖެ

ޑެންގީ ހުން ޖެހިގެން 11 އަހަރުގެ އަންހެން ކުއްޖަކު މިރޭ މަރުވެއްޖެ އެވެ.

އައިޖީއެމްއެޗުގެ އައިސީޔޫގައި ރެއިން ފެށިގެން ފަރުވާ ދެމުން ދަނިކޮށް އެކުއްޖާ މަރުވީ ގަދަަޔަށް ހުން އައިސްގެން އުޅޭތާ ތިން ދުވަސްވި ފަހުންނެވެ. ޑެންގީ ޖެހިފައިވާކަން ކަށަވަރުވީ ރޭގަ އެވެ.

މިއީ ޑެންގީ ހުން ޖެހިގެން މި އަހަރު މަރުވި ދެ ވަނަ ކުއްޖާ އެވެ. މިދިޔަ މަހުގެ 22 ވަނަ ދުވަހު ވެސް ޑެންގީ ހުން ޖެހިގެން ނުވަ އަހަރުގެ ތެލެސީމިއާ ފިރިހެން ކުއްޖަކު މަރުވެފައިވެ އެވެ. އަދި ޑެންގީ ހުމުގައި މިދިޔަ ހަފުތާގައި ވެސް ސިކްލް ސެލް ހުންނަ ކުއްޖެއްގެ ހާލު ވަރަށް ސީރިއަސްވި އެވެ.

މި ދުވަސްވަރު ރާއްޖޭގެ އެކި ހިސާބުތަކުގައި ޑެންގީ ދަނީ އިތުރުވަމުންނެވެ. އަދި މަދިރީގެ ސަބަބުން ޖެހޭ ޑެންގީ އާއި ޗިކުންގުންޔާ އަށް ރައްކާތެރިވުމަށް ސިއްހީ އިދާރާތަކުން ވެސް އަންނަނީ އިލްތިމާސް ކުރަމުންނެވެ.

ޑެންގީ ޖެހިގެން، މިދިޔަ އަހަރު މަރުވީ އެންމެ ދިވެއްސެކެވެ. އަދި 2017 ވަނަ އަހަރު ރާއްޖެ އިން 200 އަށް ވުރެ ގިނަ މީހުންނަށް ޑެންގީ ޖެހުނު އިރު ހަ މީހަކު މަރުވި އެވެ.