ކޮންފަރެންސް އިން މުހިއްމު ކަންތައްތަކެއް އެނގިއްޖެ: އާދިލް

ވިލާ ކޮލެޖުގެ ރިސާޗު ކޮންފަރެންސުން މުހިއްމު އަދި ގިނަ ކަންތައްތަކެއް އެނގިގެން ދިޔަ ކަމަށް އެ ކޮލެޖުގެ ރިސާޗް އެންޑް އިނޮވޭޝަންގެ ޑެޕިއުޓީ ވައިސް ރެކްޓާ ޑރ. މުހައްމަދު އާދިލް ވިދާޅުވެއްޖެ އެވެ.

ދެ ދުވަހުގެ މުއްދަތަށް ގެންދިޔަ ކޮންފަރެންސް ނިންމުމުގެ ރަސްމިއްޔާތަށްފަހު "މިހާރު" އާ ރޭ ވާހަކަދައްކަވަމުން އާދިލް ވިދާޅުވީ މިދިޔަ ތިން އަހަރަށްވުރެ މި އަހަރުގެ ކޮންފަރެންސް މާ ބޮޑަށް ވެސް ކާމިޔާބު ކަމަށެވެ.

އެ ކޮންފަރެންސަށް 62 ޕޭޕަރު ހުށަހަޅާފައި ވެ އެވެ. އަދި އެކި މައުލޫތަކުގެ މައްޗަށް ޕެނަލް ޑިސްކަޝަންތައް ބާއްވާފައި ވެ އެވެ.

"ޕެނަލް ޑިސްކަޝަންތައް ދިޔައީ ވަރަށް ފުރިހަމަ އަށް. އޯޑިއެންސް ވެސް ވަރަށް އިންޓްރެކްޓިވްކޮށް އެއަށް ކޮމެންޓްކޮށް ސުވާލުކޮށް ހެދި. ހާއްސަކޮށް މިހާރުގެ ހާލަތާ ގުޅިގެން. ކޮން ކަހަލަ ކަންތައްތަކެއްކަން ރަނގަޅުކުރަންވީ، ކޮން ކަހަލަ ކަންތައްތަކެއްކަން އިސްލާހުކުރަން ވިސްނަންވީ،" ކޮންފަރެންސްގެ ޗެއާކަން ވެސް ކުރެއްވި އާދިލް ވިދާޅުވި އެވެ.

އެ ހަރަކާތުގައި ހަތަރު ކީނޯޓް ސްޕީޗް ދީފައި ވެ އެވެ. އެގޮތުން ތިމާވެއްޓާ ރައްޓެހި ދިރިއުޅުމެއް ބިނާކުރުމާ ގުޅޭގޮތުން އެންވަޔަރްމަންޓް މިނިސްޓަރު ޑރ. ހުސެއިން ރަޝީދު ވާހަކަދެއްކެވިއިރު ސީޝެލްސް ޔުނިވާސިޓީގެ ވައިސް ޗާންސެލާ ޑރ. ޖަސްޓިން ޑޭވިސް ވެލިންޓިން ވަނީ ކުދި ގައުމުތަކަށް ތައުލީމީ ދާއިރާ ރިފޯމް ކުރެވޭނެ ގޮތްތަކާ ގުޅޭގޮތުން ވާހަކަދައްކަވައިފަ އެވެ.

ދަރިވަރުންނަށް، މުގައްރަރު ފޯރުކޮށްދެވޭނެ ފަސޭހަ ގޮތްތަކުގެ މައްޗަށް އޭނާ އަލިއަޅުއްވައިލެއްވި އެވެ. އާ މަންހަޖަށް އަމަލުކޮށް އެ ތަންފީޒުކުރުމުގެ މަރުހަލާގައި ރާއްޖެ އުޅެމުންދާއިރު އެއީ ވަރަށް މުހިއްމު ވާހަކަތަކެއްކަން ފާހަގަކުރެއްވި އެވެ.

ޕޭޕަރުތަކާއި ޕްރެޒެންޓޭޝަން ހުށަހަޅާފައިވަނީ މައިގަނޑު އަށް ދާއިރާއަކުންނެވެ. އޭގެ ތެރޭގައި ތައުލީމް، ވިޔަފާރި، ޓެކްނޮލޮޖީ، ތިމާވެށި އަދި އިޖުތިމާއީ ދާއިރާ ހިމެނެ އެވެ.

"ވަރަށް މައުލޫމާތު މުއްސަނދިވެގެން ދިޔަ ކޮންފަރެންސެއް... މިތަނުން ދާ ހުރިހާ އެންމެންނަށް ވެސް ތަފާތު އެކި ދާއިރާތަކުން ތަފާތު ވިސްނުންތައް އައިސްފައި ހުންނާނެ އެކި ދިމަދިމާލުން ކިހިނެއްކަން ވިސްނުން ބައްޓަންކުރަންވީ. މުސްތަގުބަލުގައި އަދި އޭގެ ރިސާޗަރުންނަށް ކޮން ކަންތައްތަކަށްކަން ރިސާޗު ބައްޓަންކުރަންވީ،" އާދިލް ވިދާޅުވި އެވެ.

އޭނާ ވިދާޅުވި ގޮތުގައި މީގެ ކުރިން ބޭއްވި ކޮންފަރެންސްތަކުން ފާހަގި ކަންތައްތަކުން ބަދަލުތަކެއް އައިސްފައިވާ ކަމަށެވެ. ހާއްސަކޮށް ކޮންފަރެންސަށް ހުށަހަޅާ ޕޭޕަރުގެ ކޮލެޓީ، އޭގެ ކުރީ އަހަރަށްވުރެ ވަރަށް ރަނގަޅުކަން ފާހަގަކުރެއްވި އެވެ. މިސާލަކަށް ވަޒީފާ ނެތް މީހުންގެ އާބާދީއާ ގުޅޭގޮތުން ހަދާފައިވާ ޕްރެޒެންޓޭޝަންގެ ނަތީޖާއަކީ ގައުމީ ފެންވަރުގައި ގޮތްތަކެއް ނިންމާއިރު ވަރަށް މުހިއްމު މައުލޫމާތުތަކެއް ކަމަށެވެ.

"މިހާރު ގަޓް ފީލިންނަށް ގޮތްތައް ނިންމުމުގެ ބަދަލުގައި މިފަދަ ރިސާޗުތަކުން ގޮތްތައް ނިންމުމުގައި ވަރަށް މުހިއްމު. އެ މައުލޫމާތުތައް ވަރަށް ގިނަ ދާއިރާތަކުން ލިބިގެންދިޔަ ޑިސިޝަންތައް ނަގަން ބޭނުންވާ ދާއިރާތަކުން، އެ ނަގަން ބޭނުންވާ މީހުންނަށް."