ވިލާ ކޮލެޖުން ސެޕްޓެމްބަރު އިންޓޭކަށް ހުޅުވާލައިފި

ވިލާ ކޮލެޖުން އަންނަ ސެޕްޓެމްބަރު މަހު ފަށާ ކޯސްތަކުގައި ބައިވެރިވާން ހުޅުވާލައިފި އެވެ.

އެ ކޮލެޖުގައި ބޭއްވި ނޫސްވެރިންގެ ބައްދަލުވުމުގައި ވައިސް ރެކްޓާ ޑރ. އަލީ ނަޖީބު ވިދާޅުވީ ސެޕްޓެމްބަރު މަހުގެ އިންޓޭކުގައި ތަފާތު އެކި ދާއިރާތަކުން 90 ކޯސް ހިންގާނެ ކަމަށެވެ. އެ ކޯސްތަކަށް އަންނަ އޮގަސްޓް 1 ވަނަ ދުވަހުގެ ނިޔަލަށް ކުރިމަތިލެވޭނެ ކަމަށް އޭނާ ވިދާޅުވި އެވެ.

މި އިންޓޭކްގައި ސެޓްފިކެޓް ލެވެލް 1ގެ ކޯހަކާއި ސެޓްފިކެޓް ލެވެލް 2 ގެ ދެ ކޯހަކާއި ސެޓްފިކެޓް ތިނެއްގެ ފެންވަރުގެ 11 ކޯހަކާއި ފައުންޑޭޝަން ފެންވަރުގެ 13 ކޯހަކާއި ޑިޕްލޮމާ ފެންވަރުގެ 17 ކޯހަކާއި ޑިގްރީ ފެންވަރުގެ 19 ކޯހެއް ހިމެނެ އެވެ. އޭގެ އިތުރުން ޕޯސްޓް ގްރެޖުއޭޓް ޑިޕްލޮމާ ފެންވަރުގެ ފަސް ކޯހަކާއި މާސްޓާސް ފެންވަރުގެ 12 ކޯހެއް ހިމެނެ އެވެ. އެ ކޯސްތަކުގެ އިތުރުން މެރިން ސްޓަޑީޒްގެ އަށް ކޯހެއް ފަށަން ވަނީ ހަމަޖައްސައިފަ އެވެ.

މީގެ އިތުރުން ގާނޫނީ ދާއިރާއިންނާއި ވިޔަފާރި އާއި ކިޔަވައިދިނުމާއި ރިސާޗުކުރުމާއި ނަރުސްކަމުގެ ކޯސްތައް ހިމެނެ އެވެ. އެ ކޯސްތަކުގެ ތެރޭގައި ވިލާ ކޮލެޖުގެ އަމިއްލަ ޕްރޮގްރާމްތަކާއި ޔުނިވާސިޓީ އޮފް ދަ ވެސްޓް އޮފް އިންގްލެންޑުގެ ޑިގްރީ އަދި މާސްޓާސްގެ ކޯސްތައް ހިމެނެ އެވެ.

ވިލާ ކޮލެޖުގެ ރެކްޓާ ޑރ. އަހުމަދު އަންވަރު ވިދާޅުވީ ރާއްޖޭގައި ތިބެގެން ހެޔޮ އަގެއްގައި މަތީ ތައުލީމް ހާސިލްކުރެވޭނެ ފުރުސަތުތައް އެ ކޮލެޖުން ފަހިކޮށްދީފައިވާ ކަމަށެވެ. އެހެންވެ ވީހާ ވެސް ގިނަ ދަރިވަރުން އޭގެ ބޭނުން ހިފުމަށް އަންވަރު އެދިވަޑައިގަތެވެ.

އަލީ ނަޖީބް ވިދާޅުވީ ދަރިވަރުންނަށް ވީހާ ވެސް ފަސޭހައިން ކޯސް ފީ ދެއްކޭނެ އިންތިޒާމް ހަމަޖައްސައިދޭނެ ކަމަށެވެ. އެގޮތުން މަހުން މަހަށް ބަހާލައިގެންނާއި ސަރުކާރުގެ ހިލޭ ޑިގްރީ ޕްރޮގްރާމުގައި ވެސް ބައިވެރިވެވޭނެ ކަމަށް ވިދާޅުވި އެވެ.