ދިވެހިންނަށް ދިމާވާ ދަތިތައް މައުމޫން އޮޅުން ފިލުވައިފި

މައުމޫން، ލަންކާގައި އުޅޭ ދިވެހިންނާ އަނެއްކާ ވެސް ބައްދަލުކުރައްވައި ދަތިތައް އޮޅުން ފިލުއްވައިފި

01 ޖުލައި 2019

ކުރީގެ ރައީސް މައުމޫން އަބްދުލްގައްޔޫމް، ސްރީ ލަންކާގައި ދިރިއުޅެމުންދާ ދިވެހިންނާ ދެ ވަނަ ފަހަރަށް ރޭ ބައްދަލުކުރައްވައި، އެ މީހުންނަށް އެ ގައުމުގައި ކުރިމަތިވާ ދަތިތަކުގެ މައުލޫމާތު އޮޅުން ފިލުއްވައިފި އެވެ.

އާސިމާ ނިޒާރު

އެމަނިކުފާނާ އެކު، ލަންކާގައި މި ވަގުތު ހުންނެވި، މައުމޫން ރިފޯމް މޫވްމަންޓް (އެމްއާރުއެމް) ގައި އިސްކޮށް އުޅުއްވާ އަބްދުލް އަލީމް ވިދާޅުވީ، ލަންކާ ގައި ކިޔަވާ ދަރިވަރުންނާއި އެތަނުގައި ދިރިއުޅެމުން އަންނަ މީހުންނާ ބައްދަލު ކުރައްވައި، ދިމާވާ ދަތިތައް ބައްލަވާފައިވާ ކަމަށެވެ.

ދިވެހިން ފާޅުކުރި ކަންބޮޑުވުންތަކުގެ ތެރޭގައި ވިސާގެ މައްސަލަ އާއި ސްޓޫޑެންޓް ލޯނާއި އާސަންދަ ލިބުމުގެ މައްސަލަތައް ހިމެނެ އެވެ.

ކުރީގެ ރައީސް މައުމޫންގެ ދެކަނބަލުން ލަންކާގައި އުޅޭ ދިވެހީންނާ ބައްދަލުކުރުމުގެ ތެރެއިން.-- ފޮޓޯ: އެމްއާރުއެމް

އެ ބައްދަލުވުމުގައި ސަތޭކަ ވިއްސަކަށް ދިވެހިން ބައިވެރިވި އެވެ. ލަންކާގައި އުޅޭ ދިވެހިންނާ މިދިޔަ ހުކުރު ދުވަހު ވެސް މައުމޫން ބައްދަލުކުރައްވާފައި ވެ އެވެ.

އެމަނިކުފާނު ވަނީ މާލެ ވަޑައިގެން ރައީސް އިބްރާހިމް މުހައްމަދު ސޯލިހާ ބައްދަލުކުރައްވައި އެކަންކަން ހިއްސާކުރައްވާނެ ކަމުގެ ޔަގީންކަން ދެއްވައިފަ އެވެ.

Nasreena and I had a great time last night with Maldivians resident in Sri Lanka. They shared their concerns over visa issues, student loans and Aasandha. I assured them that govt is working on these problems and that I will convey their concerns to HE president @ibusolih pic.twitter.com/32V6xTt9cT
— Maumoon Abdul Gayoom (@maumoonagayoom) July 1, 2019

ލަންކާގައި އުޅޭ ދިވެހިންނާ ބައްދަލުކުރެއްވުމަށް ފަހު މައުމޫން ކުރެއްވި ޓުވީޓު

"ސަރުކާރުގެ ތެރެއިން ހައްލުކޮށްދޭން އެދުނު. ރައީސް މައުމޫން ވަނީ އެކަން ރައީސްއާ ހިއްސާކޮށްދެއްވާނެކަމުގެ ޔަގީންކަން ދެއްވައިފަ،" އަލީމް ވިދާޅުވި އެވެ.

ކުރީގެ ރައީސް މައުމޫން، ލަންކާގައި އުޅޭ ދިވެހިންނާ ބައްދަލުކުރަން ރޭ ބޭއްވި ހަރަކާތުގައި އަންހެނުންތަކަކާއެކު ފޮޓޯއަކަށް ހުއްޓިވަޑައިގެން.-- ފޮޓޯ: އެމްއާރުއެމް

މިހާރު ރާއްޖޭގެ ވެރިކަން ކުރާ ކޯލިޝަންގެ ހަތަރު ލީޑަރުންގެ ތެރޭގައި ހިމެނޭ މައުމޫން ލަންކާ އަށް ވަޑައިގެން މި އުޅުއްވަނީ ބޭސްފަރުވާ އަކަށެވެ. ލަންކާގައި އަމިއްލަ އަށް މަރުވެގެން މިދިޔަ އޭޕްރީލް 21 ގައި އީސްޓާ ބޮމުގެ ހަމަލާ ދިން އިރު ވެސް އެމަނިކުފާނު ހުންނެވީ ބޭސްފަރުވާ އަކަށް އެ ގައުމުގަ އެވެ. އެކަމަކު، އެ ހަމަލާއާ ގުޅިގެން ލަންކާގެ ހާލަތު އިތުރަށް ގޯސްވުމުން މައުމޫން ވަނީ ދަތުރުފުޅު ކުރު ކުރައްވާފައި ރާއްޖެ ވަޑައިގެންފަ އެވެ.

Comments